ମୁମ୍ବାଇ, ୧୮।୬- ଚଳିତ ମାସ ପ୍ରାରମ୍ଭରେ ଘୂର୍ଣ୍ଣିଝଡ଼ ‘ନିସର୍ଗ’ ଯୋଗୁ ମହାରାଷ୍ଟ୍ରରେ ବ୍ୟାପକ କ୍ଷୟକ୍ଷତି ହୋଇଥିଲା। ବିଶେଷ କରି ରାଇଗଡ଼ ଜିଲାର ସମୁଦ୍ର କୂଳିଆ ଅଞ୍ଚଳ ଆଲିବଗ ନିସର୍ଗ ଦ୍ୱାରା କ୍ଷତିଗ୍ରସ୍ତ ହୋଇଥିଲା। ବାତ୍ୟାରେ ଏହି ଅଞ୍ଚଳରେ ଯେଉଁ ଲୋକଙ୍କ ଘର ଭାଙ୍ଗିରୁଜି ଯାଇଥିଲା ସେମାନଙ୍କୁ ଉଦୀୟମାନ ଭାରତୀୟ ଯୁବ କ୍ରିକେଟର୍ ପୃଥ୍ବୀ ଶ ପୁନଃନିର୍ମାଣରେ ସହାୟତାର ହାତ ବଢ଼ାଇଛନ୍ତି। ୧୯ ବର୍ଷରୁ କମ୍ ବିଶ୍ୱକପ୍ ବିଜୟୀ ଭାରତୀୟ ଦଳର ଅଧିନାୟକ ସହାୟତାର ହାତ ବଢ଼ାଇ ଯେଉଁ ମାନବିକତାର ପରିଚୟ ଦେଇଛନ୍ତି ସେଥିଲାଗି ତାଙ୍କ ନିକଟକୁ ଚାରିଆଡ଼ୁ ପ୍ରଶଂସା ସୁଅ ଛୁଟିଛି। ଲକ୍ ଡାଉନ୍ କାରଣରୁ ୨୦ ବର୍ଷୀୟ ପୃଥ୍ବୀ ଗଲା ୨ ମାସ ହେବ ଆଲିବାଗ୍ରେ ଫଶି ଯାଇଥିଲେ। ରିପୋର୍ଟ ଅନୁଯାୟୀ ଶ’ ଆଲିବାଗ୍ର ଧୋକଓ୍ବାଡେ ଗ୍ରାମବାସୀଙ୍କୁ ଘର ନିର୍ମାଣ ଲାଗି କିଛି ଆର୍ଥିକ ସହାୟତା କରିଛନ୍ତି। କରୋନା ଭାଇରସ୍ ଲାଗି ହୋଇଥିବା ଲକ୍ ଡାଉନ୍ ପାଇଁ ପ୍ରଥମେ ଏହି ଅଞ୍ଚଳର ବାସିନ୍ଦା ଘୋର ସଙ୍କଟ ମଧ୍ୟରେ ଥିଲେ। ବର୍ତ୍ତମାନ ଘୂର୍ଣ୍ଣିଝଡ଼ ନିସର୍ଗ ଯୋଗୁ ଏହି ଅଞ୍ଚଳରେ ବହୁ କ୍ଷୟକ୍ଷତି ହୋଇଛି। ସମାଜ ପ୍ରତି ପ୍ରତିବଦ୍ଧତା ଏବଂ ପରିପକ୍ୱତା ଦେଖି ପୃଥ୍ବୀଙ୍କ ବାପା ଖୁସି ଜାହିର କରିଛନ୍ତି। ପ୍ରାରମ୍ଭିକ ସମୟରେ ପୃଥ୍ବୀ ବହୁତ କଠିନ ସମୟର ସମ୍ମୁଖୀନ ହୋଇଛନ୍ତି। ଯାହାକି ତାଙ୍କୁ ଅଭାବୀ ଲୋକଙ୍କ ଦୁଃଖକୁ ବୁଝିବାକୁ ସକ୍ଷମ କରିଛି ବୋଲି ସେ କହିଛନ୍ତି। ଚଳିତ ବର୍ଷ ଶେଷ ଭାଗରେ ଆଇପିଏଲ୍ ଆୟୋଜନ ହେବାର ସମ୍ଭାବନା ଥିବାରୁ ପୃଥ୍ବୀ ଭଲ ପ୍ରଦର୍ଶନ କରିବାକୁ ଲକ୍ଷ୍ୟ ରଖିଛନ୍ତି। ଆଇପିଏଲ୍ରେ ସେ ଦିଲ୍ଲୀ କ୍ୟାପିଟାଲ୍ସ ପକ୍ଷରୁ ପ୍ରତିନିଧିତ୍ୱ କରୁଛନ୍ତି। ଗତ ସିଜନରେ ୧୩୩ରୁ ଊର୍ଦ୍ଧ୍ୱ ଷ୍ଟ୍ରାଇକ ରେଟ୍ରେ ସେ ୩୫୩ ରନ୍ ସଂଗ୍ରହ କରିଥିଲେ।