ମୁମ୍ବାଇ,୨୩।୧: ବଲିଉଡ୍ର ‘ପଙ୍ଗା’ ଅଭିନେତ୍ରୀ କଙ୍ଗନା ରାନାଓ୍ବତ କିଛି କା କିଛି ବିବାଦୀୟ ବୟାନ ଦେଇ ସବୁବେଳେ ଚର୍ଚ୍ଚାରେ ରହିବାକୁ ପସନ୍ଦ କରିଥାଆନ୍ତି। ଏଥର ସେ ବହୁ ଚର୍ଚ୍ଚିତ ନିର୍ଭୟା ଗଣବଳାତ୍କାର ଉପରେ ସେମିତି ଏକ ବିବାଦୀୟ ବୟାନ ଦେଇଛନ୍ତି। କଙ୍ଗନା କହିଛନ୍ତି ବରିଷ୍ଠ ଆଇନଜୀବି ଇନ୍ଦିରା ଜୟସିଂ ୪ ଦିନ ଜେଲ ଭିତରେ ନିର୍ଭୟା ବଳାତ୍କାରୀଙ୍କ ସହ ରହିବା ଦରକାର। କଙ୍ଗନା ତାଙ୍କ ଅପ୍କମିଂ ଫିଲ୍ମ ‘ପଙ୍ଗା’ର ପ୍ରମୋଶନରେ ଏକ କାର୍ଯ୍ୟକ୍ରମରେ ଯୋଗଦେବା ଅବସରରେ ଏହା କହିଛନ୍ତି। ସେ ଆହୁରି ମଧ୍ୟ କହିଛନ୍ତି ଏଭଳି ମହିଳାଙ୍କ ଗର୍ଭରୁ କେବଳ ବଳାତ୍କାରୀ ହିଁ ଜନ୍ମ ନିଅନ୍ତି। ସୂଚନାଯୋଗ୍ୟ, ବରିଷ୍ଠ ଆଇନଜୀବି ଇନ୍ଦିରା ୨୦୧୨ର ବହୁ ଚର୍ଚ୍ଚିତ ନିର୍ଭୟା ଗଣବଳାତ୍କାରର ଦୋଷୀଙ୍କୁ କ୍ଷମା କରିଦେବାକୁ ନିର୍ଭୟାଙ୍କ ମା’ ଆଶା ଦେବୀଙ୍କୁ କହିଥିଲେ। ହେଲେ ଏହାକୁ ନେଇ ଆଶା ଦେବୀ ରାଗିଯିବା ସହ ଇନ୍ଦିରା ଏମିତି ସାହସ କିପରି କଲେ ବୋଲି ପ୍ରଶ୍ନ କରିଥିଲେ। ଏହାପରେ ତାଙ୍କ ସହ ଇନ୍ଦିରାଙ୍କର ବହୁବାର ସାକ୍ଷାତ୍ ହୋଇଥିବା ବେଳେ ସେ କେବେବି ନିର୍ଭୟାଙ୍କ ମାତାପିତାଙ୍କ ଅବସ୍ଥା ପଚାରି ନ ଥିବା ବେଳେ ଏବେ ଦୋଷୀଙ୍କୁ କ୍ଷମା କରିବାକୁ କେମିତି କହୁଛନ୍ତି ବୋଲି ଆଶା ପ୍ରଶ୍ନ ପଚାରିଥିଲେ।