ଭୁୁବନେଶ୍ୱର,୨୪।୫(ବ୍ୟୁରୋ)-ସାଧାରଣ ନିର୍ବାଚନ ଫଳାଫଳକୁ ଭୁବନେଶ୍ୱରବାସୀ ପାର୍କ ଏବଂ ଟ୍ରାଫିକ୍ରେ ଦେଖିବାକୁ ପାଇଛନ୍ତି। ବିଜୁ ପଟ୍ଟନାୟକ ପାର୍କ ସହ ହକି ବିଶ୍ୱକପ୍ ସମୟରେ ସହରର ବିଭିନ୍ନ ଟ୍ରାଫିକ୍ରେ ଲାଗିଥିବା ଏଲ୍ଇଡି ସ୍କ୍ରିନ୍ରେ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ(ବିଡିଏ) ପକ୍ଷରୁ ଏହି ବ୍ୟବସ୍ଥା କରାଯାଇଥିଲା। ଏହାସହ ବିଜୁ ପଟ୍ଟନାୟକ ପାର୍କରେ ମଧ୍ୟ ୪୦୦ରୁ ଊର୍ଦ୍ଧ୍ୱ ଲୋକଙ୍କ ବସିବା ସହିତ ଅଧିକ ପାନୀୟ ଜଳର ବ୍ୟବସ୍ଥା ହୋଇଥିଲା। ତେବେ ଲୋକେ ବିଭିନ୍ନ ଟ୍ରାଫିକ୍ରେ ଛିଡ଼ା ହୋଇ ନିର୍ବାଚନ ଫଳାଫଳ ଦେଖିବାକୁ ଉତ୍ସାହିତ ଥିବାବେଳେ ଅଧିକାଂଶ ଟ୍ରାଫିକ୍ ସିଗ୍ନାଲରେ କିନ୍ତୁ ଏଲ୍ଇଡି ବନ୍ଦ ହୋଇ ପଡ଼ିରହିଥିଲା। ମୁଖ୍ୟତଃ କଳ୍ପନା ଓ ରୂପାଲି ଟ୍ରାଫିକ୍ରେ ଦିନର ଅଧିକାଂଶ ସମୟ ତାହା ବନ୍ଦ ପଡ଼ିଥିଲା। ସେହିପରି ଆଉ କେତେକ ଟ୍ରାଫିକ୍ରେ ମଧ୍ୟ ସମାନ ଅବସ୍ଥା ଥିଲା।
ବିଡିଏ ଆଇଟି ବିଭାଗର ଜଣେ ଅଧିକାରୀଙ୍କ କହିବାନୁଯାୟୀ, ପୂର୍ବରୁ ଏ ନେଇ ବିଭାଗୀୟ କର୍ତ୍ତୃପକ୍ଷମାନେ ସେମାନଙ୍କୁ କିଛି ଜଣାଇ ନ ଥିଲେ। ଗୋଟିଏ ଦିନ ପୂର୍ବରୁ ସେମାନଙ୍କୁ ଜଣାଇଲେ ସେମାନେ କ’ଣ କରିପାରିବେ। ହକି ବିଶ୍ୱକପ୍ ସମୟରେ ଯେଉଁ କେତୋଟି ଏଲ୍ଇଡି ଲଗାଯାଇଥିଲା, ସେଥିରେ ପ୍ରସାରଣ କରିବାକୁ ସ୍ଥିର କରାଯିବା ପରେ ସେମାନେ କର୍ମଚାରୀମାନଙ୍କୁ ସେଠାରେ ନିୟୋଜିତ କରି ଆବଶ୍ୟକ ଉପକରଣ ପଠାଇଥିଲେ। କିନ୍ତୁ ଅଧିକାଂଶ ସମୟରେ ଇଣ୍ଟରନେଟ୍ ସଂଯୋଗ ଠିକ୍ ନ ରହିବାରୁ ପ୍ରସାରଣରେ ବାଧା ସୃଷ୍ଟି ହେଲା। ହେଲେ ବିଜୁ ପଟ୍ଟନାୟକ ପାର୍କ ଓ ଲିଙ୍ଗରାଜ ମନ୍ଦିର ନିକଟରେ ଡିସ୍ ଆଣ୍ଟିନା ସହ ଏଲ୍ଇଡି ସଂଯୋଗ କରାଯାଇଥିବାରୁ ସେଠାରେ ଲୋକେ ବସି ଫଳାଫଳ ଦେଖିପାରିଲେ। ଏଲ୍ଇଡିରେ ଫଳାଫଳ ଦେଖୁଥିବା ଜଣେ ଦର୍ଶକ କମଲ ଚରଣ ଦାସ କହିଥିଲେ, ବିଡିଏ ପକ୍ଷରୁ କରାଯାଇଥିବା ଏହି ବ୍ୟବସ୍ଥା ଅତ୍ୟନ୍ତ ପ୍ରଶଂସନୀୟ। ଭୁବନେଶ୍ୱରରେ ବାସ କରୁଥିବା ଗରିବ ଶ୍ରେଣୀର ଲୋକଙ୍କ ଘରେ ଟେଲିଭିଜନ ନାହିଁ। ସେମାନେ ଏଠାରେ ବସି ନିର୍ବାଚନ ଫଳ ଦେଖିପାରୁଛନ୍ତି, ଯାହାକି ବହୁତ ଭଲ କଥା। ସେହିପରି ବିଜୁ ପଟ୍ଟନାୟକ ପାର୍କକୁ ସାନ୍ଧ୍ୟ ଭ୍ରମଣ ପାଇଁ ଆସିଥିବା କଳ୍ପନାର ଜନ୍ମେଜୟ ଦାସ କହିଥିଲେ, ପାର୍କକୁ ସାଧାରଣତଃ ଆମେ ଜଗିଂ ଓ ବ୍ୟାୟାମ କରିବାକୁ ଆସୁ। କିନ୍ତୁ ସେହି ସମୟ ମଧ୍ୟରେ ପାର୍କରେ ନିର୍ବାଚନ ଫଳ ଜାଣିବାକୁ ପାଇବା ଏକ ସ୍ବତନ୍ତ୍ର କଥା। ଏକା ସାଙ୍ଗରେ ୨ଟି କାମ ହୋଇଗଲା ଓ ମୋବାଇଲ ଫୋନ୍ରେ ଇଣ୍ଟରନେଟ ଆଉ ବ୍ୟାଟେରି ବି ବଞ୍ଚିଗଲା।
ସୂଚନାଯୋଗ୍ୟ, ବିଡିଏ ପକ୍ଷରୁ କଳ୍ପନା ଛକ, କଳିଙ୍ଗ ହସ୍ପିଟାଲ ଛକ, ରୂପାଲୀ ଛକ, ଲିଙ୍ଗରାଜ ମନ୍ଦିର ଆଦି ନିକଟରେ ସ୍ବତନ୍ତ୍ର ଭାବେ ୨୦ଫୁଟ୍ ଲମ୍ବ ଓ ୧୦ଫୁଟ୍ ଓସାରର ଏଲ୍ଇଡି ସ୍କ୍ରିନ୍ ଲଗାଯାଇଥିଲା। ଜନସାଧାରଣ ଗୋଟିଏ ସ୍ଥାନରେ ଉପସ୍ଥିତ ରହି କିପରି ନିର୍ବାଚନ ଫଳାଫଳ ଦେଖିପାରିବେ, ସେଥିପ୍ରତି ବିଡିଏ ଧ୍ୟାନ ଦେଇଥିଲା। ତେବେ କେତେକ ସ୍ଥାନରେ ଏଲ୍ଇଡି ପ୍ରସାରଣ ମଝିରେ ମଝିରେ ଅଟକି ଯାଉଥିଲା। ଏ ସବୁଥିରେ ଏକ ଜାତୀୟ ଗଣମାଧ୍ୟମ ଚ୍ୟାନେଲ ସହ ଦୁଇ ଓଡ଼ିଆ ନ୍ୟୁଜ୍ ଚ୍ୟାନେଲ ଲଗାଯାଇଥିଲା। ସକାଳ ୮ଟାରୁ ଫଳାଫଳ ବାହାରିବା ପର୍ଯ୍ୟନ୍ତ ପ୍ରସାରଣ ଜାରି ରହିଥିଲା।