ନିର୍ଯାତୀତା ମହିଳାଙ୍କ ଭିଡିଓ ଭାଇରାଲ ନେଇ ପୋଲିସର ତନାଘନା
7:58 amAugust 7, 2019 / 21

ବାହାନଗା, ୭ା୮(ଡି.ଏନ.ଏ.)-ଜଣେ ବିବାହିତ ମହିଳା ନିଜ ଉପରେ ହୋଇଥିବା ନିର୍ଯାତନା ସମ୍ପର୍କିତ ଭିଡିଓ ସୋସିଆଲ ମିଡିଆରେ ଭାଇରାଲ କରିବା ପରେ ବାହାନଗା ବ୍ଲକ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି। ଏହି ଖବର ଖନ୍ତାପଡା ଥାନା ଅଧିକାରୀଙ୍କ ନିକଟରେ ପହଞ୍ଚିବା ପରେ ପୋଲିସ ତନାଘନା ଆରମ୍ଭ କରିଛି। ମଙ୍ଗଳବାର ରାତିରେ ପୋଲିସ ମହିଳାଙ୍କ ସ୍ବାମୀଙ୍କୁ ଖନ୍ତାପଡା ଥାନାକୁ ଆଣି ଅଟକ ରଖି ପଚରାଉଚୁରା କରୁଛି।
ସମ୍ପୃକ୍ତ ମହିଳାଙ୍କ ସ୍ବାମୀ ବିଭିନ୍ନ ଯାତ୍ରା ପାର୍ଟିରେ ନାଚ ମାଷ୍ଟ୍ରର ଭାବେ କାମ କରନ୍ତି ା ତେବେ ୫ ବର୍ଷ ତଳେ ସେ ସମ୍ବଲପୁର ଅଞ୍ଚଳର ଏକ ଯାତ୍ରା ପାର୍ଟିରେ କାମ କରୁଥିବା ବେଳେ ସେଠିକାର ଏକ ଝିଅକୁ ପ୍ରେମ ବିବାହ କରି ଘରକୁ ଆଣିଥିଲେ। ଏଠାରେ ସେମାନଙ୍କର ଏକ କନ୍ୟା ସନ୍ତାନ ହୋଇଥିଲା। କିଛି ବର୍ଷ ପରେ ଉଭୟଙ୍କ ମଧ୍ୟରେ ମନାନ୍ତର ଆରମ୍ଭ ହୋଇଥିଲା। ଉକ୍ତ ଯୁବକ ଅନ୍ୟ ଝିଅମାନଙ୍କ ସହିତ ପ୍ରେମ ସମ୍ପର୍କ ରଖିବାରୁ ତାଙ୍କ ସ୍ତ୍ରୀ ବିରୋଧ କରିଥିଲେ। ଏହି ଘଟଣାରେ ଯୁବକଜଣକ ତାଙ୍କ ସ୍ତ୍ରୀଙ୍କୁ ମାରପିଟ୍‌ କରିବା ସହ ତାଙ୍କ ଝିଅଙ୍କୁ ଖାଇବାକୁ ଦିଅନ୍ତି ନାହିଁ। ଏ ସଂକ୍ରାନ୍ତରେ ମହିଳାଜଣକ ଏକ ଭିଡିଓ କରି ତାଙ୍କୁ ରକ୍ଷା କରିବାକୁ ସୋସିଆଲ ମିଡିଆରେ ଅପଲୋଡ କରିଥିଲେ। ସେହି ଭିଡିଓ ଭାଇରାଲ ହେବା ପରେ ସ୍ଥାନୀୟ ଅଞ୍ଚଳରେ ଦିନତମାମ ଚର୍ଚ୍ଚା ହୋଇଥିଲା। ଖନ୍ତାପଡା ଥାନା ପୋଲିସର ନିର୍ଦ୍ଦେଶକ୍ରମେ ଗୋପାଳପୁର ଫାଣ୍ଡି ପୋଲିସ ବିଷ୍ଣୁପୁର ଗ୍ରାମକୁ ଯାଇ ଭିଡିଓ ଭାଇରାଲ କରିଥିବା ମହିଳାଙ୍କ ଘରେ ପହଞ୍ଚି ସବୁକଥା ପଚାରି ବୁଝିବା ପରେ ତାଙ୍କ ସ୍ବାମୀଙ୍କୁ ଆଣି ଖନ୍ତାପଡା ଥାନା ଜିମା ଦେଇଛନ୍ତି।