ବରଗଡ଼ ଅଫିସ,୨୩।୯: ବରଗଡ଼ ବ୍ଲକ ଅନ୍ତର୍ଗତ ଏସ୍ ଡୁମ୍ବେରପାଲି ପଞ୍ଚାୟତ ଅନ୍ତର୍ଗତ ନୂଆପାଲି ଗ୍ରାମର ଜଣେ ଚାଷୀ କୀଟନାଶକ ପିଇ ଆତ୍ମହତ୍ୟା କରିଥିବା ବୁର୍ଲା ମେଡିକାଲ ଫାଣ୍ଡିରେ ଅଭିଯୋଗ ହୋଇଛି।
ମୃତ ଚାଷୀ ହେଲେ ଉକ୍ତ ଗ୍ରାମର ରସିକ ସାହୁଙ୍କ ପୁଅ ମହେନ୍ଦ୍ର(୩୭)। ସୂଚନା ଅନୁଯାୟୀ, ମୃତ ଚାଷୀ ୨ ଏକର ଜମିରେ ଧାନଚାଷ କରିଆସୁଥିଲେ। ତେବେ ଗତ ୨୦୧୮ ଫସଲ କ୍ଷତିରେ ଅନ୍ୟମାନଙ୍କୁ ଫସଲ ବୀମା କ୍ଷତିପୂରଣ ମିଳିଥିବାବେଳେ ମହେନ୍ଦ୍ର ସେଥିରୁ ବାଦ୍ ପଡିଥିଲେ। ଫଳରେ ପରବର୍ତ୍ତୀ ଫସଲ ପାଇଁ ସେ ଅସୁବିଧାର ସମ୍ମୁଖୀନ ହୋଇଥିଲେ ଏବଂ କୃଷିଋଣ ପାଇଁ ନିକଟସ୍ଥ ପ୍ରାଥମିକ କୃଷି ସମବାୟ ସମିତିକୁ ବାରମ୍ବାର ଯାଇଥିଲେ ମଧ୍ୟ କୃଷିଋଣ ନ ପାଇ ନିରାଶ ହୋଇ ଫେରିଥିବା ପରିବାର ଲୋକେ ଅଭିଯୋଗ କରିଛନ୍ତି। ଏ ନେଇ ସେ ଚିନ୍ତିତ ରହୁଥିବା ବେଳେ ଗତ ୧୯ ତାରିଖରେ କୀଟନାଶକ ପିଇଦେଇଥିଲେ। ଗୁରୁତର ଅବସ୍ଥାରେ ପରିବାର ଲୋକେ ତାଙ୍କୁ ବରଗଡ଼ ଜିଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ସେଠାରୁ ତାଙ୍କୁ ଭୀମ୍ସାର, ବୁର୍ଲା ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ତେବେ ଚିକିତ୍ସାଧୀନ ଅବସ୍ଥାରେ ସୋମବାର ସକାଳେ ତାଙ୍କର ମୃତ୍ୟୁ ଘଟିଛି। ବୁର୍ଲାରେ ମୃତଦେହ ବ୍ୟବଚ୍ଛେଦ ପରେ ଗ୍ରାମକୁ ପଠାଯାଇଥିଲା। ସ୍ଥାନୀୟ ନେତାମାନେ ମୃତ ଚାଷୀଙ୍କ ପରିବାରକୁୁ କ୍ଷତିପୂରଣ ଦେବାକୁ ଦାବି କରିଛନ୍ତି।