ଭୁବନେଶ୍ୱର, ୬ା୬(ବ୍ୟୁରୋ)- ଭୁବନେଶ୍ୱର ମହାନଗର ନିଗମ (ବିଏମ୍ସି) ଅଞ୍ଚଳରେ ବଢ଼ି ଚାଲିଛି ପଲିଥିନ ଓ ପ୍ଲାଷ୍ଟିକ ଆବର୍ଜନା। ପରିବେଶ ଓ ଜୀବଜଗତ ପ୍ରତି ବିପଦ ସୃଷ୍ଟି କରୁଥିବା ପଲିଥିନ ଓ ପ୍ଲାଷ୍ଟିକ ସାମଗ୍ରୀକୁ ନିଷେଧ କରାଯାଇଛି। ଗତବର୍ଷ ଗାନ୍ଧୀ ଜୟନ୍ତୀରୁ ପଲିଥିନ ନିଷେଧ ହୋଇଥିଲେ ବି ବେଧଡ଼କ ଭାବେ ଏହାର ବ୍ୟବହାର କରାଯାଉଛି। କଟକଣା ଲାଗୁ ହେବାର କିଛିଦିନ ପର୍ଯ୍ୟନ୍ତ ଚଢ଼ାଉ ଜୋର୍ଦାର କରାଯାଇ ସମସ୍ତେ ଚୁପ୍ ହୋଇଗଲେ। ଏପରିକି ନିୟମ ଉଲ୍ଲଂଘନକାରୀଙ୍କ ଉପରେ ମଧ୍ୟ କୌଣସି ପଦକ୍ଷେପ ଗ୍ରହଣ କରାଗଲା ନାହିଁ। ଏବେ ପୁଣି ବିଏମ୍ସି ହଠାତ୍ ତତ୍ପର ହୋଇ ଉଠିଛି। ପଲିଥିନ କଟକଣାକୁ ଏଣିକି ସ୍ଥାୟୀ ଭାବେ କାର୍ଯ୍ୟକାରୀ କରିବାକୁ ପ୍ରସ୍ତୁତ ହୋଇଛି ବିଏମ୍ସି। ଏଥିପାଇଁ ଦୁଇଟି ସ୍କ୍ବାଡ୍ ଗଠନ କରାଯାଇଥିବାବେଳେ ଶୁକ୍ରବାରଠାରୁ ଚଢ଼ାଉ ପାଇଁ ବିଏମ୍ସି ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଛି।
ମିଳିଥିବା ସୂଚନାନୁସାରରେ, ଉକ୍ତ ସ୍କ୍ବାଡ୍ରେ ବିଏମ୍ସି ସହ କମିଶନରେଟ ପୋଲିସ, ବନ ବିଭାଗ ଓ ପ୍ରଦୂଷଣ ନିୟନ୍ତ୍ରଣ ବୋର୍ଡର ଅଧିକାରୀମାନେ ସାମିଲ୍ ହୋଇଛନ୍ତି। ଦୁଇଜଣ ପୋଲିସ ସହଯୋଗରେ ପ୍ରତି ସ୍କ୍ବାଡ୍ ଚଢ଼ାଉ କରିବ। ତେବେ ଚଢାଉ ସମୟରେ ନିଷେଧ ପଲିଥିନ/ ପ୍ଲାଷ୍ଟିକ ସାମଗ୍ରୀ ଜବତ ସହ ଜରିମାନା ଆଦାୟ ଓ କାରଣ ଦର୍ଶାଅ ନୋଟିସ ଜାରି ଆଦି କ୍ଷମତା ସ୍କ୍ବାଡ୍ ଉପରେ ନ୍ୟସ୍ତ କରାଯାଇଛି। ଏଥିସହ ନିୟମକୁ କଡାକଡା ପାଳନ ଉପରେ ଗୁରୁତ୍ୱ ଦିଆଯିବ। ଏଥିପାଇଁ ପ୍ରସ୍ତୁତ କର୍ତ୍ତା, ବ୍ୟବହାରକାରୀ ଓ ସମସ୍ତଙ୍କୁ ଅବଗତ କରାଯିବ। ଗୁରୁବାର ସହରର ବିଭିନ୍ନ ସ୍ଥାନରେ ସ୍କ୍ବାଡ୍ ପକ୍ଷରୁ ପଲିଥିନ ନିଷେଧ ସଂକ୍ରାନ୍ତରେ ପ୍ରଚାର କରାଯାଇଥିଲା।