ୟୁନାଇଟେଡ ନେସନ୍ସ,୧୮-୪: ବିଶ୍ୱର ଦେଶଗୁଡିକ ଆପଣାଉଥିବା ସଂରକ୍ଷଣବାଦ ନିଯୁକ୍ତି ସୁରକ୍ଷା ଦିଗରେ ବିଶେଷ ଭାବେ ସହାୟକ ହେବ ନାହିଁ। ଅପରପକ୍ଷରେ ଅଟୋମେଶନ ଏବଂ ଆର୍ଟିଫିସିଆଲ ଇଣ୍ଟେଲିଜେନ୍ସ ଯୋଗୁ ନିଯୁକ୍ତି ଉପରେ ପଡୁଥିବା ପ୍ରଭାବକୁ ଏହା ସାମାନ୍ୟ ପ୍ରତିହତ କରିବାକୁ ସକ୍ଷମ ହୋଇ ପାରେ ବୋଲି ରିଜର୍ଭ ବ୍ୟାଙ୍କର ପୂର୍ବତନ ଗଭର୍ନର ରଘୁରାମ ରାଜନ ମଙ୍ଗଳବାର କହିଛନ୍ତି। ଏଠାରେ ଚାଲୁଥିବା ଇକୋସୋକ୍-୨୦୧୯ କାର୍ଯ୍ୟକ୍ରମରେ ଅଭିଭାଷଣ ରଖି ରାଜନ କହିଛନ୍ତି ଯେ, ଉଦ୍ୟୋଗୀକରଣ ଏବଂ ଜଗତୀକରଣ ଲାଭରୁ ବଞ୍ଚିତ ହୋଇଥିବା ଲୋକଙ୍କ ଗଣତାନ୍ତ୍ରିକ ମତକୁ ଶିଳ୍ପୋନ୍ନତ ଦେଶଗୁଡ଼ିକ ଅଣଦେଖା କରି ପାରିବେ ନାହିଁ। ଏପରି କରିବା ଦେଶଗୁଡିକ ଲାଗି ଭାରି ପଡିବ।
ଦ୍ୱିତୀୟ ବିଶ୍ୱଯୁଦ୍ଧ ପରେ ମୁକ୍ତ ଏବଂ ଉଦାରଶୀଳ ବଜାର ବ୍ୟବସ୍ଥା ଯୋଗୁ ଗତ ୬ ଦଶନ୍ଧୀ ଧରି ବିଶ୍ୱ ଅନେକ ଲାଭ ପାଇଛି। ମାତ୍ର ଏହା ଉପରେ ଏବେ ବିଭିନ୍ନ ପ୍ରଭାବ ଆସିଛି। ରାଜନ ଆହୁରୀ ମଧ୍ୟ କହିଛନ୍ତି ଯେ, ପ୍ରତିଦ୍ୱନ୍ଦ୍ୱିତାମୂଳକ ବଜାର ବ୍ୟବସ୍ଥାରେ ସଂରକ୍ଷିତ କ୍ଷେତ୍ରରେ ନିଯୁକ୍ତିର ଫାଇଦା ନେଉଥିବା ଦେଶଗୁଡିକ ଅନ୍ୟ କ୍ଷେତ୍ରରେ ନିଯୁକ୍ତି ହରାଇଛନ୍ତି। ବର୍ଦ୍ଧିତ ଇନ୍ପୁଟ ଯୋଗୁ ଅଧିକ ଖର୍ଚ୍ଚ କରିବାକୁ ପଡୁଥିବାରୁ ଉକ୍ତ କ୍ଷେତ୍ରରେ ଦେଶଗୁଡିକ ପ୍ରତିଦ୍ୱନ୍ଦ୍ୱିତାଠାରୁ ଦୂରେଇ ଯାଇଛନ୍ତି। ଅଟୋମେଶନ ଆର୍ଟିଫିସିଆଲ ଇଣ୍ଟେଲିଜେନ୍ସ ଯୋଗୁ ଅନେକ ନିଯୁକ୍ତି ପ୍ରଭାବିତ ହେଉଛି। ଏଣୁ ସଂରକ୍ଷଣବାଦ ଏହି କ୍ଷେତ୍ରରେ ନିଯୁକ୍ତି ରକ୍ଷା ଦିଗରେ ବିଶେଷ ସହାୟକ ହେବନି। ଅପରପକ୍ଷରେ ଶିଳ୍ପୋନ୍ନତ ଦେଶଗୁଡିକର ଜନସଂଖ୍ୟାରେ ବୟସ୍କ ଲୋକଙ୍କ ସଂଖ୍ୟା ବଢୁଛି। ଅଭିବୃଦ୍ଧି ଲାଗି ଏହି ଦେଶଗୁଡିକ ବିକାଶନ୍ମୋଖୀ ଦେଶଗୁଡିକର ଯୁବ ପ୍ରଫେସନାଲାଙ୍କ ଉପରେ ନିର୍ଭର କରୁଥିବା ସେ ପ୍ରକାଶ କରିଛନ୍ତି।