ବଡବିଲ, ୨୧।୮ (ସ୍ବ.ପ୍ର.)-କେନ୍ଦୁଝର ଜିଲା ବଡବିଲ ଥାନା ଅନ୍ତର୍ଗତ ଦଲକିବସ୍ତିର ଶତାଧିକ ମହିଳା ନିଶା ନିବାରଣ ଅଭିଯାନ ପାଇଁ ଅଣ୍ଟା ଭିଡିଛନ୍ତି। ମା’ ଠାକୁରାଣୀ ମହିଳା ସମିତି ନେତୃତ୍ୱରେ ମଙ୍ଗଳବାର ଅଞ୍ଚଳର ଅଧିକାଂଶ ମହିଳା ଦଲକି ଫୁଟବଲ ପଡିଆରେ ଏକତ୍ରିତ ହୋଇ ଏକ ଶୋଭାଯାତ୍ରାରେ ବାହାରିଥିଲେ। ଶୋଭାଯାତ୍ରାରେ ଗଳିକନ୍ଦି ବୁଲି ନିଶା ନିବାରଣ ଅଭିଯାନ ଆରମ୍ଭ କରିଛନ୍ତି ଏହି ମହିଳା ଗୋଷ୍ଠୀ। ଦଲକିବସ୍ତିରେ ଏକାଧିକ ବେଆଇନ ଦେଶୀ ମଦ ବିକ୍ରୟ କେନ୍ଦ୍ର ସହ ଠାକୁରାଣୀ ବଜାର ଭିତରେ ବେଆଇନ ଭାବେ ଜଣେ ବ୍ୟକ୍ତି ବିଦେଶୀମଦ ଚୋରାରେ ବିକ୍ରି କରୁଥିବା ମହିଳାମାନେ ଅଭିଯୋଗ କରିଛନ୍ତି। ଅବକାରୀ ବିଭାଗ କିମ୍ବା ପୋଲିସ ଏ ନେଇ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବାବେଳେ ମଦ୍ୟପାନ କରି ଦୈନିକ ଘରୋଇ କଳହ, ମାଡପିଟ୍ ଏପରିକି ଅନେକ ମୃତ୍ୟୁମୁଖରେ ମଧ୍ୟ ପଡୁଥିବା ସ୍ଥାନୀୟ ଅଭିଯୋଗ ହୋଇଛି। ଏଥିନେଇ ଦଲକିବସ୍ତିର ମହିଳାବୃନ୍ଦ ସଚେତନ ହୋଇଛନ୍ତି। ଏହାର ନେତୃତ୍ୱ ନେଇଛନ୍ତି ଜୟନ୍ତୀ ବାରିକ, ଯାଜ୍ଞସେନୀ ବେହେରା, ପଦ୍ମିନୀ ପାତ୍ର, ପ୍ରମିଳା ନାଏକ, କୁମୁଦିନୀ ନାଏକ ଏବଂ ଅନୀତା ବେହେରା। ମଙ୍ଗଳବାର ଏହି ମହିଳାମାନେ ଦଲକି ବସ୍ତି ଓ ଠାକୁରାଣୀ ଅଞ୍ଚଳରେ ଥିବା ବିଭିନ୍ନ ବେଆଇନ ଦେଶୀ ଓ ବିଦେଶୀ ମଦ ବିକ୍ରୟ କେନ୍ଦ୍ରକୁ ଯାଇ ବନ୍ଦ କରିବାକୁ ତାଗିଦ୍ କରିଛନ୍ତି। ଆଗାମୀ ଦିନରେ ମଦ ବିକ୍ରି କଲେ ନଷ୍ଟ କରିଦେବାକୁ ଧମକ ମଧ୍ୟ ଦେଇଥିବା ଜଣାପଡିଛି। ତେବେ ଅଞ୍ଚଳରେ ମଦ ଦୋକାନ ବନ୍ଦ ନ ହେବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ମହିଳା ଗୋଷ୍ଠୀ ଦୃଢୋକ୍ତି ପ୍ରକାଶ କରିଛନ୍ତି।