ବିଭିନ୍ନ ପ୍ରକାରର ଆକାର ଓ ସ୍ବାଦର କେକ୍ ଦେଖିଥିବେ ଓ ଖାଇଥିବେ ବି। ହେଲେ ଇଣ୍ଡୋନେସିଆର ବେକେରି ଟଟ୍ ଅ’ ଯେଉଁ କେକ୍ ତିଆରି କରୁଛି ତାହା ଏବେ ଚର୍ଚ୍ଚାର ବିଷୟ ପାଲଟିଛି। ଏହି କେକ୍ ଦେଖିବାକୁ ଯେମିତି ସ୍ବାଦିଷ୍ଟ ଖାଇବାକୁ ବି ସେମିତି। ହେଲେ ଏହାକୁ ଖାଇଲେ ଆପଣଙ୍କ ପାଟି ମିଠା ହେବ ନାହିଁ। କିନ୍ତୁ ଏକ ନିଆରା ସ୍ବାଦ ପାଇବେ। କାରଣ ଏହା ଇନ୍ଷ୍ଟାଣ୍ଟ ନୁଡଲ୍ରେ ତିଆରି। ତିନି ଥାକ ବିଶିଷ୍ଟ ଏହି କେକ୍ରେ ସୁଇଟ୍ ସ୍ପଞ୍ଜ, ସୁଇଟ୍ କ୍ରିମ୍ ଓ ଟପିଂସ୍ ବ୍ୟବହାର ହୋଇନାହିଁ। ବରଂ ନୁଡଲ୍ସ, ଚିକେନ୍, ନଡିଆ କ୍ଷୀର, ମିଟ୍ ବଲ୍ସ, ସଲ୍ଟେଡ୍ କ୍ୟୁଟଲ୍ ଫିଶ୍ ଆଦି ବ୍ୟବହାର ହୋଇଛି। ବିବାହ ହେଉ କି ଜନ୍ମଦିନ ଇଣ୍ଡୋନେସିଆରେ ଏହି କେକ୍ର ଚାହିଦା ବହୁତ। ୨୦୧୭ରୁ ଇଣ୍ଡୋନେସିଆର ଉକ୍ତ ବେକେରି ନୁଡଲ୍ସର ଏହି କେକ୍ ପ୍ରସ୍ତୁତ କରୁଛି। ଜାକର୍ତ୍ତା ପୋଷ୍ଟରେ ଏହି କେକ୍ର ଫଟୋ ପୋଷ୍ଟ ହେବା ପରେ ଏହା ଚର୍ଚ୍ଚାର ପରିସରକୁ ଆସିଥିଲା।