ଦାନ୍ତ ସମସ୍ୟାରେ ପୀଡିତ ଥିବା ବ୍ୟକ୍ତିଙ୍କୁ ଷ୍ଟ୍ରୋକ୍ ହେବାର ଆଶଙ୍କା ଅଧିକ ଥାଏ ବୋଲି ନିକଟରେ କରାଯାଇଥିବା ଏକ ଗବେଷଣାରୁ ଜଣାପଡିଛି। ବିଶେଷଜ୍ଞମାନେ କହିଛନ୍ତି ଯେଉଁମାନେ ନିୟମିତ ଭାବେ ବ୍ରସ ନ କରନ୍ତି ସେମାନଙ୍କ ମସ୍ତିଷ୍କରେ ଥିବା ଧମନିରେ ବ୍ଲକେଜ୍ ସମସ୍ୟା ଦେଖାଦେଇଥାଏ। ଫଳରେ ଏମାନଙ୍କ ନିକଟରେ ଷ୍ଟ୍ରୋକ୍ ଆଶଙ୍କା ଅଧିକ ଥାଏ। ଅନ୍ୟପଟେ ଲାଳରେ ଥିବା ଏନଜାଇମ୍ ହାଇପୋଥାଲାମସ୍ ଉପରେ ପ୍ରଭାବ ପକାଉ ଥିବାରୁ ଏହା ଶରୀରରେ ବିଭିନ୍ନ ସମସ୍ୟା ସୃଷ୍ଟି କରିଥାଏ। ଆଉ ଯେଉଁମାନେ ନିୟମିତ ବ୍ରସ କରି ନ ଥାଆନ୍ତି ସେମାନଙ୍କ ନିକଟରେ ଏଭଳି ଷ୍ଟ୍ରୋକ୍ ସମସ୍ୟା ଦେଖାଯିବା ସାଧାରଣ କଥା। ବିଶେଷଜ୍ଞଙ୍କ ମତରେ ଦାନ୍ତରେ ସମସ୍ୟା ଥିଲେ ଏହା ବ୍ଲକେଜ ପ୍ରକ୍ରିୟାକୁ ବଢାଇ ଦେଇଥାଏ। କାରଣ ଏହା ରକ୍ତବାହୀ ନଳୀକୁ ଦୁର୍ବଳ କରିଦେଇଥାଏ। ନିକଟରେ ଲସ୍ ଆଞ୍ଜେଲସରେ ଆୟୋଜିତ ଆମେରିକାନ ଷ୍ଟ୍ରୋକ୍ ଆସୋସିଏଶନ୍ସ ଇଣ୍ଟରନ୍ୟାଶନାଲ ଷ୍ଟ୍ରୋକ୍ କନଫରେନ୍ସରେ ଏହା ଉପରେ ଆଲୋଚନା ହୋଇଛି। ଏଥିରେ ୟୁନିଭର୍ସିଟି ଅଫ୍ ସାଉଥ୍ କରୋଲିନା ସ୍କୁଲ ଅଫ୍ ମେଡିସିନର ଡା. ସୌଭିକ ସେନ କହିଛନ୍ତି, ଦାନ୍ତ ବା ମାଢିରେ ଦେଖାଯାଇଥିବା ସମସ୍ୟା ହେଉଛି ଏକ କ୍ରନିକ ବ୍ୟାକ୍ଟରିଆଲ ଇନଫେକସନ୍। ଯାହା ଷ୍ଟ୍ରୋକ୍ ସମସ୍ୟା ସୃଷ୍ଟି କରିବାରେ ସହାୟକ ହୋଇଥାଏ। ଆଉ ଏହାର ଏକ ଲକ୍ଷଣ ହେଉଛି ଦାନ୍ତରୁ ଅବା ମାଢିରୁ ରକ୍ତ ବାହାରିବା। ଏମିତି ହେଲେ ତୁରନ୍ତ ଡାକ୍ତରଙ୍କ ପରାମର୍ଶ ନେବା ଭଲ। ଏମିତିକି ନିୟମିତ ବ୍ରସ୍ ନ କରୁଥିବା ବ୍ୟକ୍ତିଙ୍କ ନିକଟରେ ଡାଇବେଟିସ୍, ହୃଦରୋଗ ଆଦି ଆଶଙ୍କା ଥାଏ ବୋଲି ବିଶେଷଜ୍ଞମାନେ ଅନୁମାନ କରିଛନ୍ତି।