ବ୍ରହ୍ମପୁର ଅଫିସ୍,୨୪ା୮-କ୍ୟାମ୍ପସ୍ରେ ବିଶୃଙ୍ଖଳା ଆଶଙ୍କାରେ ଚଳିତ ବର୍ଷ ଛାତ୍ର ସଂସଦ ନିର୍ବାଚନକୁ ଉଚ୍ଚ ଶିକ୍ଷା ବିଭାଗ ପକ୍ଷରୁ ବନ୍ଦକରି ଦିଆଯାଇଛି। ଏହାକୁ ଅନେକ ଛାତ୍ର ସଂଗଠନ ନିନ୍ଦା କରୁଥିବା ବେଳେ ଆଉ କେତେକ ସ୍ବାଗତ କରୁଛନ୍ତି। ବ୍ରହ୍ମପୁରରେ ମିଶ୍ର ପ୍ରତିକ୍ରିୟା ଦେଖିବାକୁ ମିଳିଛି । ପୂର୍ବାହ୍ନରେ ଅଲ୍ ଇଣ୍ଡିଆ ଡିଏସ୍ଓ ପକ୍ଷରୁ ସ୍ଥାନୀୟ କମାପଲ୍ଲୀ ଛକରେ ବିକ୍ଷୋଭ ପ୍ରଦର୍ଶନ କରାଯାଇଥିଲା । ଛାତ୍ର ସଂସଦ ନିର୍ବାଚନ ବାତିଲ ଘୋଷଣା ଗଣତନ୍ତ୍ରର ହତ୍ୟା ବୋଲି ସଂଗଠନ ପକ୍ଷରୁ ଅଭିଯୋଗ କରାଯାଇଛି । ଯଦି କ୍ୟାମ୍ପସ୍ରେ ହିଂସା ଦେଖାଦେଉଛି, ତେବେ ସରକାର ଏହା ବିରୋଧରେ ଦୃଢ଼ ପଦକ୍ଷେପ ନେଇ ଗଣତାନ୍ତ୍ରିକ ପରିବେଶ ସୃଷ୍ଟି କରିବା କଥା ।
କିନ୍ତୁ ବାତିଲ୍ କରିବା ଅପରଗତାର ପରିଚୟ। ନିର୍ବାଚନ ବଦଳରେ କର୍ତ୍ତୃପକ୍ଷଙ୍କ ଦ୍ୱାରା ମନୋନୀତ ପ୍ରକ୍ରିୟାରେ ଛାତ୍ର ପ୍ରତିନିଧି ଚୟନ ଦ୍ୱାରା ଶାସକ ଦଳ ସମର୍ଥିତ ପ୍ରାର୍ଥୀମାନେ ହିଁ ସୁଫଳ ପାଇବେ। ଅନ୍ୟପଟେ କର୍ତ୍ତୃପକ୍ଷ ନିଜ ଇଚ୍ଛା ମୁତାବକ କ୍ୟାମ୍ପସ୍ ଚଳାଇବେ । ଫଳରେ କ୍ୟାମ୍ପସ୍ର ମୂଳ ସମସ୍ୟାଗୁଡ଼ିକ ଦୂର ହୋଇପାରିବନି । ଯଦି ସରକାର ନିଜ ନିଷ୍ପତ୍ତିରେ ପରିବର୍ତ୍ତନ ନ କରନ୍ତି, ତେବେ ଆଗାମୀ ଦିନରେ ବଡ଼ ଧରଣର ଆନ୍ଦୋଳନ କରାଯିବ ବୋଲି ସଂଗଠନ ପକ୍ଷରୁ ଜିଲା ସଭାପତି ଶିବାନୀ ଶଙ୍କର ମିଶ୍ର, ସମ୍ପାଦକ ନିମାଇଁ ଚରଣ ସାହୁ, ନାରାୟଣ ସାହୁ, ଉଦ୍ଧବ ମହାଙ୍କୁଡ଼, ଡି.ତିରୁପତି ଦୋରା, ରଞ୍ଜନ ସେଠୀ, କିଶାନ୍ ସାହୁ ଓ ପପୁନ୍ ସାହୁ ପ୍ରମୁଖ ଭାଗ ନେଇଥିଲେ ।
ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ(ଏବିଭିପି) ପକ୍ଷରୁ ମଧ୍ୟ ନିର୍ବାଚନ ବାତିଲ୍ ନିଷ୍ପତ୍ତିକୁ ବିରୋଧ କରାଯାଇଛି। ସଂଗଠନର ଗଞ୍ଜାମ ବିଭାଗ ସଂଯୋଜକ ତୁତୁନ୍ ପାତ୍ର କହିଛନ୍ତି, ନିର୍ବାଚନ ବନ୍ଦ କରିଦେବା ପଛର ରହସ୍ୟ କ’ଣ ହେଇଥାଏ ପରେ, ତାହାକୁ ନେଇ ସନ୍ଦେହ ସୃଷ୍ଟି ହୋଇଛି। ଗତ ବିଧାନସଭା ନିର୍ବାଚନରେ ବିଜେଡ଼ି ୧୧୨ ଆସନ ଜିତିବା ପରେ ମଧ୍ୟ ସାଧାରଣ ଛାତ୍ରୀଛାତ୍ରଙ୍କୁ ଏତେ ଭୟ କାହିଁକି। ଉଚ୍ଚ ଶିକ୍ଷା ମନ୍ତ୍ରୀ ଅରୁଣ ସାହୁ ନିଜେ ଦିନେ ଉତ୍କଳ ବିଶ୍ୱବିଦ୍ୟାଳୟ ଛାତ୍ର ସଂସଦ ସଭାପତି ଥିଲେ। ସେ ନିଜେ ନିର୍ବାଚନ ବାତିଲ ନିଷ୍ପତ୍ତି ନେବା ବେଳେ ଟିକେ ମଧ୍ୟ ଚିନ୍ତା କଲେ ନାହିଁ। ଗତ କିଛି ଦିନ ହେବ ମନ୍ତ୍ରୀ ସାହୁ ଉତ୍କଳ ବିଶ୍ୱବିଦ୍ୟାଳୟର ନୂତନ ବିଦ୍ୟାର୍ଥୀଙ୍କ ସ୍ବାଗତ ଉତ୍ସବରେ ଯୋଗଦେବା, ଭିଡିଓ କନଫରେନ୍ସିଂ ମାଧ୍ୟମରେ ସମସ୍ତ ଅଧକ୍ଷମାନଙ୍କ ସହ କଥା ହେବା ସବୁ ନାଟକ ବାଜି ଥିଲା। ଆଜିର ଛାତ୍ର, ଆଗାମୀ ଦିନର ନାଗରିକ। ସେମାନଙ୍କୁ ଗଣତାନ୍ତ୍ରିକ ବ୍ୟବସ୍ଥା ସହ ପରିଚିତ କରିବା ବଦଳରେ ଅଗଣତାନ୍ତ୍ରିକ ଉପାୟରେ ନିର୍ବାଚନ ବନ୍ଦ କରିବା ନିନ୍ଦନୀୟ। ଏହାର ଜବାବ୍ ଆଗାମୀ ଦିନରେ ଛାତ୍ର ସମାଜ ଦେବ ବୋଲି ସେ କହିଛନ୍ତି । ସେହିଭଳି ପୂର୍ବତନ ଛାତ୍ର ନେତା ତଥା ଖଲ୍ଲିକୋଟ ସ୍ବୟଂଶାସିତ ମହାବିଦ୍ୟାଳୟ ଛାତ୍ର ସଂସଦ ପୂର୍ବତନ ସମ୍ପାଦକ, କଂଗ୍ରେସ ନେତା ପୀତବାସ ପଣ୍ଡା ଏହି ପ୍ରସଙ୍ଗକୁ ନେଇ ରାଜ୍ୟ ସରକାରଙ୍କୁ ସମାଲୋଚନା କରିଛନ୍ତି। ଛାତ୍ର ସଂସଦ ନିର୍ବାଚନରେ କଳା ଟଙ୍କା, ବାହୁବଳ, ଶାସନକଳ ଓ ରାଜନତିକ କ୍ଷମତାର ଅପବ୍ୟବହାର ହିଁ ହିଂସାର କାରଣ। ଏହାର ନିରାକରଣ ପରିବର୍ତ୍ତେ ନିର୍ବାଚନ ବନ୍ଦ କରିବା କିମ୍ବା ପଛ ଦୁଆର ଦେଇ ନିଜ ସମର୍ଥିତ ଛାତ୍ରୀଛାତ୍ରଙ୍କୁ ଥଇଥାନ କରିବା ପାଇଁ ରାଜ୍ୟ ସରକାରଙ୍କ ଷଡଯନ୍ତ୍ର ନିନ୍ଦନୀୟ। ବିଜୁ ଯୁବ ଜନତା ଦଳ ଜିଲା ସଭାପତି ଏନ୍. ଧନଞ୍ଜୟ ରାଓ ସରକାରଙ୍କ ଏହି ନିଷ୍ପତ୍ତିକୁ ସ୍ବାଗତ କରିଛନ୍ତି। ସେହିଭଳି ଖଲ୍ଲିକୋଟ ବିଶ୍ୱବିଦ୍ୟାଳୟର ପୂର୍ବତନ ସଭାପତି ସଚିନ କୁମାର ପଣ୍ଡା ମଧ୍ୟ ସରକାରଙ୍କ ନିଷ୍ପତ୍ତିକୁ ସ୍ବାଗତ କରିଛନ୍ତି ।
କ୍ୟାମ୍ପସ୍ରେ ଶିକ୍ଷାର ମାନ ବଢ଼ିବ।
ବିଶୃଙ୍ଖଳା ଦେଖାଦେବ ନାହିଁ।
୭୫ପ୍ରତିଶତ ଉପସ୍ଥାନକୁ ଗୁରୁତ୍ୱ ଦେଇ ଶିକ୍ଷାନୁଷ୍ଠାନର ଉନ୍ନତି ଉପରେ ଧ୍ୟାନ ଦେବା ଆବଶ୍ୟକ ବୋଲି ସେ କହିଛନ୍ତି ।