ମାର୍ଶାଘାଇ, ୨୯।୩ (ଡି.ଏନ୍.ଏ.)-କରୋନା ଭୂତାଣୁ ସଂକ୍ରମଣକୁ ପ୍ରତିହତ କରିବା ପାଇଁ ସାରାଦେଶରେ ୨୧ ଦିନ ପାଇଁ ଲକ୍ଡାଉନ୍ କରାଯାଇଛି। ଓଷଧ, ପନିପରିବା, ମାଛ, ମାଂସ ଆଦି ଅତ୍ୟାବଶ୍ୟକ ସାମଗ୍ରୀ ଦୋକାନ ଖୋଲୁଥିବା ବେଳେ ଅନ୍ୟ ଦୋକାନ ସବୁ ବନ୍ଦ ରଖିବା ପାଇଁ ସରକାରୀ ନିର୍ଦ୍ଦେଶ ଜାରି କରାଯାଇଛି। ଏପରିସ୍ଥିତିରେ ସାଧାରଣ ଲୋକଙ୍କ ତୁଳନାରେ ମାନସିକ ବିକାରଗସ୍ତ ଓ ନିରାଶ୍ରୟ ଲୋକଙ୍କ ସମସ୍ୟା ବହୁଗୁଣିତ ହୋଇଯାଇଛି। ଏମାନେ ଜଳଖିଆ ଦୋକାନ ବା ହୋଟେଲରୁ ମାଗିଯାଚି ଖାଉଥିବା ବେଳେ ଏବେ ସବୁ ଦୋକାନ ବଜାର ବନ୍ଦ ଯୋଗୁ ଭୋକ ଉପାସରେ ଏମାନଙ୍କ ଦିନ କଟୁଛି। କେନ୍ଦ୍ରାପଡ଼ା ଜିଲା ମାର୍ଶାଘାଇ ବ୍ଲକ ଅଞ୍ଚଳର ଅନେକ ନିରାଶ୍ରୟ ଓ ମାନସିକ ବିକାରଗସ୍ତଙ୍କ ଭୋକିଲା ପେଟରେ ଦାନା ଗଣ୍ଡେ ଯୋଗାଇ ଦେବାକୁ ଆଗେଇ ଆସିଛନ୍ତି ସ୍ଥାନୀୟ ଯୁବକମାନେ। ମାର୍ଶାଘାଇ କେନାଲ ବ୍ରିଜ୍ ଅଞ୍ଚଳର କେତେଜଣ ଯୁବକ ନିଜ ଉଦ୍ୟମରେ ଏହି ନିରାଶ୍ରୟଙ୍କ ରନ୍ଧାଖାଦ୍ୟ ଯୋଗାଉଛନ୍ତି, ଯାହା ଅନ୍ୟମାନଙ୍କ ପାଇଁ ଉଦାହରଣ ପାଲଟିଛି। ୪ ଟି ବାଇକ୍ରେ ୮ ଜଣ ଯୁବକ କେନାଲ ବ୍ରିଜ୍ଠାରୁ ମହକାଳପଡ଼ାର ମଙ୍ଗଳପୁର ଛକ ଓ ରାମନଗର ପର୍ଯ୍ୟନ୍ତ ଯାଇ ଛକ ବଜାରରେ ଆଶ୍ରୟ ନେଇଥିବା ମାନସିକ ବିକାରଗସ୍ତ ଓ ଅସହାୟ ମଣିଷକୁ ଖାଦ୍ୟ ଓ ପାନୀୟ ଜଳ ଯୋଗାଉଛନ୍ତି। ଏହାଛଡ଼ା କେନାଲ ବ୍ରିଜଠାରୁ ଜାତୀୟ ରାଜପଥର ଛଘରିଆ ଛକ, କେନାଲ ବ୍ରିଜଠାରୁ ହଳଦିଆଗଡ଼ା, ନିଳାଞ୍ଚଳ ବଜାର ଛକ ସମେତ ପାଟକୁାରା ରାସ୍ତାର ବିଭିନ୍ନ ଛକ ବଜାରରେ ଥିବା ନିରାଶ୍ରୟଙ୍କୁ ଯୁବକମାନେ ଖାଦ୍ୟ ଯୋଗାଉଥିବା ଦେଖିବାକୁ ମିଳିଛି।