ନୂଆଦିଲ୍ଲୀ,୨।୨ : ନିର୍ଭୟା ଗଣବଳାତ୍କାର ଓ ହତ୍ୟା ମାମଲାର ୪ ଅଭିଯୁକ୍ତଙ୍କ ଫାଶୀ ଦଣ୍ଡାଦେଶ ଉପରେ ସ୍ଥଗିତାଦେଶକୁ ଚ୍ୟାଲେଞ୍ଜ କରି କେନ୍ଦ୍ର ସରକାରଙ୍କ ପକ୍ଷରୁ ଦିଲ୍ଲୀ ହାଇକୋର୍ଟରେ ରୁଜ୍ଜୁ କରାଯାଇଥିବା ମାମଲାର ରାୟକୁ ଅଦାଲତ ସଂରକ୍ଷିତ ରଖିଛନ୍ତି। କେନ୍ଦ୍ର ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ତୁଷାର ମେହେଟା ମାମଲା ଲଢୁଥିଲେ। ସେ ଯୁକ୍ତି ଦର୍ଶାଇଥିଲେ, ୪ ଜଣ ଦୋଷୀ ଦଣ୍ଡବିଧାନରେ ବିଳମ୍ବ କରାଇବାକୁ ଲଗାତାର ପ୍ରୟାସ କରିଆସୁଛନ୍ତି। ଦୋଷୀ ପୱନ ଗୁପ୍ତା ଏଯାଏ କ୍ୟୁରେଟିଭ ଆବେଦନ ଏବଂ କ୍ଷମା ଆବେଦନ ନ କରିବା ଏକ ଜାଣିଶୁଣି କରାଯାଉଥିବା ପ୍ରୟାସ। ରବିବାର ଦିଲ୍ଲୀ ହାଇକୋର୍ଟ ଏହି ମାମଲାର ଶୁଣାଣି ଦୀର୍ଘ ୩ ଘଣ୍ଟାରୁ ଅଧିକ ସମୟ ପର୍ଯ୍ୟନ୍ତ ହୋଇଥିଲା। ସୂଚନାଯୋଗ୍ୟ, ତିହାର ଜେଲରେ ଥିବା ନିର୍ଭୟା ମାମଲାର ଦୋଷୀ ମୁକେଶ କୁମାର ସିଂହ(୩୨), ପବନ ଗୁପ୍ତା (୨୫), ବିନୟ କୁମାର ଶର୍ମା (୨୬) ଏବଂ ଅକ୍ଷୟ କୁମାର (୩୧)କୁ ଫେବୃଆରୀ ୧ରେ ଫାଶୀ ଦେବା ପାଇଁ ର୍ନିଦ୍ଦାରିତ ହୋଇଥିଲା। ହେଲେ ଦିଲ୍ଲୀର ପଟିଆଲା କୋର୍ଟ ଫାଶୀ ତାରିଖ ଅନିଶ୍ଚିତକାଳ ପର୍ଯ୍ୟନ୍ତ ଟାଳି ଦେଇଛନ୍ତି। ଦୋଷୀ ପବନ, ବିନୟ ଏବଂ ଅକ୍ଷୟର ଓକିଲ ଏପି ସିଂହ ଆଇନର ସମସ୍ତ ଦିଗକୁ ବ୍ୟବହାର କରି ଦୋଷୀଙ୍କୁ ଫାଶୀରୁ ବର୍ତ୍ତିବାକୁ ଉଦ୍ୟମ କରୁଛନ୍ତି।
