ନିଶ୍ଚିନ୍ତକୋଇଲି,୮।୫(ସ୍ବ.ପ୍ର.)- କଟକ ଜିଲା ନିଶ୍ଚିନ୍ତକୋଇଲି ବ୍ଳକ ୪୧ଟି ପଞ୍ଚାୟତ ମଧ୍ୟରୁ ମାତ୍ର ୨୦ଟି ପଞ୍ଚାୟତରେ ପ୍ରବାସୀ ଓଡିଆଙ୍କ ପାଇଁ ସଙ୍ଗରୋଧ କେନ୍ଦ୍ର ନିର୍ମାଣ କାର୍ଯ୍ୟ ଶେଷ ହୋଇଥିବା ଅନ୍ୟ ୨୧ଟି ପଞ୍ଚାୟତରେ କାର୍ଯ୍ୟ ଅଧାପାନ୍ତରିଆ ହୋଇପଡିଛି। ବ୍ଲକ ପ୍ରଶାସନର ବ୍ୟାପକ ଅବହେଳା ପାଇଁ ସଙ୍ଗରୋଧ ନିର୍ମାଣ କାର୍ଯ୍ୟ ମନ୍ଥର ଗତିରେ ଚାଲିଥିବା ଜଣାଯାଇଛି। ଅପରପକ୍ଷରେ ଗୁରୁବାର ଶେଷ ସୁଧା ୫୧ ଜଣ ପ୍ରବାସୀ ବିଭିନ୍ନ କ୍ୱାରାଣ୍ଟାଇନ ସେଣ୍ଟରରେ ପହଞ୍ଚିିଥିବା ଜଣାଯାଇଛି। ତେବେ ବହିରାଗତ ଗାଁ ମୁହାଁ ହୋଇଥିବା ବେଳେ ବ୍ଲକ ପ୍ରଶାସନର ଦୁରଦୃଷ୍ଟିର ଅଭାବ ହେତୁ କ୍ୱାରାଣ୍ଟାଇନ୍ କେନ୍ଦ୍ର ପ୍ରସ୍ତୁତି ହେବା ବ୍ଲକ ପ୍ରଶାସନର ପାରିବା ପଣିଆ ଉପରେ ପ୍ରଶ୍ନବାଚୀ ସୃଷ୍ଟି କରିଛି। ସମସ୍ତ ପଞ୍ଚାୟତରେ ନିର୍ମାଣ କାର୍ଯ୍ୟ ଶେଷ ହୋଇ ନ ଥିବାରୁ ବହିରାଗତକୁ ସଙ୍ଗରୋଧ କେନ୍ଦ୍ରରେ ରଖିବା ପାଇଁ ବିଭିନ୍ନ ସମସ୍ୟା ଉପୁଜିଛି। କେତେକ ପଞ୍ଚାୟତରେ ସଙ୍ଗରୋଧ କେନ୍ଦ୍ରଗୃହ ପ୍ରସ୍ତୁତ ହୋଇଥିବା ବେଳେ କେତେକ ସ୍ଥାନରେ ବେଡ ଓ ଆନୁସଙ୍ଗିକ ଜିନିଷପତ୍ର ପହଞ୍ଚିନାହିଁ। ଆଉ କେଉଁଠି ଗାଧୁଆ ଘର ଓ ଶୌଚାଳୟ ମଧ୍ୟ ପ୍ରସ୍ତୁତ ସରିନାହିଁ । କିଛି ପଞ୍ଚାୟତରେ ଆଲୋକିକରଣ କାର୍ଯ୍ୟ ମଧ୍ୟ ଅଧାପାନ୍ତରିଆ ହୋଇ ରହିଛି। ତେବେ କେତୋଟି ସଙ୍ଗରୋଧ କେନ୍ଦ୍ରକୁ ପ୍ରସ୍ତୁତି କରାଇ ଜିଲାପାଳଙ୍କ ଦୃଷ୍ଟିକୁ ଆଣି ବ୍ଲକ ପ୍ରଶାସନ ବାହାବାହା ନେଉଥିବା ବେଳେ ବାସ୍ତବ ଚିତ୍ର କିନ୍ତୁ ଭିନ୍ନ।
ଅପରପକ୍ଷରେ ୩ ତାରିଖ ସୁଦ୍ଧା ସମସ୍ତ କେନ୍ଦ୍ର ପ୍ରସ୍ତୁତି କରିବା ପାଇଁ ଜିଲାପାଳ ଭବାନୀ ଶଙ୍କର ଚଇନି ନିର୍ଦ୍ଦେଶ ଦେଇଥିଲେ। ୮ ତାରିଖ ସୁଧା ମଧ୍ୟ ବହୁ କେନ୍ଦ୍ର ଏବେ କାର୍ଯ୍ୟ ଚାଲିଛି। ତେବେ ନିକଟରେ ପଞ୍ଚାୟତରାଜ ମନ୍ତ୍ରୀ ପ୍ରତାପ ଜେନା ସମୀକ୍ଷା ବୈଠକରେ ତୁରନ୍ତ ସଙ୍ଗରୋଧ କେନ୍ଦ୍ରରେ ୪ ହଜାର ଶଯ୍ୟା ପକାଇବା ପାଇଁ ନିର୍ଦ୍ଦେଶ ଦେଇଥିବା ବେଳେ ଅଦ୍ୟାବଧି ୧୮ଶହ ଶଯ୍ୟାମଧ୍ୟ ପ୍ରସ୍ତୁତ ହୋଇନାହିଁ। ଅପରପକ୍ଷରେ ୪ ତାରିଖଠାରୁ ବିଭିନ୍ନ ପଞ୍ଚାୟତକୁ ବହିରାଗତଙ୍କ ଆଗମନ ହୋଇଛି। ତେବେ ବାହାରୁ ଆସିଥିବା ୫୧ ଜଣ ମୁଖ୍ୟତଃ ବାଙ୍ଗାଲୋର ଓ ହାଇଦ୍ରାବାଦ ଫେରନ୍ତା ବୋଲି ଜଣାପଡ଼ିଛି। ତେବେ ଏହି ବ୍ଲକର ବାବୁଜଙ୍ଗ ପଂଚାୟତର ୨ ଜଣ, ବନ୍ଧକାଟିଆ, ବରାଦୋ,ଦାଉଦପୁର, ଫୋଗଳ, ଜମରା, ଝାଡେଶ୍ୱରପୁର, କଳମିଶ୍ରି, କଟରପଡା, ମଣିଜଙ୍ଗ, ନଗସପୁର,ତରତସାଶନ, ଉତରକୂଳ ପଞ୍ଚାୟତକୁ ଜଣେ ଲେଖାଏ ଫେରିଥିବା ବେଳେ ଜୟରାମପୁର ପଞ୍ଚାୟତରେ ୪ ଜଣ, ଝାଡେଶ୍ୱର ପଂଚାୟତକୁ ୨ ଜଣ, ଜିଗ୍ନିପୁର ୪ ଜଣ,କଟିକଟା ୩ ଜଣ, ନରୋନ୍ଦ୍ରପୁର ୫ଜଣ, ନତକାଇ ୫ ଜଣ,ନେମାଳ୨ ଜଣ, ପାଳଦା ୪ ଜଣ,ରାମକୃଷ୍ଣପୁର ୫ ଜଣ ଓ ଶୁକରପଡା ୩ ଜଣ ପ୍ରବାସୀ ଫେରିଥିବା ବ୍ଳକ ପ୍ରଶାସନ ସୂଚନା ଦେଇଛନ୍ତି।