ବଇଣ୍ଡା,୬।୬(ଡି.ଏନ.ଏ.)- ଅନୁଗୋଳ ଜିଲା କିଶୋରନଗର ବ୍ଲକ ନୁନୁକାପଶି ଗ୍ରାମରେ ଅଘୋଷିତ ବିଦ୍ୟୁତ୍ କାଟ ହେଉଛି। ପୁରୁଣା ଟ୍ରାନ୍ସଫର୍ମରକୁ ହଟାଇ ନୂତନ ଟ୍ରାନ୍ସଫର୍ମର ଲଗାଯାଉ ନ ଥିବା ଯୋଗୁ ଲୋଭୋଲଟେଜ ସମସ୍ୟା ଦେଖାଦେଉଛି। ଫଳରେ ଲୋକେ ଗରମରେ ହନ୍ତସନ୍ତ ହେଉଛନ୍ତି। ଏ ନେଇ ବୁଧବାର ସାହିବାସୀ ବଇଣ୍ଡା ଏନ୍ଜେଏନ କନିଷ୍ଠ ଯନ୍ତ୍ରୀ ବିଶ୍ୱରଞ୍ଜନ ସାହୁଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି।
ଗ୍ରାମବାସୀ ଦାବିପତ୍ରରେ ଉଲ୍ଲେଖ କରିଛନ୍ତି, ବଇଣ୍ଡାର ଉକ୍ତ ସ୍ଥାନ ଏକ ପ୍ରମୁଖ ସ୍ଥାନ ହୋଇଥିବାବେଳେ ଏବେ ବିଦ୍ୟୁତ୍ ସମସ୍ୟା ଏକ ନିତିଦିନିଆ ସମସ୍ୟା ପାଲଟିଗଲାଣି। ୧୦୦ରୁ ଊର୍ଦ୍ଧ୍ୱ ଉପଭୋକ୍ତା ଥିଲେ ମଧ୍ୟ ସେମାନଙ୍କୁ ସଠିକ ବିଦ୍ୟୁତ୍ ଯୋଗାଇ ଦିଆଯାଉ ନାହିଁ। ବାରମ୍ବାର ବିଦ୍ୟୁତ୍ କାଟ ସାଙ୍ଗକୁ ଲୋଭୋଲଟେଜ ସମସ୍ୟା ଫଳରେ ଅନେକ ବିଦ୍ୟୁତ୍ ଉପକରଣ ପୋଡ଼ିଯାଉଛି। ସାହିରେ ଥିବା ଟ୍ରାନ୍ସଫର୍ମରଟି ବହୁ ପୁରୁଣା ହୋଇଯାଇଥିବେଳେ ପ୍ରତିଦିନ ୪ରୁ୫ ଥର ଫିଉଜ ଉଡ଼ିଯାଉଛି। ଉପଭୋକ୍ତାଙ୍କ ସଂଖ୍ୟା ବଢୁଥିବାବେଳେ ଉଚ୍ଚମାନର ଟ୍ରାନ୍ସଫର୍ମର ଲଗାଯାଉ ନାହିଁ। ଫଳରେ ଅତ୍ୟଧିକ ଲୋଡ ପଡ଼ି ଟ୍ରାନ୍ସଫର୍ମରଟି ଅଚଳ ହୋଇପଡ଼ୁଛି। ଏ ନେଇ ପୂର୍ବରୁ ଏନ୍ଜେଏନ ଓ ସେସୁକୁ ଅବଗତ କରାଯାଇଥିଲେ ମଧ୍ୟ କୌଣସି ସୁଫଳ ମିଳିପାରୁ ନାହିଁ। ତୁରନ୍ତ ଏହାର ସମାଧାନ କରା ନ ଗଲେ ଆଗାମୀ ଦିନରେ ଆନ୍ଦୋଳନ କରାଯିବ ବୋଲି ଗ୍ରାମର ମିଟୁ ସତପଥୀ, ଗିରିଷ ଚନ୍ଦ୍ର ବେହେରା, ରମେଶ ଘିଓ୍ବାଲା, ବୀର ସତପଥୀ, ରାଜେନ୍ଦ୍ର ରାଉତ, ପ୍ରକାଶ ମିଶ୍ର, ଲୁଲୁ ସାହୁ ପ୍ରମୁଖ ଚେତାବନୀ ଦେଇଛନ୍ତି।