ଫୁଲବାଣୀ ଅଫିସ, ୮|୫- ମହାମାରୀ କରୋନା ଭୂତାଣୁ ସଂକ୍ରମଣ ପ୍ରତିହତ କରିବା ପାଇଁ ରାଜ୍ୟ ସରକାର ବାହାର ରାଜ୍ୟରୁ ଫେରିଥିବା ଲୋକେ ପଞ୍ଜୀକରଣ କରିବା ଓ ୧୪ ଦିନ ପାଇଁ କ୍ୱାରାଣ୍ଟାଇନ୍ ସେଣ୍ଟରରେ ରହିବାକୁ ରାଜ୍ୟ ସରକାର ବାଧ୍ୟତାମୂଳକ କରିଛନ୍ତି। କ୍ୱାରାଣ୍ଟାଇନ୍ ସେଣ୍ଟରରେ କେହି ଅନାଧିକାର ପ୍ରବେଶ କଲେ ଆଇନ ଅନୁସାରେ ଦଣ୍ଡିତ ହେବେ ବୋଲି ନିର୍ଦ୍ଦେଶ ରହିଛି। ହେଲେ କନ୍ଧମାଳ ଜିଲାରେ ଏହାର ବ୍ୟତିକ୍ରମ ଦେଖିବାକୁ ମିଳିଛି। ଜଣେ ପ୍ରଶାସନିକ ଅଧିକାରୀଙ୍କ ସ୍ତ୍ରୀ ରାଜସ୍ଥାନର କୋଟାରୁ ଫେରିଥିବା ନିଜ ପୁଅଙ୍କୁ ଭେଟିବାକୁ ବିନା ଅନୁମତିରେ କ୍ୱାରାଣ୍ଟାଇନ୍ ସେଣ୍ଟରରେ ପ୍ରବେଶ କରିଛନ୍ତି। ସେଠାରେ ସେ ଟାଉନ ଥାନାଧିକାରୀ, ପୌର ପରିଷଦ ନିର୍ବାହୀ ଅଧିକାରୀଙ୍କୁ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି। ତେବେ ଚାପରେ ପଡ଼ି ତାଙ୍କ ନାମରେ କେହି ଏତଲା ଦେଇ ନ ଥିବା ଜଣାପଡିଛି। ଘଟଣାକୁ ଚାପି ଦେବାକୁ କୁଆଡ଼େ ନିର୍ଦ୍ଦେଶ ହୋଇଛି।
ଖଜୁରିପଡ଼ା ଅଞ୍ଚଳରେ କାର୍ଯ୍ୟରତ ପ୍ରଶାସନିକ ଅଧିକାରୀ ଜଣକ ବିନା ଅନୁମତିରେ କୋଟା ଯାଇ ପୁଅଙ୍କୁ ଆଣି ଘରେ ରଖିଥିଲେ। ସ୍ଥାନୀୟ ଲୋକେ ଏ ସମ୍ପର୍କରେ ଜିଲା ପ୍ରଶାସନକୁ ଖବର ଦେଇଥିଲେ। ମେଡିକାଲର ଏକ ଟିମ ସମ୍ପୃକ୍ତ ଅଧିକାରୀଙ୍କ ଘରକୁ ଯାଇ ତାଙ୍କ ପୁଅଙ୍କୁ ଆଣି ଫୁଲବାଣୀ ବିଜୁ କଲ୍ୟାଣ ମଣ୍ଡପରେ ହୋଇଥିବା କ୍ୱାରାଣ୍ଟାଇନ୍ ସେଣ୍ଟରରେ ରଖିଥିଲେ। ଅଧିକାରୀ ଜଣକ କାହା ଅନୁମତିରେ ଜିଲା ତଥା ରାଜ୍ୟ ବାହାରକୁ ଯାଇ ପୁଅଙ୍କୁ ଆଣିଛନ୍ତି ତାହା ତଦନ୍ତ ପରିସରଭୁକ୍ତ ରହିଥିବା ବେଳେ ତାଙ୍କ ସ୍ତ୍ରୀ ସରକାରଙ୍କ ସବୁ ନିୟମକୁ ଉଲ୍ଲଂଘନ କରିଛନ୍ତି। ସରକାରୀ ଗାଡ଼ିରେ ସେ କ୍ୱାରାଣ୍ଟାଇନ୍ ସେଣ୍ଟର ପରିସରକୁ ଆସିଥିଲେ। ସେଠାରେ କାର୍ଯ୍ୟରତ କର୍ମଚାରୀ ଏବଂ ଦାୟିତ୍ୱରେ ଥିବା ଅଧିକାରୀ ଭିତରକୁ ଯିବାକୁ ବାରଣ କରିବାରୁ ତାଙ୍କୁ ଗାଳିଗୁଲଜ କରିଥିଲେ। ଏପରିକି ଟାଉନ ଥାନାଅଧିକାରୀ ନରେଶ କୁମାର ସାହୁଙ୍କୁ ମଧ୍ୟ ଦୁର୍ବ୍ୟବହାର ପ୍ରଦର୍ଶନ କରି ଜୋର ଜବରଦସ୍ତ ସଙ୍ଗରୋଧ ଗୃହରେ ପଶି ପୁଅଙ୍କୁ ଭେଟିଥିଲେ। ସମ୍ପୃକ୍ତ ପ୍ରଶାସନିକ ଅଧିକାରୀ ଏବଂ ତାଙ୍କ ସ୍ତ୍ରୀଙ୍କ ଏତାଦୃତ କାର୍ଯ୍ୟକୁ ନେଇ ଜିଲା ବରିଷ୍ଠ ନାଗରିକ ମଞ୍ଚ ପକ୍ଷରୁ ଉଦ୍ବେଗ ପ୍ରକାଶ କରାଯାଇଛି। ଏ ନେଇ ପୌର ପରିଷଦ ନିର୍ବାହୀ ଅଧିକାରୀ ବଳଦେବ ବେହେରାଙ୍କୁ ପଚାରିବାରୁ ଘଟଣା ସମ୍ପର୍କରେ ଉପରିସ୍ଥ ଅଧିକାରୀଙ୍କୁ ଜଣାଇଛୁ ବୋଲି କହିଛନ୍ତି। ସେହିପରି ଅତିରିକ୍ତ ଜିଲାପାଳ ବସନ୍ତ କୁମାର ସାହୁଙ୍କୁ ପଚାରିବାରୁ ଏଭଳି କିଛି ଖବର ତାଙ୍କ ପାଖରେ ନାହିଁ ବୋଲି କହିଛନ୍ତି। ଅନ୍ୟପକ୍ଷରେ ଜିଲାପାଳ ଡା. ବୃନ୍ଦା ଡି. ଘଟଣା ସମ୍ପର୍କରେ ଶୁଣିଛି, ଏତଲା ହୋଇନାହିଁ। ଏତଲା ଦିଆଗଲେ ତଦନ୍ତ କରିବୁ ବୋଲି କହିଛନ୍ତି।