ମୋହାଲି,୧୮।୯(ପି.ଟି.)- ନିର୍ଭୀକ ଓ ବେପରୁଆ କ୍ରିକେଟ ମଧ୍ୟରେ ବହୁତ ତଫାତ୍ ରହିଛି ଓ ଏକଥା ଦଳର ଯୁବ ଖେଳାଳିମାନଙ୍କୁ ଅବଗତ କରାଯାଇଛି ବୋଲି ନବନିଯୁକ୍ତ ବ୍ୟାଟିଂ କୋଚ୍ ବିକ୍ରମ ରାଠୋର କହିଛନ୍ତି। ଯୁବ ଉଇକେଟକିପର ବ୍ୟାଟ୍ସମ୍ୟାନ ରିଷଭ ପନ୍ତଙ୍କୁ ଦୃଷ୍ଟିରେ ରଖି ସେ ଏହି କଥା କହିଛନ୍ତି। ଗତ କେତୋଟି ମ୍ୟାଚ୍ରେ ବେପରୁଆ ଶଟ୍ ଖେଳି ପନ୍ତ ଆଉଟ ହୋଇଥିଲେ ଓ ସେ ଏ ନେଇ ସମାଲୋଚନାର ଶିକାର ହୋଇଥିଲେ। ପନ୍ତ ଜଣେ ଅସାଧାରଣ ପ୍ରତିଭା ସମ୍ପନ୍ନ ଖେଳାଳି। ତେବେ ତାଙ୍କୁ ଶୃଙ୍ଖଳିତ ଓ ଯୋଜନାବଦ୍ଧ ଭାବେ ଖେଳିବା ଉପରେ ଗୁରୁତ୍ୱ ଦେବାକୁ ହେବ। ନିର୍ଭୀକ କ୍ରିକେଟରମାନେ ବେପରୁଆ ହେବା ଉଚିତ୍ ନୁହଁ। ଯେଉଁମାନେ ନିର୍ଭୀକ କ୍ରିକେଟ ଖେଳନ୍ତି ସେମାନେ ଉଚିତ୍ ଯୋଜନା ସହ କ୍ରିଚ୍କୁ ଓହ୍ଲାଇଥାନ୍ତି। ଯୁବ ଖେଳାଳିମାନେ ଏକଥାକୁ ଭଲ ଭାବେ ବୁଝିଛନ୍ତି ବୋଲି ରାଠୋର କହିିଛନ୍ତି।
ପୂର୍ବରୁ କୋହଲି ଯୁବ ଖେଳାଳିଙ୍କୁ ଅତିବେଶିରେ ୫ଟି ମ୍ୟାଚ୍ରେ ସୁଯୋଗ ଦିଆଯିବ ଓ ସେମାନେ ଏହାଠାରୁ ଅଧିକ ଆଶା କରିବା ଉଚିତ୍ ନୁହେଁ ବୋଲି କହିଥିଲେ। ତେବେ ଖେଳାଳିମାନେ ମିଳୁଥିବା ସୁଯୋଗର ସଦ୍ବ୍ୟବହାର କରନ୍ତୁ ବୋଲି କୋହଲି ଚାହୁଁଥିବା କଥା ରାଠୋର କହିଛନ୍ତି। ଦଳ ଯୁବ ଖେଳାଳିଙ୍କୁ ପୂରା ସମର୍ଥନ କରୁଛି ବୋଲି ସେ ସ୍ପଷ୍ଟ କରିଛନ୍ତି।
ପନ୍ତ ତାଙ୍କର ସବୁ ଶଟ୍ ଖେଳନ୍ତୁ। ତାଙ୍କ ଉପରେ ସମସ୍ତଙ୍କ ଅଧିକ ଆଶା ରହିଛି। ତେବେ ସେ ବେପରୁଆ ଭାବେ ଖେଳିବା ଅନାବଶ୍ୟକ। ମନୀଷ ପାଣ୍ଡେ ଓ ଆୟାର ମିଡଲ ଅର୍ଡରରେ ମିଳିଥିବା ସୁଯୋଗର ସଦ୍ବ୍ୟବହାର କରିବା ଉଚିତ୍। ପାଣ୍ଡେ ଓ ଆୟାର ପୂର୍ବରୁ ଘରୋଇ କ୍ରିକେଟରେ ଭଲ ଖେଳିଛନ୍ତି। ଏହି ସିରିଜରେ ଏହି ଦୁଇ ବ୍ୟାଟ୍ସମ୍ୟାନ ସଫଳ ହେବେ ବୋଲି ଆୟାର ଆଶା ପ୍ରକାଶ କରିଛନ୍ତି। ଟି୨୦ ବିଶ୍ୱକପ୍ ଆଉ ପାଖାପାଖି ବର୍ଷେ ଥିବାରୁ ସ୍ପିନ୍ ବୋଲିଂ ଅଲରାଉଣ୍ଡର କ୍ରୁନାଲ ପାଣ୍ଡ୍ୟା ଓ ଓ୍ବାଶିଂଟନ ସୁନ୍ଦର ଉପରେ ସମସ୍ତଙ୍କ ଆଶା ବଢିଛି। ଟି୨୦ ଦଳରେ ଆମ ପାଖରେ ବହୁ ଅଲରାଉଣ୍ଡର ରହିବା ଭଲ କଥା। ବିଶ୍ୱକପ୍ ପାଇଁ ଆମେ ପ୍ରସ୍ତତି ଚଳାଇଛୁ। ତେଣୁ ଆଗକୁ ଥିବା ୨୦-୨୧ଟି ମ୍ୟାଚ ଆମ ପାଇଁ ବିଶେଷ ଭାବେ ଗୁରୁତ୍ୱବହନ କରୁଛି ବୋଲି ରାଠୋର ସ୍ପଷ୍ଟ କରିଛନ୍ତି।