ବାଲେଶ୍ୱର ଅଫିସ, ୭।୧୨-ବାଲେଶ୍ୱରସ୍ଥିତ ସଦ୍ଭାବନା ସଭାଗୃହରେ ଚଳିତ ରବି ୨୦୧୯-୨୦ ବର୍ଷ ପାଇଁ ଜିଲା କୃଷି କାର୍ଯ୍ୟକ୍ରମ ନିର୍ଦ୍ଧାରଣ କମିଟି ବୈଠକ ଶୁକ୍ରବାର ଅନୁଷ୍ଠିତ ହୋଇଛି। ଜିଲାପାଳ କେ.ସୁଦର୍ଶନ ଚକ୍ରବର୍ତ୍ତୀ ଅଧ୍ୟକ୍ଷତା କରି ଆସନ୍ତା ରବି ଋତୁ ପାଇଁ ବିଭିନ୍ନ ଫସଲ ଏବଂ ନିର୍ଦ୍ଧାରିତ କୃଷି କାର୍ଯ୍ୟକ୍ରମର ସଫଳ ରୂପାୟନ ସମ୍ପର୍କରେ ସମୀକ୍ଷା କରିଥିଲେ।
ଗତବର୍ଷର ବୈଠକ ବିବରଣୀକୁ ଅନୁମୋଦନ କରାଯିବା ପରେ ଯୁଗ୍ମ ଶସ୍ୟ ଅମଳ ରିପୋର୍ଟ ପ୍ରସ୍ତୁତ ଲାଗି ସାଟେଲାଇଟ ଦ୍ୱାରା ଜମିର ଚିହ୍ନଟ କରାଯାଇ ଯୋଜନା ଓ ସମନ୍ବୟ ବିଭାଗ, କୃଷି ବିଭାଗ ଓ ରାଜସ୍ବ ବିଭାଗର କର୍ମଚାରୀ ମିଳିତ ଭାବେ ସ୍ମାର୍ଟଫୋନରେ ଅପଡ଼େଟ୍ କରାଯାଉଥିବା ପ୍ରକାଶ କରାଯାଇଥିଲା। ସେହିପରି ଚଳିତ ଋତୁରେ ଜଳସେଚିତ ଓ ଅଣଜଳସେଚିତ ଜମି ଚିହ୍ନଟ କରିବା ପାଇଁ ମଧ୍ୟ ଅନୁରୂପ କାର୍ଯ୍ୟକ୍ରମ କରିବାକୁ ଜିଲାପାଳ ନିର୍ଦ୍ଦେଶ ଦେଇଥିଲେ।
ଚଳିତ ଅମଳରେ ବସ୍ତାରେ ସର୍ବାଧିକ ହେକ୍ଟର ପିଛା ୧୦୫ କୁଇଣ୍ଟାଲ ଧାନ ହୋଇଥିବା ଓ ଜିଲାର ଜଳସେଚିତ ଜମିରେ ହାରାହାରି ହେକ୍ଟର ପିଛା ୪୫ କୁଇଣ୍ଟାଲ ଧାନ ହୋଇଥିବା ପ୍ରକାଶ କରାଯାଇଛି। ବର୍ତ୍ତମାନ ସୁଦ୍ଧା ୪୦ରୁ ୪୫ ପ୍ରତିଶତ ଧାନକଟା ସରିଥିବା ଜଣାପଡ଼ିଛି। ଏଥର ଜୈବ ଖତ ବ୍ୟବହାର ଯୋଗୁ ଗତ ଋତୁ ତୁଳନାରେ ରାସାୟନିକ ସାର ବ୍ୟବହାର ବହୁ ପରିମାଣରେ କମିଥିବା ଆକଳନରୁ ଜଣାପଡ଼ିଛି। ରବି ଋତୁ ଲାଗି ଧାର୍ଯ୍ୟ କରାଯାଇଥିବା ଲକ୍ଷ୍ୟ ଏବଂ ବିଭିନ୍ନ କାର୍ଯ୍ୟକ୍ରମ ସମ୍ପର୍କରେ ଉପସ୍ଥିତ କୃଷି ଅଧିକାରୀମାନେ ସୂଚନା ଦେଇଥିଲେ। ନିର୍ଦ୍ଧାରିତ ଲକ୍ଷ୍ୟ ହାସଲ ନିମନ୍ତେ କୃଷି ଅଧିକାରୀମାନେ ଉଦ୍ୟମ କରିବା ସହିତ କୃଷକମାନଙ୍କ ସଚେତନତା ଉପରେ ଜିଲାପାଳ ଗୁରୁତ୍ୱାରୋପ କରିଥିଲେ। ଜିଲା ମୁଖ୍ୟ କୃଷି ଅଧିକାରୀ କୈଳାସ ଚନ୍ଦ୍ର ପରିଡ଼ା, ବିବିସିସି ବ୍ୟାଙ୍କର ଡିଜିଏମ ଜଳଧର ପଣ୍ଡା, ଏଲଡ଼ିଏମ ସୁଦୀପ ଡାକୁଆ, କୃଷି ବିଜ୍ଞାନ କେନ୍ଦ୍ରର ବରିଷ୍ଠ ବୈଜ୍ଞାନିକ ଡ. ସୁନୀଲ କୁମାର ମହାପାତ୍ର, ଜଳଚ୍ଛାୟା ପ୍ରକଳ୍ପ ନିର୍ଦ୍ଦେଶକ ବଂଶୀଧର ସାମଲ ପ୍ରମୁଖ ଉପସ୍ଥିତ ରହି ବିଭାଗୀୟ କାର୍ଯ୍ୟକ୍ରମ ଉପରେ ଆଲୋଚନା କରିଥିଲେ। ରବି ଋତୁରେ ଚାଷୀମାନଙ୍କୁ ଠିକ୍ ସମୟରେ ତଥା ସୁଲଭ ମୂଲ୍ୟରେ ସାର, କୀଟନାଶକ ଓ ବିହନ ଯୋଗାଣ, ଧାଡ଼ି ରୁଆ, ହିତାଧିକାରୀମାନଙ୍କୁ ଆର୍ଥିକ ସହାୟତା ଏବଂ ସବସିଡ଼ି ପ୍ରଦାନ, ପ୍ରଧାନମନ୍ତ୍ରୀ କୃଷି ସିଞ୍ଚାଇ ଯୋଜନାରେ ଜଳସେଚନର ସୁବିଧା କରାଇବା, ଜୈବ ସାରର ପ୍ରୟୋଗ, ସାରର ଉପଯୁକ୍ତ ବ୍ୟବହାର ଏବଂ ବିକ୍ରିର ସଠିକ୍ ପରିଚାଳନା, ପ୍ରଧାନମନ୍ତ୍ରୀ ଫସଲ ବୀମା ଯୋଜନା ସମ୍ପର୍କରେ ବୈଠକରେ ସବିଶେଷ ଆଲୋଚନା କରାଯାଇଥିଲା। ଚଳିତ ରବି ଋତୁରେ ଜିଲାର ୨୪ ହଜାର ହେକ୍ଟର ଜମିରେ ଧାନ ଚାଷ ଏବଂ ୮୯ହଜାର ୧୫୦ହେକ୍ଟର ଜମିରେ ଅଣଧାନ ଫସଲ ଯଥା ଗହମ, ମକା, ଡାଲି ଓ ତୈଳ ଜାତୀୟ, ଝୋଟ, ଆଖୁ, ମସଲା ଓ ପନିପରିବା ଆଦି ମୋଟ୍ ୧ଲକ୍ଷ ୧୩ହଜାର ୧୫୦ହେକ୍ଟର ଜମିରେ ଚାଷ କରିବା ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଛି। ବୈଠକରେ କୃଷି ଓ ଆନୁଷଙ୍ଗିକ ବିଭାଗର ଅଧିକାରୀମାନେ ଉପସ୍ଥିତ ରହି ବିଭିନ୍ନ କାର୍ଯ୍ୟକ୍ରମ ସମ୍ପର୍କରେ ଗୃହକୁ ଅବଗତ କରାଇଥିଲେ।