ନୂଆଗାଁ, ୨୫।୭ (ଡି.ଏନ.ଏ.)-ଶ୍ରାବଣରେ ବର୍ଷା ନାହିଁ। ଚାଷ କାର୍ଯ୍ୟ ସମ୍ପୂର୍ଣ୍ଣ ଠପ୍। ଚାଷୀଙ୍କୁ କେବଳ ଭଗବାନ ଭରଷା କହିଲେ କିଛି ଅତ୍ୟୁକ୍ତି ହେବନାହିଁ। ସୁନ୍ଦରଗଡ଼ ଜିଲା ନୂଆଗାଁ ବ୍ଲକରେ ଆବଶ୍ୟକତା ଠାରୁ ୮୦ ପ୍ରତିଶତ କମ୍ ବର୍ଷା ହୋଇଛି। ଫଳରେ ପରିସ୍ଥିତି ଖରାପ ହୋଇଛି। ବିଭିନ୍ନ ସ୍ଥାନରେ ଜମି ଫାଟି ଆଁ କରିଛି।
ଶତ୍ସ୍ୟଠାରୁ ଆରମ୍ଭ କରି ବିଭିନ୍ନ ପନିପରିବା ଉତ୍ପାଦନ ଓ ରପ୍ତାନି କ୍ଷେତ୍ରରେ ନୂଆଗାଁ ବ୍ଲକ ଜିଲାର ଅନ୍ୟ ବ୍ଲକଠାରୁ ପାଦେ ଆଗରେ। ପନିପରିବା ଚାଷ କରି ନିଜ ପରିବାରର ଆର୍ଥିକ ସ୍ଥିତି ସୁଧାରିବାରେ ବେଶ ସହାୟକ ହୋଇ ପାରିଥିବା ନୂଆଗାଁ ବ୍ଲକ ଚାଷୀ ଧାନ ଚାଷ କରି ସେଥିରୁ ବର୍ଷ ସାରା ଚାଉଳ ପାଇଥାଏ। ଏଭଳି ପରିସ୍ଥିତିରେ ବର୍ତ୍ତମାନ ବର୍ଷାର ଅଭାବ ଚାଷୀମାନଙ୍କୁ ଚିନ୍ତାରେ ପକାଇ ଦେଇଛି। ଯେଉଁ କେତେକ ଜମିରେ ଧାନ ବୁଣାଯାଇଛି ସେଥିରୁ ଗଜା ବାହାରିଛି ସତ ହେଲେ ବର୍ଷା ଅଭାବ ଯୋଗୁ ଗଜାଗୁଡିକ ଝାଉଁଳି ମରିବା ଆରମ୍ଭ ହେଲାଣି। ଆଉ ଏକ ସପ୍ତାହ ବର୍ଷା ନହେଲେ ପରିସ୍ଥିତି ଭୟଙ୍କର ହେବ ବୋଲି ନୂଆଗାଁ ବ୍ଲକ ସହକାରୀ କୃଷି ଅଧିକାରୀ ପୃଥିରାଜ ମଣ୍ଡଳ ପ୍ରକାଶ କରିଛନ୍ତି।
ନୂଆଗାଁ ବ୍ଲକ କୃଷି ବିଭାଗ ପକ୍ଷରୁ ମିଳିଥିବା ତଥ୍ୟ ଅନୁଯାୟୀ ଚଳିତ ଖରିଫ ଫସଲ ପାଇଁ ୨୧,୨୬୨ ହେକ୍ଟର ଜମିରେ ଧାନ ଚାଷ ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଥିଲା। ହେଲେ ଏପର୍ଯ୍ୟନ୍ତ ୧୬,୮୨୮ ହେକ୍ଟର ଜମିରେ ଧାନବୁଣା, ୧୧୦ ହେକ୍ଟର ଜମିରେ ଧାନ ରୁଆ ଯାଇଛି। ଯେଉଁ ୧୧୦ ହେକ୍ଟର ଜମିରେ ଧାନ ରୁଆ ଯାଉଛି ସେହି ଜମିରେ ଜଳସେଚନ କରି ରୁଆ କରାଯାଇଥିବା କୁହାଯାଉଛି। ସେହିଭଳି ଅଣଧାନ ଫସଲ ୬୨୧୮ ହେକ୍ଟର ଜମିରେ ବୁଣାଯିବା ଲକ୍ଷ୍ୟ ଧାର୍ଯ୍ୟ କରାଯାଇଥିଲା। ଏପର୍ଯ୍ୟନ୍ତ ମାତ୍ର ୨୬୮୪ ହେକ୍ଟର ଜମିରେ କରାଯାଇଥିବା ବିଭାଗୀୟ ଅଧିକାରୀ ପ୍ରକାଶ କରିଛନ୍ତି। ତେବେ ଏଭଳି ପରିସ୍ଥିତି ପାଇଁ ସ୍ବଳ୍ପ ବୃଷ୍ଟିପାତ ହିଁ ମୁଖ୍ୟ କାରଣ। ମିଳିଥିବା ସୂଚନା ମୁତାବକ ଜୁନ ଓ ଜୁଲାଇ ଶେଷ ସୁଦ୍ଧା ୬୨୩.୮ ମିମି ବର୍ଷା ହେବା କଥା। ଏପର୍ଯ୍ୟନ୍ତ ମାତ୍ର ୧୦୦.୩ ମିମି ବର୍ଷା ହୋଇଛି। ଯାହା ଆବଶ୍ୟକଠାରୁ ୮୦ ପ୍ରତିଶତ କମ୍ ବୋଲି କୁହାଯାଉଛି। ଏଥିରୁ ଅନୁମାନ କରାଯାଇପାରେ ନୂଆଗାଁ ବ୍ଲକରେ ଚାଷ କାର୍ଯ୍ୟକୁ ନେଇ ପରିସ୍ଥିତି କିଭଳି ଉଦ୍ବେଗଜନକ ରହିଛି। ହଜାର ହଜାର ଚାଷୀ ବ୍ୟାଙ୍କ, ଲ୍ୟାମ୍ପ୍ସରୁ ଋଣ ନେଇ ଚାଷ କାର୍ଯ୍ୟ କରିଛନ୍ତି। ଏପରିକି ଯେଉଁମାନଙ୍କୁ ବ୍ୟାଙ୍କ କିମ୍ବା ଲ୍ୟାମ୍ପ୍ସ ଋଣ ଦେଇ ନାହିଁ ସେମାନେ ନିଜ ଗୃହପାଳିତ ଛେଳି, ଘୁଷୁରୀ, କୁକୁଡା ଆଦି ବିକ୍ରି କରି ସାର, ଔଷଧ, ବିହନ ଆଦି କ୍ରୟ କରିଥିବା ଜଣାପଡିଛି। କ୍ଷୁଦ୍ର ଚାଷୀମାନେ ମଧ୍ୟ ହଜାର ହଜାର ଟଙ୍କା ଋଣ କରି ଚାଷ କାର୍ଯ୍ୟରେ ବିନିଯୋଗ କରିଛନ୍ତି। ହେଲେ ସ୍ବଳ୍ପ ବୃଷ୍ଟିପାତ ସେମାନଙ୍କ ଆଖିରୁ ନିଦ ହଜାଇ ଦେଇଛି।