ବ୍ରହ୍ମପୁର ଅଫିସ,୨୬ା୯-ନୂଆ ଟ୍ରାଫିକ ନିୟମ ଲାଗୁ ହେବା ପରେ ଚାରିଆଡେ ଚେକିଂ କରାଯାଉଛି। ଅନ୍ୟପଟେ ରାଜପଥରେ ନିଶାସକ୍ତ ଗାଡି ଚାଳକଙ୍କୁ ସାବାଡ଼ କରିବା ପାଇଁ ପୋଲିସ ଧରପଗଡ ଜୋରଦାର ହେବା ପରେ ବହୁ ମଦ ଦୋକାନ ଏବେ ଖଁ। ଖଁ। ହୋଇପଡିଥିବା ଦେଖିବାକୁ ମିଳିଛି। କେବଳ ରାଜପଥ କଡ଼ କାହିଁକି ବ୍ରହ୍ମପୁର ସମେତ ଜିଲାର ବିଭିନ୍ନ ସ୍ଥାନରେ ଥିବା ମଦ ଦୋକାନ ଆଗ ଖାଲିପଡିଛି। ସଡକ ଦୁର୍ଘଟଣା ରୋକିବା ପାଇଁ ସରକାର କଠୋର ପଦକ୍ଷେପ ନେବା ଲାଗି ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ କେନ୍ଦ୍ର ସରକାର ମୋଟରଯାନ ଆଇନରେ ସଂଶୋଧନ ଆଣି ଗାଡି ଚାଳକଙ୍କ ଲାଗି ଯେଉଁ ଜରିମାନା ଏବଂ ଦଣ୍ଡ ବ୍ୟବସ୍ଥା କରିଛନ୍ତି ସେଥିରେ ଗାଡିଚାଳକମାନେ ଭୟଭୀତ ହୋଇପଡିଛନ୍ତି। ବିଶେଷକରି ସନ୍ଧ୍ୟା ହେଲେ ପୋଲିସ ନିଶାସକ୍ତ ଗାଡି ଚଳକଙ୍କ ଉପରେ କଡା ଆଭିମୁଖ୍ୟ ଗ୍ରହଣ କରୁଛି। ନିଶାଗ୍ରସ୍ତ ଅବସ୍ଥାରେ ଗାଡି ଚଳାଇ ବ୍ରେଥ୍ ଆନାଲାଜରରେ ଧରାପଡିଲେ ସେମାନଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରୁଛି। ସେମାନଙ୍କଠାରୁ ୧୫ ହଜାର ଟଙ୍କା ଜରିମାନା ଆଦାୟ କରାଯାଉଛି। ଜରିମାନା ନ ଦେଲେ ସେମାନଙ୍କ ନଁାରେ ମାମଲା ରୁଜୁ ହେଉଛି। ବାରମ୍ବାର ଧରାପଡିଲେ ଜରିମାନା ବଢିବା ସହିତ ଅଧିକ ଦଣ୍ଡ ବିଧାନ ଏବଂ ଡ୍ରାଇଭିଂ ଲାଇସେନ୍ସ ବାତିଲ ହେବାର ଯେଉଁ ଆଇନଗତ ପ୍ରାବଧାନ ରହିଛି ସେଥିରେ ଗାଡି ଚଳକମାନେ ମଦ ପିଇବାକୁ ଭୟ କରୁଛନ୍ତି। ସେହିପରି ଗତ ୨୧ ଦିନ ମଧ୍ୟରେ ଜିଲାରେ ସଡକ ଦୁର୍ଘଟଣା ସଂଖ୍ୟା ହ୍ରାସ ପାଇବା ସହିତ ଦୁର୍ଘଟଣା ଜନିତ ମୃତ୍ୟୁ ବି କମିଛି। ଏଥି ଯୋଗୁ ଚଳିତ ମାସର ବୁଧବାର ସୁଦ୍ଧା ବିଭିନ୍ନ ଅପରାଧ ସଂଖ୍ୟା ମଧ୍ୟ ହ୍ରାସ ପାଇଥିବା ଜଣାପଡିଛି।