ଖଣ୍ଡପଡ଼ା,୧୫।୧୦(ସ୍ବ.ପ୍ର.)-ସୋମବାରଠାରୁ ନୟାଗଡ ଜିଲା ଖଣ୍ଡପଡ଼ା ଅଞ୍ଚଳର ବିଭିନ୍ନ ଦେବଦେବୀ ମନ୍ଦିର ସମେତ ଜଗନ୍ନାଥ ସଂସ୍କୃତିର ଆଦି ପୀଠ କଣ୍ଟିଲୋ ନୀଳମାଧବ ଜୀଉଙ୍କ ମନ୍ଦିରରେ କାର୍ତ୍ତିକ ବ୍ରତ ନୀତି ଆରମ୍ଭ ହୋଇଛି । ଏଥିପାଇଁ ପ୍ରତ୍ୟହ ସକାଳୁ ଶ୍ରୀ ଜୀଉଙ୍କ ମନ୍ଦିରରେ ଶ୍ରଦ୍ଧାଳୁ ଓ ହବିଷିଆଳିଙ୍କ ଭିଡ଼ ଲାଗି ରହିଥିବା ଦେଖିବାକୁ ମିଳିଛି । କାର୍ତ୍ତିକ ମାସ ପାଇଁ ଠାକୁରଙ୍କ ସ୍ବତନ୍ତ୍ର ନୀତି ହେଉଛି । ଏହି ଅବସରରେ ଶ୍ରୀ ନୀଳମାଧବ ଜୀଉଙ୍କ ଦାମୋଦର ବେଶ ଅନୁଷ୍ଠିତ ହେଉଛି । କାର୍ତ୍ତିକ ବ୍ରତ ସହିତ ଠାକୁରଙ୍କ ଏହି ବେଶ ୧ମାସ ପର୍ଯ୍ୟନ୍ତ କରାଯିବ । ଶ୍ରୀ ଜୀଉଙ୍କ ଅବକାଶ ନୀତି ପରେ ଶ୍ରୀଜୀଉ ଦାମୋଦର ବେଶ ହୋଇଥାନ୍ତି ା ବେଶ ପରେ ମନ୍ଦିର ରୋଷ ହୋମ,ସୂର୍ଯ୍ୟ ପୂଜା,ଦ୍ୱାରପାଳ ପୂଜା ପରେ ସକାଳ ଧୂପ ଓ ଅନ୍ୟାନ୍ୟ ପାରମ୍ପରିକ ନୀତି ଅନୁଷ୍ଠିତ ହେଉଛି । ହବିଷିଆଳିମାନେ ମାସ ସାରା କାର୍ତ୍ତିକ ବ୍ରତ ପାଳନ କରୁଥିବାରୁ ପ୍ରତିଦିନ ସେମାନେ ନୀଳମାଧବ ଜୀଉ ଓ ବିଭିନ୍ନ ଶୈବ ପୀଠରେ ପୂଜାର୍ଚ୍ଚନା କରୁଥିବା ଲକ୍ଷ୍ୟ କରାଯାଉଛି ।