ନୂଆଦିଲ୍ଲୀ,୨୩-୪: ହୀରା ବ୍ୟବସାୟୀ ନୀରବ ମୋଦି ଓ ମେହୁଲ ଚୋକ୍ସୀଙ୍କ ବିଦେଶ ପଳାୟନ ପରେ ଭାରତୀୟ ରୁପା ଗହଣା ବଜାର ବେଶ୍ ପ୍ରଭାବିତ ହୋଇଛି। ଦେଶର ରୁପା ଗହଣା ରପ୍ତାନି ୨୦୧୮-୧୯ ଆର୍ଥିକ ବର୍ଷରେ ପ୍ରାୟ ୭୫% କମିଛି। ପଞ୍ଜାବ ନ୍ୟାଶନାଲ ବ୍ୟାଙ୍କରୁ ପ୍ରାୟ ସାଢ଼େ ୧୩ ହଜାର କୋଟି ଟଙ୍କାର ଋଣ ଜାଲିଆତି କରି ନୀରବ ମୋଦି ଓ ମେହୁଲ ଚୋକ୍ସୀ ଗତବର୍ଷ ଆରମ୍ଭରେ ବିଦେଶ ଫେରାର ହୋଇଯାଇଥିଲେ। ପଳାୟନ ଯୋଗୁ ସେମାନଙ୍କର ବ୍ୟବସାୟ ସମ୍ପୂର୍ଣ୍ଣ ବନ୍ଦ ହୋଇଯାଇଥିଲା। ପରିଣାମସ୍ବରୂପ, ୨୦୧୭-୧୮ ଆର୍ଥିକ ବର୍ଷରେ ଦେଶର ରୁପା ଗହଣା ରପ୍ତାନି ୩.୪ ବିଲିୟନ ଡଲାର ଥିବା ବେଳେ ଗତ ଆର୍ଥିକ ବର୍ଷରେ ଏହା ହ୍ରାସ ପାଇ ମାତ୍ର ୮୩୮ ମିଲିୟନ ଡଲାରରେ ପହଞ୍ଚତ୍ଛି ବୋଲି ଜେମ୍ସ ଆଣ୍ଡ ଜୁଏଲାରୀ ଏକ୍ସପୋର୍ଟ ପ୍ରମୋଶନ କାଉନସିଲ ଦ୍ୱାରା ଜାରି ତଥ୍ୟରୁ ଜଣାପଡିଛି। କାଉନସିଲରର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, ମାମୁ-ଭଣଜା ଫେରାର ହେବା ପରେ ଦେଶର ରୁପା ଗହଣା ରପ୍ତାନି ବେଶ ପ୍ରଭାବିତ ହୋଇଛି। କାରଣ ସେମାନେ ଦର୍ଶାଉଥିବା ରପ୍ତାନି ତଥ୍ୟ କେବଳ କାଗଜକଲମରେ ବୋଲି ଜଣାପଡିଛି। କାରଣ ସେମାନେ କୌଣସି କମ୍ପାନୀ ମାଧ୍ୟମରେ ରପ୍ତାନି କରିଥିବାର ଦର୍ଶାଇ ନାହାନ୍ତି। ସରକାରୀ ଅଧିକାରୀଙ୍କ କହିବାନୁଯାୟୀ, ସୁରଟର ସ୍ପେଶାଲ ଇକୋନୋମିକ ଜୋନ୍ ଉପରେ ଗହଣା ରପ୍ତାନିର ସବୁଠାରୁ ବେଶି ପ୍ରଭାବ ଦେଖିବାକୁ ମିଳିଛି। ତେବେ ଏ ସମ୍ପର୍କରେ ସବିଶେଷ ତଥ୍ୟ ମିଳିପାରିନାହିଁ। ନୀରବ ଓ ମେହୁଲ କେବଳ କାଗଜ କଲମରେ ହିଁ ସେମାନଙ୍କର ଗହଣା ରପ୍ତାନି ଦର୍ଶାଉଥିଲେ ବୋଲି ମନେ କରାଯାଉଛି। କାରଣ ଅନ୍ୟ କୌଣସି କ୍ଷେତ୍ରରେ ଏଭଳି ବ୍ୟତିକ୍ରମ ଦେଖାଯାଇନାହିଁ। ୨.୫ ବିଲିୟନ ଡଲାରରୁ ଅଧିକ ରୁପା ଗହଣା ରପ୍ତାନି ହ୍ରାସ ପାଇଛି। ଏହି କାରଣରୁ ଜେମ୍ସ ଆଣ୍ଡ ଜୁଏଲାରୀ ରପ୍ତାନି ୩% କମିବାର ମୁଖ୍ୟ କାରଣ ବୋଲି କୁହାଯାଉଛି। ତେବେ କାଉନସିଲର ଭାଇସ ପ୍ରେସିଡେଣ୍ଟ କୋଲିନ ଶାହଙ୍କ ମତରେ ଜିଏସ୍ଟି ରିଫଣ୍ଡ ପାଇବାରେ ବିଳମ୍ବ ଏବଂ ନଗଦ ସଙ୍କଟ ଯୋଗୁ ରପ୍ତାନି ହ୍ରାସ ପାଇଛି। ସୂଚନାଯୋଗ୍ୟ, ଦେଶର ରପ୍ତାନିର ସିଂହଭାଗ ଅଧିକାର କରିଥାଏ ରୁପା ଗହଣା କାରବାର। ଗତବର୍ଷ ସୁନ ପଦକ ଓ ମୁଦ୍ରା ରପ୍ତାନି ୫୫% ହ୍ରାସ ପାଇଥିଲା।