ଅନୁଗୋଳ ଅଫିସ, ୨୨।୧ – ଅନୁଗୋଳ ପୌରପାଳିକାର କେତେଜଣ କର୍ମଚାରୀ ଅନେକ ସମୟରେ ନିଜ ସିଟ୍ରେ ରହୁ ନ ଥିବା ବାରମ୍ବାର ଅଭିଯୋଗ ହୋଇଆସୁଛି। ବିଭିନ୍ନ କାର୍ଯ୍ୟ ନେଇ ଆସୁଥିବା ଜନସାଧାରଣ ବିଭାଗୀୟ କର୍ମଚାରୀଙ୍କୁ ନ ପାଇ ହଇରାଣ ହେଉଥିବା ବେଳେ କର୍ତ୍ତୃପକ୍ଷ ମଧ୍ୟ ତାଗିଦ ବ୍ୟତୀତ କୌଣସି ଦୃଢ଼ ପଦକ୍ଷେପ ନେଉ ନ ଥିବାରୁ ଅସନ୍ତୋଷ ବଢ଼ିବାରେ ଲାଗିଛି।
ନିୟମ ଅନୁଯାୟୀ ପ୍ରତ୍ୟେକ ସରକାରୀ କାର୍ଯ୍ୟାଳୟ ପୂର୍ବାହ୍ନ ୧୦ଟାରୁ ୫ଟା ୩୦ ପର୍ଯ୍ୟନ୍ତ ଖୋଲା ରହିବ। କର୍ମଚାରୀଙ୍କୁ ଖାଇବା ପାଇଁ ସାଢ଼େ ଗୋଟାଏରୁ ଦୁଇଟା ପର୍ଯ୍ୟନ୍ତ ସମୟ ରଖାଯାଇଛି। କିନ୍ତୁ ମଙ୍ଗଳବାର ଅପରାହ୍ନ ୨ଟାରୁ ୩ଟା ୩୯ ପର୍ଯ୍ୟନ୍ତ ପୌରପାଳିକା କାର୍ଯ୍ୟାଳୟରେ ନିର୍ବାହୀ ଅଧିକାରୀ ଓ କେତେଜଣ ହାତଗଣତି କର୍ମଚାରୀଙ୍କୁ ଛାଡ଼ିଦେଲେ ଅନ୍ୟମାନଙ୍କ ଭେଟ ମିଳିନଥିଲା। କେଉଁ ବିଭାଗରେ ତାଲା ଝୁଲୁଥିଲା ତ ଆଉ କେଉଁଠି ଲାଇଟ୍ ଜଳୁଥିବାବେଳେ ଚୌକି ଖାଲି ପଡ଼ିଥିବା ଦେଖିବାକୁ ମିଳିଥିଲା। ଏପରି କି ପୌରପାଳିକାରେ ଥିବା ଗୁରୁତ୍ୱପୂର୍ଣ୍ଣ ବିଭାଗ ପରିମଳ, ଆକାଉଣ୍ଟ, ଡାଏରୀ, ଷ୍ଟୋର, ବିଧି ବିଭାଗ ସହ ଅନ୍ୟ କେତେକ ବିଭାଗରେ ତାଲା ଝୁଲୁଥିଲା। ସେହିପରି କମ୍ପ୍ୟୁଟର ରୁମ୍ ଓ ଟ୍ୟାକ୍ସ ଆଦାୟ ବିଭାଗରେ ଲାଇଟ୍ ଜଳୁଥିଲେ ମଧ୍ୟ କୌଣସି କର୍ମଚାରୀ କି ଅଧିକାରୀଙ୍କୁ ଦେଖିବାକୁ ମିଳି ନ ଥିଲା। ଏ ନେଇ ପୌରପାଳିକାର କେତେଜଣ ଚତୁର୍ଥଶ୍ରେଣୀ କର୍ମଚାରୀ କହିଥିଲେ, ବାବୁମାନେ ଖାଇବାକୁ ଯାଇଛନ୍ତି। ବିଳମ୍ବରେ ଫେରିଥିବା କେତେକ ବାବୁ କହିଥିଲେ, ବିଳମ୍ବରେ ଖାଇବାକୁ ଯାଇଥିଲୁ, ତେଣୁ ବିଳମ୍ବରେ ଆସିଲୁ। ଆଜି ଟିକେ ଡେରି ହୋଇଗଲା। ନଚେତ୍ ଆମେମାନେ ଶୀଘ୍ର ଚାଲିଆସୁ।
