ଖଣ୍ଡପଡା,୨୬।୧୦(ସ୍ବ.ପ୍ର.): ଗତ ୩ଦିନ ଧରି ଲଘୁଚାପଜନିତ ଲଗାଣ ବର୍ଷା ଲାଗି ରହିଛି। ଏହାର ପ୍ରଭାବରେ ଖଣ୍ଡପଡା ବ୍ଲକ ଅନ୍ତର୍ଗତ କଣ୍ଟିଲୋ ନୀଳମାଧବ ବିଦ୍ୟାପୀଠ ପରିସରରେ ବର୍ଷାପାଣି ଜମି ରହି ଲହଡି ମାରୁଥିବା ପରିଲକ୍ଷିତ ହୋଇଛି। ବିଦ୍ୟାଳୟ ପୂର୍ବ ପାର୍ଶ୍ୱ ମାଳବନ୍ଧରେ ଥିବା ଏକ ସ୍ଲୁଇସ ଗେଟ ମଧ୍ୟ ଦେଇ ବର୍ଷା ପାଣି ନିଷ୍କାସନ ହେବାର ବ୍ୟବସ୍ଥା ରହିଥିବା ବେଳେ ଉକ୍ତ ପଥ ବନ୍ଦ ରହିଥିବାରୁ ବିଦ୍ୟାଳୟ ପ୍ରତି ସମସ୍ୟା ସୃଷ୍ଟିି କରିଛି ।
ମହାନଦୀ ଓ କମେଇ ନଦୀରେ ଜଳ ପତ୍ତନ ବୃଦ୍ଧି ଘଟିଲେ ଏହି ବନ୍ୟା ଜଳ ବିଦ୍ୟାଳୟ ପାର୍ଶ୍ୱରେ ଥିବା ପଲଟନ ପଡିଆ ଦେଇ ବିଦ୍ୟାଳୟ ମଧ୍ୟକୁ ପ୍ରବେଶ କରିଥାଏ। ନଦୀର ଜଳ ପତ୍ତନ କମିଲେ ପୁନର୍ବାର ଉଦ୍ବୃତ୍ତ ଜଳ ସେହି ବାଟଦେଇ ନିଷ୍କାସିତ ହୋଇଥାଏ। ଅପରପକ୍ଷେ ବର୍ଷା ଦିନେ ବିଦ୍ୟାଳୟ ପରିସରରେ ଜମି ରହିଥିବା ବର୍ଷା ଜଳ ଉକ୍ତ ସ୍ଲୁଇସ ଗେଟ ଦେଇ ନିଷ୍କାସିତ ହୋଇଥାଏ। ତେବେ ମାଳବନ୍ଧ ତଳେ ଥିବା ସ୍ଲୁଇସ ଗେଟଟି ବନ୍ଦ ହୋଇ ରହିଯାଇଥିବାରୁ ବିଦ୍ୟାଳୟ ପରିସରରେ ପାଣି ଜମି ରହିଛି। ପିଲାମାନେ ଉକ୍ତ ବର୍ଷାପାଣି ମଧ୍ୟରେ ପଶି ପାଠ ପଢିବାକୁ ଯାଉଛନ୍ତି। ତେବେ ବିଦ୍ୟାଳୟ କର୍ତ୍ତୃପକ୍ଷ ଚାହିଁଥିଲେ ଉକ୍ତ ସ୍ଲୁଇସ ଗେଟକୁ ସଫାକରି ପାଣି ନିଷ୍କାସନ କରିବାର ବ୍ୟବସ୍ଥା କରିପାରିଥାନ୍ତେ। ମାତ୍ର କର୍ତ୍ତୃପକ୍ଷଙ୍କ ଉଦାସୀନତା ଏ ଦିଗରେ ସମସ୍ୟା ସୃଷ୍ଟି କରିଛି । ଏ ସମ୍ପର୍କରେ କଣ୍ଟିଲୋ ଜଳସମ୍ପଦ ବିଭାଗ ସହକାରୀ ଯନ୍ତ୍ରୀ ଶଙ୍କର ଦଳେଇଙ୍କୁ ପଚାରିବାରେ ତୁରନ୍ତ ଏ ଦିଗରେ ବିହିତ ପଦକ୍ଷେପ ଗ୍ରହଣ କରିବେ ବୋଲି ସୂଚନା ଦେଇଛନ୍ତି। ଅପରପକ୍ଷେ ବର୍ଷା ଯୋଗୁ ଧାନ, ଆଖୁ ଓ ପନିପରିବା ଫସଲ ଉଜୁଡି ଯିବାର ଆଶଙ୍କା ପ୍ରକାଶ ପାଇଛି। ଖାଲୁଆ ଅଞ୍ଚଳରେ ବର୍ଷା ପାଣି ଜମି ରହିଛି। ଶୁକ୍ରବାର ସକାଳେ ପାଗ ଶୁଖିଲା ରହିଥିଲେ ହେଁ ମଧ୍ୟାହ୍ନରୁ ଅବିଶ୍ରାନ୍ତ ବର୍ଷା ଲାଗି ରହିଛି। ତୁହାକୁ ତୁହା ବର୍ଷା ସାଙ୍ଗକୁ ବିଦ୍ୟୁତ୍ କାଟ ଜନ ଜୀବନକୁ ବିଶେଷ ଭାବେ ପ୍ରଭାବିତ କରୁଥିବା ବେଳେ ତଳିଆ ଅଞ୍ଚଳରେ ବସବାସ କରୁଥିବା ଜନସାଧାରଣ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଅନେକ ବ୍ୟକ୍ତିଙ୍କ ଘରେ ବର୍ଷା ପାଣି ପଶି ଜମି ରହିଛି। ଅଧିକାଂଶ ସ୍ଥାନରେ ବର୍ଷା ଜଳ ନିଷ୍କାସନ ନିମନ୍ତେ ଆନୁଷଙ୍ଗିକ ବ୍ୟବସ୍ଥା ନ ଥିବାରୁ ପାଣି ଘେରରେ ଅନେକ ପରିବାର ଅତି ଦୟନୀୟ ଅବସ୍ଥାରେ ଦିନ କାଟୁଛନ୍ତି। ବିଶେଷ କରି କଚ୍ଚାଘରେ ରହୁଥିବା ଜନସାଧାରଣ ଅସୁବିଧାର ସମ୍ମୁଖୀନ ହେଉଛନ୍ତି। ବର୍ଷା ଯୋଗୁ ପନିପରିବା ଫସଲ ଉଜୁଡି ଯିବାର ଆଶଙ୍କା ପ୍ରକାଶ ପାଇଛି। ଏକର ଏକର ଧାନ ଜମିରେ ବର୍ଷା ପାଣି ଲହଡି ଭାଙ୍ଗୁଛି। ଚାଷୀମାନେ ମୁଣ୍ଡରେ ହାତଦେଇ ବସିଛନ୍ତି। ଖଣ୍ଡପଡା ଅଞ୍ଚଳ ଦେଇ ପ୍ରବାହିତ କୁସୁମୀ, କୁଆଁରିଆ, ଆମ୍ବନାଳ, ସୁନାମୁହିଁ, ଲୁଣିଝରା ଓ ଡ଼ାହୁକା ନଦୀରେ ଜଳପତନ ବୃଦ୍ଧି ପାଇଛି। ଖଣ୍ଡପଡା ସହର ସମେତ ଖଳିସାହି, ମର୍ଦ୍ଦରାଜପୁର, ବାହାଡା, ବନମାଳୀପୁର, ବେଣାଗାଡିଆ ଓ ଆଖପାଖ ଅଞ୍ଚଳରେ ନାଳପାଣି ମୁଖ୍ୟ ରାସ୍ତା ଉପରେ ପ୍ରବାହିତ ହେଉଛି। ବର୍ଷାର ପ୍ରଭାବରେ ଖଣ୍ଡପଡା- କଣ୍ଟିଲୋ, ଖଳିସାହି-ଆଡକଟା ଓ ଖଣ୍ଡପଡା-ଇଟାମାଟି ରାସ୍ତାର ଏକାଧିକ ସ୍ଥାନରେ ରାସ୍ତା ଧୋଇ ହୋଇଯାଇ ବିପଦସଙ୍କୁଳ ହୋଇପଡିଛି। ଖଣ୍ଡପଡା ବ୍ଳକ ଅଧୀନ ୨୨ଟି ପଞ୍ଚାୟତରେ ବର୍ଷା ଯୋଗୁ ବ୍ୟାପକ କ୍ଷୟକ୍ଷତି ହୋଇଛି। ଅନେକ ଝାଟିମାଟି ଚାଳ ଓ ଟାଇଲଛପର ଘର ମାଟିରେ ମିଶିଛି। ଲଗାଣ ବର୍ଷାରେ କ୍ଷତିଗ୍ରସ୍ତ ଚାଷୀଙ୍କୁ ଚିହ୍ନଟ କରି ଆନୁଷଙ୍ଗିକ ସରକାରୀ ସହାୟତା ଯୋଗାଇ ଦେବା ନିମନ୍ତେ ତହସିଲ ପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।