ଜଗତସିଂହପୁର ଅଫିସ/ବିରିଡି(ଡି.ଏନ୍.ଏ.), ୨୦।୯: ନୀହାରିକାଙ୍କୁ ମୋ’ ପୁଅ ବହୁତ ଭଲପାଉଥିଲା। ତାକୁ ସେ କଦାପି ମାରିପାରିବ ନାହିଁ। ସେ ନିର୍ଦ୍ଦୋଷ। ଘଟଣାରେ ମୋ’ ପୁଅର ସମ୍ପୃକ୍ତି ନାହିଁ। ତାକୁ ଫସାଇ ଦିଆଯାଇଛି। ନର୍ସ ନୀହାରିକା ପାତ୍ର ହତ୍ୟା ମାମଲା ନେଇ ପ୍ରେମିକ ତଥା ହାଜିପୁରର କିଶୋର ଚନ୍ଦ୍ର ଆଞ୍ଚଲ(ରାଜା)ଙ୍କ ମା’ ଶନିବାର ଏଭଳି ପ୍ରତିକ୍ରିୟା ଦେଇଛନ୍ତି।
ସେ କହିଛନ୍ତି, ମୋ ପୁଅ ରାଜା ନିର୍ଦ୍ଦୋଷ। ସେ ନୀହାରିକାଙ୍କୁ ଏତେ ଭଲ ପାଉଥିଲା ଯେ କଦାପି ମାରି ପାରିବନି। ରାଜା ସହ ବିବାହ ପାଇଁ ନୀହାରିକାଙ୍କ ମା’ ରାଜି ନ ଥିଲେ। କିନ୍ତୁ ମୁଁ ତାଙ୍କୁ ବୁଝାଇଥିଲି। ଏହାପରେ ଡିସେମ୍ବରରେ ଉଭୟଙ୍କ ବିବାହ ଲାଗି ସ୍ଥିର ହୋଇଥିଲା। ସେ କେଉଁଆଡେ ପଳାଇଥିଲା। ଶୁକ୍ରବାର ଆସିଲା। ଆସିବା ପରେ ତାକୁ ଆତ୍ମସମର୍ପଣ ପାଇଁ ନେଇଥିଲି। ହେଲେ ଅଧାବାଟରୁ ପୋଲିସ ତାକୁ ଗାଡ଼ିରେ ବସାଇ ନେଇଗଲା। ମୋ ସ୍ବାମୀ ଏବଂ ପୁଅକୁ ଫେରାଇ ଦିଆଯାଉ। ଚଳିବି କେମିତି ବୋଲି ସେ କହିଛନ୍ତି।
ସୂଚନାଯୋଗ୍ୟ, ବିରିଡ଼ି ଥାନା ଅଧୀନ ବିଲୁଆଖାଇ ନଦୀପଠାରୁ ନୀହାରିକାଙ୍କ ମୃତଦେହ ଏକ ଅଖାରୁ ହାତଗୋଡ଼ ବନ୍ଧା ଅବସ୍ଥାରେ ଉଦ୍ଧାର କରାଯାଇଥିଲା। ଏହାପରଠାରୁ ତାଙ୍କୁ ହତ୍ୟା କରି ସେଠାରେ ଫିଙ୍ଗି ଦିଆଯାଇଥିବା ସନ୍ଦେହ କରାଯାଉଛି। ତେବେ ଉକ୍ତ ଦିନଠାରୁ ପ୍ରେମିକ ମଧ୍ୟ ଫେରାର ଥିବାରୁ ସେ ହତ୍ୟାକାଣ୍ଡରେ ସମ୍ପୃକ୍ତ ଥାଇପାରନ୍ତି ବୋଲି ପୋଲିସ ସନ୍ଦେହ କରୁଥିଲା। ଅପରପକ୍ଷେ ଅଭିଯୁକ୍ତ କିଶୋର ନିଜେ ଶୁକ୍ରବାର ପୋଲିସ ନିକଟରେ ଆତ୍ମସମର୍ପଣ କରିଛନ୍ତି। ତାଙ୍କୁ ପୋଲିସ କଟକର କୌଣସି ଅଜ୍ଞାତ ସ୍ଥାନରେ ରଖି ପଚରାଉଚରା ଜାରି ରଖିଛି।