ନୂଆଦିଲ୍ଲୀ,୨୭-୭: ହୀରା ବ୍ୟବସାୟୀ ନୀରବ ମୋଦିଙ୍କ ଦ୍ୱାରା ଦେଶର ସର୍ବବୃହତ ବ୍ୟାଙ୍କିଙ୍ଗ୍ ଦୁର୍ନୀତି ହେବା ପରେ ପଞ୍ଜାବ ନ୍ୟାଶନାଲ ବ୍ୟାଙ୍କ(ପିଏନ୍ବି) ପ୍ରଥମଥର ଲାଭର ମୁହଁ ଦେଖିଛି। ବ୍ୟାଙ୍କ ଜୁନ୍ରେ ଶେଷ ହୋଇଥିବା ତ୍ରୈମାସରେ ୧୦୧୯ କୋଟି ଟଙ୍କା ଶୁଦ୍ଧ ଲାଭ କରିଛି। ବର୍ଷକ ପୂର୍ବରୁ ଏହି ଅବଧିରେ ବ୍ୟାଙ୍କ ୯୪୦ କୋଟି ଟଙ୍କା କ୍ଷତି ସହିଥିଲା। ଦୁର୍ନୀତି ଧରାପଡିବା ପରେ ବ୍ୟାଙ୍କ କେବଳ ଦୁଇଥର ଲାଭ କରିଥିଲା। ଏଥିପୂର୍ବରୁ ଗତ ଆର୍ଥିକ ବର୍ଷର ଅକ୍ଟୋବର-ଡିସେମ୍ବର ତ୍ରୈମାସରେ ବ୍ୟାଙ୍କ ୨୪୬.୫୧ କୋଟି ଟଙ୍କା ଲାଭ କରିଥିଲା। ମାର୍ଚ୍ଚ ୨୦୧୯ରେ ଶେଷ ହୋଇଥିବା ଚତୁର୍ଥ ତ୍ରୈମାସରେ ବ୍ୟାଙ୍କ ୪୭୪୯.୬୪ କୋଟି ଟଙ୍କା ଶୁଦ୍ଧ କ୍ଷତି ସହିଥିଲା। ୨୦୧୯-୨୦ର ଜୁନ୍ ତ୍ରୈମାସରେ ବ୍ୟାଙ୍କ ମୋଟ୍ ଆୟ ବୃଦ୍ଧି ପାଇ ୧୫,୧୬୧.୭୪ କୋଟି ଟଙ୍କା ରହିଥିଲା। ଗତବର୍ଷ ଏହି ସମୟରେ ଏହା ୧୫,୦୭୨.୪୧ କୋଟି ଟଙ୍କା ଥିଲା। ସମ୍ପତ୍ତି ଦୃଷ୍ଟିରୁ ବ୍ୟାଙ୍କକୁ ଆଶ୍ୱସ୍ତି ମିଳିଛି। ବ୍ୟାଙ୍କର ମୋଟ ଏନ୍ପିଏ ଜୁନ୍ ୨୦୧୯ରେ ମୋଟ ଋଣ ତୁଳନାରେ ହ୍ରାସ ପାଇ ୧୬.୪୯ ପ୍ରତିଶତ ରହିଛି। ଗତବର୍ଷ ଜୁନ୍ରେ ଏହା ୧୮.୨୬ ପ୍ରତିଶତ ଥିଲା। ନୀରବ ମୋଦି ମାମଲା ଜଣାପଡିବା ପରେ ବ୍ୟାଙ୍କ ୨୦୧୭-୧୮ ମାର୍ଚ୍ଚ ତ୍ରୈମାସରେ ୧୩,୪୧୭ କୋଟି ଟଙ୍କାର ଶୁଦ୍ଧ କ୍ଷତି ସହିଥିଲା। ତେବେ ସମୟକ୍ରମେ ଏହା ନିଜର କ୍ଷତି କମାଇ ଏବେ ଲାଭ କରିପାରିଛି।