ଭଞ୍ଜନଗର,୧୧।୧୧(ଡି.ଏନ.ଏ)- ଗଞ୍ଜାମ ଜିଲା ବେଲଗୁଣ୍ଠା ନିକଟସ୍ଥ ବଜ୍ରଗଡ଼ ଗ୍ରାମବାସୀ ସୋମବାର ପୂର୍ବାହ୍ନରେ ଗ୍ରାମ ନିକଟସ୍ଥ ପାହାଡ଼ ତଳୁ ୩ଜଣ ଯୁବକଙ୍କୁ ଅଚେତ ଅବସ୍ଥାରେ ଉଦ୍ଧାର କରିଥିଲେ। ୧୦୮ ଆମ୍ବୁଲାନ୍ସ ଯୋଗେ ସେମାନଙ୍କୁ ଭଞ୍ଜନଗର ହସ୍ପିଟାଲକୁ ପଠାଯାଇଇଥିଲା। ସେଠାରେ ପ୍ରାଥମିକ ଚିକିତ୍ସା ପରେ ଚେତା ଫେରିଥିଲା। ସେମାନେ ହେଲେ ଗଣ୍ଡାଧାରର ଚନ୍ଦନ ନାୟକ ଓ ଚିକୁ ଗୌଡ଼ ଏବଂ କୁଶପଲ୍ଲୀର ବୁଲୁ ନାଇକ। ଅଟୋ ଚାଳକ ଚା’ରେ ନିଶାଦେଇ ସେମାନଙ୍କ ଠାରୁ ଟଙ୍କା, ମୋବାଇଲ ଫୋନ ସମେତ ଅନ୍ୟାନ୍ୟ ଜିନିଷ ଲୁଟି ନେଇଥିବା ସନ୍ଦେହ କରାଯାଉଛି। ଅଟୋ ଚାଳକଙ୍କୁ ପୋଲିସ ଠାବ କରିବା ପରେ ପ୍ରକୃତ ରହସ୍ୟ ଜଣାପଡ଼ିବ। ବେଲଗୁଣ୍ଠା ଫାଣ୍ଡି ପୋଲିସ ଘଟଣାର ଅଧିକ ତଦନ୍ତ ଚଳାଇଛି। ଅପରପକ୍ଷେ ୩ ଯୁବକଙ୍କ ଚେତା ଫେରିବାପରେ ସେମାନଙ୍କୁ ଅଧିକ ଚିକିତ୍ସା ପାଇଁ ବ୍ରହ୍ମପୁର ବଡ଼ ମେଡ଼ିକାଲକୁ ପଠାଇ ଦିଆଯାଇଛି।
ପ୍ରକାଶ ଯେ, ଚନ୍ଦନ ଓ ଚିକୁ ଭୁବନେଶ୍ୱରରେ କାମ କରନ୍ତି। ରବିବାର ରାତିରେ ସେମାନେ ବରମୁଣ୍ଡାରୁ ବସ୍ ଯୋଗେ ଭଞ୍ଜନଗର ଅଭିମୁଖେ ବାହାରିଥିଲେ। ସୁରଟରୁ ଆସିଥିବା ବୁଲୁ ମଧ୍ୟ ଉକ୍ତ ବସ୍ରେ ଭେଟ ହୋଇଥିଲେ। ୩ଜଣ ଯାକ ଜଗନ୍ନାଥପ୍ରସାଦ ନିକଟରେ ବସ୍ରୁ ଓହ୍ଲାଇବା କଥା। କୌଣସି କାରଣରୁ ଭଞ୍ଜନଗର ଅଭିମୁଖେ ଚାଲି ଆସିଥିଲେ। ଏହାପରେ ଭଞ୍ଜନଗର ବସ୍ଷ୍ଟାଣ୍ଡରେ ଜଣେ ଅଟୋ ଚାଳକଙ୍କ ସହ ୩ଜଣ କଥା ହୋଇଥିଲେ। ଅଟୋ ଚାଳକ ଓଡଗଁା ଯାଉଥିବାବେଳେ ବାଟରେ ଛାଡିଦେବେ ବୋଲି କହିଥିଲେ। ଏହାପରେ ୩ଜଣ ଉକ୍ତ ଅଟୋରେ ବସି ଜଗନ୍ନାଥପ୍ରସାଦ ଅଭିମୁଖେ ଆସିଥିଲେ। ବେଲଗୁଣ୍ଠାରେ ସେମାନେ ଚା’ ପିଇବାକୁ ଅଟକିଥିଲେ। ଚା’ ପିଇ ପୁଣି ଅଟୋରେ ବସିଥିଲେ। କିଛିସମୟ ପରେ ସେମାନେ ସଂଜ୍ଞାହୀନ ହୋଇପଡିଥିଲେ। ଏହାପରେ ଅଟୋ ଚାଳକ ସେମାନଙ୍କୁ ବଜ୍ରଗଡ଼ ପାହାଡ଼ ନିକଟରେ ଶୁଆଇଦେଇ ସେମାନଙ୍କଠାରୁ ୧୦ ହଜାରରୁ ଉର୍ଦ୍ଧ୍ୱ ଟଙ୍କା ସମେତ ଅନ୍ୟାନ୍ୟ ଜିନିଷ ନେଇ ଯାଇଥିବା କହିଛନ୍ତି। ସୋମବାର ପୂର୍ବାହ୍ନ ପ୍ରାୟ ୯ଟାରେ ବଜ୍ରଗଡ଼ର ଜଣେ ବ୍ୟକ୍ତି ପାହାଡ଼ ରାସ୍ତାରେ ଯାଉଥିବାବେଳେ ୩ଜଣ ପଡିଥିବା ଦେଖି ପୋଲିସକୁ ସୂଚନା ଦେଇଥିଲେ।