ଭୁବନେଶ୍ୱର,୧୬ା୯(ବ୍ୟୁରୋ) : ଦେଶର ରାଜଧାନୀ ନୂଆଦିଲ୍ଲୀରେ ଓଡ଼ିଶା ଭବନ, ଓଡ଼ିଶା ସଦନ ଏବଂ ଆବାସିକ କମିଶନରଙ୍କ କାର୍ଯ୍ୟାଳୟ ରହିଛି। ଏହି ସବୁରେ ରାଜ୍ୟ ସରକାରଙ୍କ ଅଧୀନରେ ବିଭିନ୍ନ ଠିକା କର୍ମଚାରୀ ନିଯୁକ୍ତ ହୋଇଛନ୍ତି। ଏମାନଙ୍କ ମଧ୍ୟରେ ନିରାପତ୍ତା ରକ୍ଷୀ, ରୁମ୍ ବୟ, ମାଳି, ଡ୍ରାଇଭର ରହିଛନ୍ତି। ସେଠାରେ କାର୍ଯ୍ୟରତ କର୍ମଚାରୀଙ୍କୁ ମହଙ୍ଗା ଭତ୍ତା, ଯାତାୟାତ ଖର୍ଚ୍ଚ, ମହାନଗର ଭତ୍ତା ପ୍ରଭୃତି ମିଳୁନାହିଁ। ଅନୁରୂପ ଭାବେ ଏମାନଙ୍କୁ ସାମୟିକ ଛୁଟି, ଅର୍ଜିତ ଛୁଟି, ପର୍ବପର୍ବାଣି ଛୁଟି ତଥା ଅନ୍ୟାନ୍ୟ ଛୁଟି ମଧ୍ୟ ମିଳି ନ ଥାଏ। କୌଣସି କାରଣରୁ କାର୍ଯ୍ୟଦିବସରେ ଯୋଗଦେଇ ନ ପାରିଲେ ଏମାନଙ୍କୁ ଦରମାର କେତେକ ଅଂଶ ହରାଇବାକୁ ପଡ଼ିଥାଏ। ସଚିବାଳୟଠାରୁ ଆରମ୍ଭ କରି ରାଜ୍ୟରେ ଥିବା ଅନ୍ୟ ସରକାରୀ କାର୍ଯ୍ୟାଳୟର ଠିକା କର୍ମଚାରୀମାନେ ଛୁଟି ସହ ଅନ୍ୟାନ୍ୟ ସୁବିଧା ପାଉଛନ୍ତି, ହେଲେ ଦିଲ୍ଲୀରେ କାର୍ଯ୍ୟରତ କର୍ମଚାରୀ ଏଥିରୁ ବଞ୍ଚତ୍ତ ହେଉଛନ୍ତି। ତେଣୁ ଅନ୍ୟ କର୍ମଚାରୀଙ୍କ ପରି ଦିଲ୍ଲୀରେ କାର୍ଯ୍ୟରତ ଓଡ଼ିଆଙ୍କୁ ସୁବିଧା ସୁଯୋଗ ପ୍ରଦାନ ନେଇ ଦାବି କରାଯାଇଛି। କର୍ମଚାରୀମାନେ ଏ ନେଇ ବରିଷ୍ଠ ଅଧିକାରୀଙ୍କୁ ଏକାଧିକ ଥର ଅବଗତ କରିଛନ୍ତି। ହେଲେ କୌଣସି ସୁଫଳ ପାଇପାରିନାହାନ୍ତି ବୋଲି କର୍ମଚାରୀମାନେ କହିଛନ୍ତି।