ନୂଆଦିଲ୍ଲୀ,୨୩।୧: ନିର୍ଭୟା ଗଣ ବଳାତ୍କାରର ୪ ଦୋଷୀଙ୍କୁ ଫାଶୀ ଦେବାର ସମୟ ପାଖେଇ ଆସୁଥିବା ବେଳେ ଏହାକୁ ନେଇ ବିଭିନ୍ନ ପ୍ରକ୍ରିୟା ଆରମ୍ଭ କରାଯାଇଥିବା ଜଣାପଡିଛି। ଏମାନଙ୍କ ଶେଷ ଇଚ୍ଛା ସମ୍ପର୍କରେ ଜେଲ ପ୍ରଶାସନ ପକ୍ଷରୁ ନୋଟିସ ଜାରି କରାଯାଇ ପଚରା ଯାଇଥିବା ଜଣାପଡିଛି। ଶେଷ ସମୟରେ ଏମାନେ କାହାକୁ ଦେଖା କରିବାକୁ ଚାହୁଁଛନ୍ତି, ସେମାନଙ୍କ ନାଁରେ ଯଦି କିଛି ସମ୍ପତ୍ତି ରହିଛି ତାକୁ କାହା ନାମକୁ ଟ୍ରାନ୍ସଫର କରିବାକୁ ଚାହୁଁଛନ୍ତି, କିଛି ଧାର୍ମିକ ପୁସ୍ତକ ପଢିବାକୁ ଚାହୁଁଛନ୍ତି ଅବା କଣସି ଧର୍ମଗୁରୁଙ୍କୁ ଡାକିବାକୁ ଚାହୁଁଛନ୍ତି ଇତ୍ୟାଦି। ଯଦି ଏମାନେ ଚାହାଁନ୍ତି ତେବେ ଫେବୃୟାରୀ ୧ ପୂର୍ବରୁ ଏହାକୁ ପୂରଣ କରାଯିବ ବୋଲି ଜେଲ ପ୍ରଶାସନ କହିଥିବା ସୂଚନା ମିଳିଛି। ସୂଚନାଯୋଗ୍ୟ, ଫେବୃୟାରୀ ୧ ସକାଳ ୬ଟାରେ ଏମାନଙ୍କୁ ଫାଶୀ ଦେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଏବେ ଶୁଣିବାକୁ ମିଳିଛି କି ଫାଶୀ ଦେବା ଏକ ପ୍ରକାର ନିଶ୍ଚିତ ହୋଇଯିବା ପରେ ଉକ୍ତ ୪ ଦୋଷୀ ଖାଦ୍ୟ ଖାଇବା ଏକ ପ୍ରକାର ଛାଡି ଦେଇଛନ୍ତି।
