ପୁରୀ ଅଫିସ,୧୬ା୪: ପ୍ରଥମ ପର୍ଯ୍ୟାୟ ଲକ୍ଡାଉନ ସମୟରେ ପୁରୀ କେୟାର୍ସ ଅଭିଯାନ ସଫଳତା ସହ ଲୋକମାନଙ୍କ ପାଖରେ ପହଞ୍ଚିପାରିଛି। କରୋନା ମୁକାବିଲା ପାଇଁ ହଠାତ୍ ଲକ୍ଡାଉନ ଘୋଷଣା ପରେ ଅଟକି ରହିଥିବା ରାଜ୍ୟ ଓ ରାଜ୍ୟ ବାହାର ଶ୍ରମିକ, ଷ୍ଟେଶନ ଓ ବସ୍ଷ୍ଟାଣ୍ଡରେ ରହିଥିବା ନିରାଶ୍ରୟ ବ୍ୟକ୍ତି, ମାନସିକ ବିକାରଗ୍ରସ୍ତ ଓ ଅଭାବୀ ମଣିଷଙ୍କୁ ସହାୟତା କରିବା ନିମନ୍ତେ ଜିଲାପାଳ ବଲୱନ୍ତ ସିଂ ଏହି ଅଭିଯାନ ଆରମ୍ଭ କରିଥିଲେ। ଏଭଳି ଅଭିଯୋଗର ଶୁଣାଣି ଓ ସମାଧାନ ପାଇଁ ଏକ ପୂର୍ଣ୍ଣକାଳୀନ ନିୟନ୍ତ୍ରଣ କକ୍ଷ ଖୋଲାଯାଇଥିଲା। ଅଭିଯୋଗ ମିଳିବା ମାତ୍ରକେ ସମ୍ପୃକ୍ତ ବିଭାଗୀୟ ଅଧିକାରୀଙ୍କୁ ଅବଗତ କରାଯାଇ ନିରାଶ୍ରୟଙ୍କ ନିମନ୍ତେ ଖାଇବା ଓ ରହିବା ବନ୍ଦୋବସ୍ତ ତୁରନ୍ତ କରାଯାଉଛି। ପ୍ରଥମ ପର୍ଯ୍ୟାୟ ଲକ୍ଡାଉନ ସମୟରେ ଗ୍ରାମାଞ୍ଚଳରେ ୩,୭୯୨ ଏବଂ ସହରାଞ୍ଚଳରେ ୨୮୬୯ ମୋଟ ୬୬୬୧ଜଣ ଶ୍ରମିକଙ୍କୁ ଖାଦ୍ୟସାମଗ୍ରୀ ଓ ରନ୍ଧାଖାଦ୍ୟ ବଣ୍ଟନ କରାଯାଇଛି। ସେହିପରି ଗ୍ରାମାଞ୍ଚଳରେ ୨୬୯୭ ଅସହାୟ ଏବଂ ସହରାଞ୍ଚଳରେ ୫୧୯ଏହିପରି ମୋଟ ୩୨୧୬ଜଣ ଅସହାୟକଙ୍କ ପାଖରେ ପୁରୀ କେୟାର୍ସ ପହଞ୍ଚିପାରିଛି। ପ୍ରଥମ ପର୍ଯ୍ୟାୟ ଲକ୍ଡାଉନ ସମୟରେ ନିୟନ୍ତ୍ରଣ କକ୍ଷରେ ୮,୫୬୨ଟି କଲ୍ ରିସିଭ କରାଯାଇଛି। ନିୟନ୍ତ୍ରଣ କକ୍ଷରେ କାର୍ଯ୍ୟ କରିବା ପାଇଁ ମୋଟ ୮ ସ୍ବେଚ୍ଛାସେବୀ ଏବଂ ସହରର ବିଭିନ୍ନ ସ୍ଥାନରେ ୩୫ଜଣ ସ୍ବେଚ୍ଛାସେବୀ ନିୟୋଜିତ ହୋଇଥିଲେ। ଏତଦ୍ବ୍ୟତୀତ ବିଭିନ୍ନ ବିଭାଗୀୟ ଅଧିକାରୀ ପ୍ରମୁଖ ସହଯୋଗ କରିଥିଲେ। ଏହି ସମୟରେ ୬୦ଜଣ ବରିଷ୍ଠ ନାଗରିକଙ୍କୁ ମଧ୍ୟ ସହାୟତା ପ୍ରଦାନ କରାଯାଇଥିଲା ବୋଲି ପ୍ରଶାସନ ପକ୍ଷରୁ ସୂଚନା ଦିଆଯାଇଛି।