ବାଲିକୁଦା,୨ା୭(ସ୍ବ.ପ୍ର.): ବାଲିକୁଦା ବ୍ଲକର ସମୁଦ୍ର ଉପକୂଳବର୍ତ୍ତୀ ପଞ୍ଚାୟତ କୁଶୁପୁରରେ ଗ୍ରାମ୍ୟ ଉନ୍ନୟନ ବିଭାଗ ଅଧୀନ ରାସ୍ତା ବିପର୍ଯ୍ୟସ୍ତ ହୋଇପଡିଛି। କିଛିଦିନ ତଳେ ନିର୍ମାଣ ହୋଇଥିବା ଏକ ଢଳେଇ ରାସ୍ତା କାମରେ କିଭଳି ଭାବେ ଠିକାଦାରଙ୍କୁ ଅନୁକମ୍ପା ପ୍ରଦର୍ଶନ କରାଯାଇଛି, ତାହାର ଉଦାହରଣ ଏବେ ଦେଖିବାକୁ ମିଳିଛି। ନୂଆ କରି ନିର୍ମାଣ ହୋଇଥିବା ରାସ୍ତା ଭୁଶୁଡ଼ି ପଡ଼ିବା ସହ ୨ ଫୁଟର ଖାଲ ସୃଷ୍ଟି ହୋଇଛି। ଏଥିପାଇଁ ଲୋକେ ଦୁର୍ଦ୍ଦଶା ଭୋଗୁଛନ୍ତି। ପ୍ରକାଶ ଯେ, କୁଶୁପୁର ପଞ୍ଚାୟତର ଦଣ୍ଡାବେଦୀ-ନେନ୍ଧେରା ରାସ୍ତା ନିର୍ମାଣ ୧ ବର୍ଷ ହୋଇ ନ ଥିବାବେଳେ ପିଚୁ ସମ୍ପୂର୍ଣ୍ଣ ଉଠିଯାଇ ବଡ଼ ବଡ଼ ଖାଲ ସୃଷ୍ଟି ହୋଇଛି। ଆଶ୍ଚର୍ଯ୍ୟ କଥା ହେଲା, ଢଳେଇ ରାସ୍ତା ନିମ୍ନମାନର ହୋଇଥିଲେ ରାସ୍ତାରେ ଫାଟ ସୃଷ୍ଟି ହୁଏ। ମାତ୍ର ଏଠାରେ ରାସ୍ତା ଭୁଶୁଡ଼ି ପଡି ୨ଫୁଟ ଖାଲ ସୃଷ୍ଟି ହୋଇଛି। ଏଥିପାଇଁ ବିଭାଗ ପକ୍ଷରୁ କେତେକ ସ୍ଥାନରେ ମରାମତି କରାଯାଇଛି। ମାତ୍ର ଅବସ୍ଥାରେ ସୁଧାର ଆସୁନାହଁ। ଫଳରେ ନେନ୍ଧେରା, ଆଠଗରିଆ, ଦେକଣି ଆଦି ଗ୍ରାମର ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି। ଏହାବାଦ୍ ବାହାର ଅଞ୍ଚଳର ଧାନଚାଷୀ ଓ ମାଛଚାଷୀ ଏହି ରାସ୍ତା ଉପରେ ନିର୍ଭରଶୀଳ। ସ୍କୁଲ କଲେଜ ପିଲାମାନେ ମଧ୍ୟ ସାଇକେଲ ନେଇ ଗଲାବେଳେ ଦୁର୍ଘଟଣାର ସମ୍ମୁଖୀନ ହେଉଛନ୍ତି। ଜରୁରୀ ପରିସ୍ଥିତିରେ ଏହି ରାସ୍ତାରେ ଆମ୍ବୁଲନ୍ସ ଯାଇପାରୁନାହିଁ। ଫଳରେ ଅଞ୍ଚଳବାସୀ ଦୁର୍ଦ୍ଦଶା ଭୋଗୁଛନ୍ତି। ଏ ସମ୍ପର୍କରେ ବାଲିକୁଦା ଗ୍ରାମ୍ୟ ଉନ୍ନୟନ ବିଭାଜନ କାଯର୍ୟାଳୟର ଯନ୍ତ୍ରୀ ସୁବାସ ରାଉତଙ୍କୁ ପଚାରିବାରୁ ଉକ୍ତ ରାସ୍ତା ମୋ ସମୟରେ ନିର୍ମାଣ ହୋଇନାହିଁ। ତଥାପି ପ୍ରତିକାର ପାଇଁ ବିଭାଗୀୟ ଅଧିକାରୀଙ୍କ ଦୃଷ୍ଟି ଆକର୍ଷଣ କରାଯାଇ ତୁରନ୍ତ ମରାମତି କରାଯିବ ବୋଲି କହିଛନ୍ତି।