ପାଟନା,୨।୬: ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ମନ୍ତ୍ରିମଣ୍ଡଳର ସମ୍ପ୍ରସାରଣ ରବିବାର କରାଯିବ। ହେଲେ ଏଥିରେ କେହି ଭାଜପା ନେତା ସାମିଲ ହେବେ ନାହିଁ ବୋଲି ସୂଚନା ମିଳିଛି। କାରଣ ପୂର୍ବରୁ ଭାଜପା କୋଟାରେ ମନ୍ତ୍ରିପଦ ପୂରଣ ହୋଇ ସାରିଥିବା ବେଳେ ଏବେ କେବଳ ଜେଡିୟୁ କୋଟା ଖାଲି ଥିବାରୁ ଏଥିରେ ଭାଜପାର ସ୍ଥାନ ନାହିଁ ବୋଲି କୁହାଯାଉଛି। ଏହି ନୂଆ ମନ୍ତ୍ରୀମାନେ ରବିବାର ସକାଳ ୧୧ଟା ୩୦ରେ ରାଜଭବନରେ ଶପଥ ଗ୍ରହଣ କରିବାର କାର୍ଯ୍ୟକ୍ରମ ରହିଛି। ସୂଚନାଯୋଗ୍ୟ, ମନ୍ତ୍ରିମଣ୍ଡଳ ସମ୍ପ୍ରସାରଣକୁ ନେଇ ଶନିବାର ନୀତୀଶ ରାଜ୍ୟପାଳଙ୍କୁ ଭେଟି ଏ ସମ୍ପର୍କରେ ଆଲୋଚନା କରିଥିଲେ। ନିକଟରେ ଲୋକ ସଭା ଆସନରେ ଭାଜପାର ବିପୁଳ ବିଜୟ ଆଉ ଏବେ ନୀତୀଶଙ୍କ ମନ୍ତ୍ରିମଣ୍ଡଳ ସମ୍ପ୍ରସାରଣରେ କେହି ଭାଜପା ନେତା ନ ଥିବା ରାଜ୍ୟ ରାଜନୀତିକୁ ସରଗରମ କରିପାରେ ବୋଲି ଆଲୋଚନା ହେଉଛି।