ନୂଆଦିଲ୍ଲୀ,୨୯।୨: ଦିଲ୍ଲୀରେ ଘଟିଥିବା ଭିଡ ହିଂସାରେ ବହୁ ନିରୀହ ଜୀବନ ଜଳି ଯାଇଛି। ସେମାନେ ସିଏଏର ସମର୍ଥକ ଅବା ବିରୋଧି ନ ଥିଲେ। କିମ୍ବା ଦଙ୍ଗାରେ ବି ନ ଥିଲେ ସାମିଲ। ପୋଡ଼ାଜଳା ବି କରୁ ନ ଥିଲେ। ସିଏଏ ରାଜନୀତିରେ ତାଙ୍କର କୌଣସି ଯୋଗଦାନ ନ ଥିଲା। କାମ ନ କଲେ ଖାଇବା ବନ୍ଦ ଭଳି ସେମାନେ ପେଟର ଭୋକ ମେଣ୍ଟାଇବା ପାଇଁ ଘରୁ କାମ କରିବା ଲାଗି ଗୋଡ଼ କାଢ଼ିଥିଲେ। କେହି ଅବା ସରକାରୀ କାମରେ ନିୟୋଜିତ ଥିଲେ। ସେମାନେ ହୋଇଥିଲେ ଭିଡ଼ ହିଂସାର ଶିକାର। ଭଲ ଚାକିରି ପାଇଁ ଆଖିରେ ଆଖିଏ ସ୍ବପ୍ନ ନେଇ ପ୍ରସ୍ତୁତି କରୁଥିବା ଶିକ୍ଷାର୍ଥୀଙ୍କ ଜୀବନ ବି ଭିଡ ହଂସାରେ ଯାଇଛି। କେହି କେହି ଆଖି ଆଗରେ ନିଜ ଘର ଜଳୁଥିବା ଦେଖି ସହି ନ ପାରି ହୃଦଘାତର ଶିକାର ମଧ୍ୟ ହୋଇଛନ୍ତି । କେତେକ ପୀଡ଼ିତ ପରିବାର ସଦସ୍ୟ ଧର୍ମ ପଚାରି ତାଙ୍କ ଉପରେ ଭିଡ଼ ହିଂସା ହୋଇଥିବା ଏବେ ପ୍ରକାଶ କରିଛନ୍ତି। ଦିଲ୍ଲୀ ରାଜରାସ୍ତାର ନିଆଁରେ ଇତିମଧ୍ୟରେ ୪୩ ଜଣଙ୍କ ମୃତ୍ୟୁ ଘଟିଥିବାବେଳେ ୩୦ଟି ମୃତ ଦେହକୁ ଚିହ୍ନଟ କରାଯାଇଛି। ମୃତକଙ୍କ ମଧ୍ୟରେ ରହିଛନ୍ତି ପେଶାରେ ଡ୍ରାଇଭର ଥିବା ମୁଶରଫ୍, ବିଦ୍ୟୁତ୍ ଉପକରଣ ଦୋକାନୀ ମହରୁଫ୍ ଅଲ୍ଲୀ, ପେଣ୍ଟର ମୁବାରକ ଅଲ୍ଲୀ, ଫ୍ୟାକ୍ଟ୍ରିରେ କାମ କରୁଥିବା ଆଲୋକ ତିଓ୍ବାରୀ, ଗତ ଫେବୃୟାରୀ ୧୧ରେ ବିବାହ କରିଥିବା ଇଲେକ୍ଟ୍ରିସିଆନ୍ ଅଶଫାକ୍ ହୁସେନ୍। ସେହିପରି ସିଭିଲ୍ ସର୍ଭିସ୍ ପାଇଁ ପ୍ରସ୍ତୁତ ହେଉଥିବା ରାହୁଲ ଠାକୁର, ଜୋତା ସିଲାଇ କରୁଥିବା ସୁଲେମାନ୍, ବିଲ୍ଡିଂ ୟୁନିଟ୍ରେ କାମ କରୁଥିବା ସଞ୍ଜିତ୍ ଠାକୁର, ଆଇବି କର୍ମଚାରୀ ଅଙ୍କିତ ଶର୍ମା ଭିଡ଼ ହିଂସାର ଶିକାର ହୋଇଥିଲେ। ଅକବରି, ପୋଲଟ୍ରି ଫାର୍ମରେ କାମ କରୁଥିବା ଅନଓ୍ବର, ଡ୍ରାଇଭର ଦିନେଶ କୁମାର, ଶ୍ରମିକ ମହମ୍ମଦ୍ ଇରଫାନ୍, ଆମିର, ହାସିମ୍, ବିନୋଦ କୁମାର, ବ୍ୟବସାୟୀ ବୀର ଭାନ୍, ଦିଲ୍ଲୀ ପୋଲିସ ହେଡ୍ କନ୍ଷ୍ଟେବଳ ରତନ ଲାଲ୍ଙ୍କୁ ମଧ୍ୟ ହତ୍ୟା କରାଯାଇଥିଲା। ଓ୍ବେଲ୍ଡର ଜାକିର୍, ବିଲ୍ଡିଂ ମେସିନ ପରିଚାଳକ ଇସ୍ତିୟାକ୍ ଖାଁ, ଫ୍ୟାକ୍ଟ୍ରିରେ କାମ କରୁଥିବା ଦୀପକ କୁମାର, ପାଠପଢୁଥିବା ରାହୁଳ ସୋଲାଙ୍କି, ଦୋକାନୀ ମହମ୍ମଦ୍ ଶାହବାଜ୍,ଗ୍ୟାରେଜ୍ରେ କାମ କରୁଥିବା ପରବେଜ୍ ଆଲମ୍ ପ୍ରମୁଖଙ୍କୁ ମଧ୍ୟ ଘରକୁ ଫେରିବା ବାଟରେ ହତ୍ୟା କରାଯାଇଥିଲା। ମହତାବ, ମହମ୍ମଦ୍ ଫୁରକାନ୍, ଅଟୋ ଚାଳକ ମୁଦସିର୍ ଖାଁ, ଅଟୋଚାଳକ ଶାହିଦ୍ ଅଲଓ୍ବି,ଅମନ୍, ବଢ଼େଇ କାମ କରୁଥିବା ମହମ୍ମଦ୍ ୟୁସୁଫ୍ ପ୍ରମୁଖ ଭିଡ଼ ହିଂସାର ଶିକାର ହୋଇଥିଲେ। ନିରୀହଙ୍କ ଜୀବନ ଯିବା ପରେ ଭିଡ଼ ହିଂସା ଥମିଛି। ତେବେ ମୃତକଙ୍କ ପରିବାରର ଜୀବିତ ସଦସ୍ୟଙ୍କ ପାଇଁ ଭିଡ ହିଂସାର ଦୁଃଖ ଜୀବନ ସାରା ଏକ ଅପୂରଣୀୟ କ୍ଷତି ସୃଷ୍ଟି କରିଛି।