ଢେଙ୍କାନାଳ ଅଫିସ, ୨୦।୫ ଢେଙ୍କାନାଳର ପ୍ରସିଦ୍ଧ ରଥଯାତ୍ରା ଲାଗି ରଥ ନିର୍ମାଣ ଆଗେଇ ଚାଲିଛି। ଲକ୍ଡାଉନ୍ ନିୟମକୁ ମାନି ରଥ ତିଆରି କରାଯାଉଛି। ମହାରଣା ସେବକ ଏବଂ କାରିଗରମାନେ ସାମାଜିକ ଦୂରତ୍ୱ ନିୟମ ଭିତରେ ମାସ୍କ ପିନ୍ଧି କାମ କରୁଛନ୍ତି।
ଜୁନ୍ ୨୩ ତାରିଖରେ ରଥଯାତ୍ରା। ଏଥିଲାଗି ଗତ ୧୫ ତାରିଖରୁ ରଥ ତିଆରି କାର୍ଯ୍ୟ ଆରମ୍ଭ ହୋଇଛି। ନିର୍ମାଣ କାର୍ଯ୍ୟରେ ନିୟୋଜିତ ବିଶ୍ୱକର୍ମା ଏବଂ କାରିଗରମାନେ ଶ୍ରୀବଳରାମ ମନ୍ଦିର ନିକଟସ୍ଥ ଝୁଲଣ ଘରେ ସାମାଜିକ ଦୂରତା ରକ୍ଷା କରି କ୍ୱାରାଣ୍ଟାଇନ୍ରେ ରହୁଛନ୍ତି। ଦୈନିକ ସେମାନଙ୍କ ପରୀକ୍ଷା କରାଯାଉଛି। ଦେବୋତ୍ତର ବିଭାଗ ପକ୍ଷରୁ ସେମାନଙ୍କ ଲାଗି ଖାଦ୍ୟପାନୀୟ ବ୍ୟବସ୍ଥା କରାଯାଇଛି। ରଥ ନିର୍ମାଣ ସରିବା ଯାଏ ସେମାନେ କ୍ୱାରାଣ୍ଟାଇନ୍ରେ ରହିବେ। ଏହି ସମୟ ମଧ୍ୟରେ କାହା ନିକଟରେ କରୋନା ଲକ୍ଷଣ ଦେଖାଦେଲେ ସ୍ବାବ୍ ସଂଗ୍ରହ କରି ପରୀକ୍ଷା ଲାଗି ପଠାଯିବ ବୋଲି ଜିଲାପାଳ ଭୂମେଶ ଚନ୍ଦ୍ର ବେହେରା ସୂଚନା ଦେଇଛନ୍ତି। ବିଶ୍ୱକର୍ମା ଅଶୋକ କୁମାର ମହାପାତ୍ରଙ୍କ ସହିତ ୪ଜଣ ମିସ୍ତ୍ରି, ୨ଜଣ ସହଯୋଗୀ ରଥ ନିର୍ମାଣରେ ନିୟୋଜିତ ଅଛନ୍ତି। ଆସନ୍ତା ୨୨ ତାରିଖରୁ ଆଉ ୪ଜଣ ମିସ୍ତ୍ରି ଏବଂ ୨ଜଣ ସହଯୋଗୀ ଏଥିରେ ଯୋଗଦେବେ ବୋଲି ଦେବୋତ୍ତର ବିଭାଗ ପକ୍ଷରୂ ସୂଚନା ଦିଆଯାଇଛି।
