ଖୋର୍ଦ୍ଧା ଅଫିସ,୧୮ା୭: କ୍ରାଇମବ୍ରାଞ୍ଚ ଏସ୍ଟିଏଫ୍ ଟାର୍ଗେଟରେ ଏବେ ନିଶା ମାଫିଆ। ବ୍ରାଉନ୍ସୁଗାର କାରବାରର ମାଷ୍ଟରମାଇଣ୍ଡ୍ ତଥା ଖୋର୍ଦ୍ଧା ପଥରଖଣି ଉପତ୍ୟକାରେ ରାଜ୍ କରୁଥିବା ସୁଧାଂଶୁ ପରିଡ଼ା ଓରଫ ଛୋଟା ଆତ୍ମସମର୍ପଣ କରି ଏବେ ଜେଲ୍ରେ ଅଛନ୍ତି। ତାଙ୍କର ୩ ସହଯୋଗୀଙ୍କୁ ଏସ୍ଟିଏଫ୍ ଗିରଫ କରିବା ସହ ୩୫ଲକ୍ଷ ଟଙ୍କାର ବ୍ରାଉନସୁଗାର, ଗୋଟିଏ ବନ୍ଧୁକ, ଦୁଇଟି ଗୁଳି ଓ ଗାଡ଼ି ଆଦି ଜବତ କରିଛି। ସହଯୋଗୀ ଧରାପଡ଼ିବା ପରେ ଛୋଟା ସାମ୍ରାଜ୍ୟକୁ ବଡ଼ ଶକ୍ତ ଧକ୍କା ଲାଗିଛି। ତେବେ ସହଯୋଗୀଙ୍କଠାରୁ ଏସ୍ଟିଏଫ୍ ନିଶା ସାମ୍ରାଜ୍ୟ ସମ୍ପର୍କରେ ବହୁକିଛି ତଥ୍ୟ ପାଇଛି। ଏସବୁ ଆଧାରରେ ଛୋଟା ଲିଙ୍କ୍ରେ ଥିବା ମହିଳା ଏଜେଣ୍ଟ ଓ ଅନ୍ୟ ସହଯୋଗୀଙ୍କୁ ଧରିବାକୁ ଉଦ୍ୟମ ଆରମ୍ଭ କରିଛି। ତେବେ ଏସ୍ଟିଏଫ୍ ପ୍ରସ୍ତୁତ କରିଥିବା ତାଲିକାରେ ରୁପା ଓ ମିନା ନାମ୍ନୀ ଦୁଇଜଣ ମହିଳା ଏଜେଣ୍ଟଙ୍କ ନାମ ଥିବାବେଳେ ହିଟ୍ ଲିଷ୍ଟ୍ରେ ସଞ୍ଜୁ, ପାକୁ ଓ କାକାଙ୍କ ନାଁ ରହିଛି। ଏମାନେ କିଏ ତାହାକୁ ନେଇ ଏବେ ଲୋକଙ୍କ ମଧ୍ୟରେ ନାନା ଚର୍ଚ୍ଚା ଚାଲିଛି। ତେବେ ଛୋଟାଙ୍କ ଡ୍ରାଇଭରଠାରୁ ଏସ୍ଟିଏଫ୍ ତଥ୍ୟ ଯୋଗାଡ କରି ରିମାଣ୍ଡରେ ନେବାକୁ ପ୍ରୟାସ କରୁଛି। ଏଭଳିସ୍ଥଳେ ଛୋଟା ଜାମିନରେ ଯିବେ ବୋଲି ଯେଉଁ କେତେଜଣ ରାଜନେତା ଉଦ୍ୟମ ଚଳାଇଥିଲେ ତାହା ଫସର ଫାଟିବାକୁ ବସିଛି।
ଭାଙ୍ଗିବ ଦୋକାନ ଓ ୩୨ ବଖରା ଅର୍ଦ୍ଧନିର୍ମିତ ଘର
ଖୋର୍ଦ୍ଧା ତହସିଲ ପାଚେରିକୁ ଲାଗି ଛୋଟା କରିଥିବା ଦୁଇଟି ଦୋକାନ ଭଙ୍ଗାଯିବ। ଗୁରୁଜଙ୍ଗ ଜବରଦସ୍ତପୁର ଦ୍ୱାରିକାନଗରର ଛୋଟାଙ୍କ ଘର ପଛ ପାଖରେ ଥିବା ୩୨ ବଖରା ଘର ଉଚ୍ଛେଦ ହେବ। ଗତ ୧୫ ତାରିଖରେ ଛୋଟାଙ୍କ ଆଡ୍ଡାସ୍ଥଳ ଦ୍ୱାରିକାନଗରସ୍ଥିତ କୋଟିଏ ଟଙ୍କାର ୧୪ ବଖରା ଘରକୁ ପ୍ରଶାସନ ମାଟିରେ ମିଶାଇ ଦେଇଥିଲେ ମଧ୍ୟ ୩୨ ବଖରା ଅର୍ଦ୍ଧ ନିର୍ମିତ ଘର ବାଦ୍ ପଡିଥିଲା। ଖୋର୍ଦ୍ଧା ଆରଆଇ କବିରାଜ ସେଠୀ କୁହନ୍ତି, ଅର୍ଦ୍ଧ ନିର୍ମିତ ଘର ସମ୍ପର୍କରେ ଜିଲାପାଳ ସୀତାଂଶୁ କୁମାର ରାଉତ ଉଚ୍ଛେଦ କରିବାକୁ ନିର୍ଦ୍ଦେଶ ଦେଇଛନ୍ତି। ବ୍ୟବସାୟିକ ପ୍ରତିଷ୍ଠାନ ମଧ୍ୟ ଭଙ୍ଗାଯିବାକୁ ନିର୍ଦ୍ଦେଶ ରହିଛି।