ଭୁବନେଶ୍ୱର,୨୨-୯: ଟାଟା ଗ୍ରୁପ କମ୍ପାନୀର ଫାର୍ମ ଭୋଲଟାସ ବେକୋ ପକ୍ଷରୁ ଶୀଘ୍ର ନୂଆ ଟେକ୍ନୋଲୋଜିଯୁକ୍ତ ଫ୍ରିଜ୍ ଡିସେମ୍ବରରେ ବଜାରକୁ ଆସିବ। ତୁର୍କୀ କମ୍ପାନୀ ଆର୍ସେଲିକ ସହ ମିଳିତ ହୋଇ କମ୍ପାନୀ ଏ ଦିଗରେ କାର୍ଯ୍ୟ କରୁଛି। ଏହା ଦ୍ୱାରା ସଦ୍ୟତମ ଡାଇରେକ୍ଟ କୁଲିଂ ରେଫ୍ରିଜରେଟର ବଜାରରେ କମ୍ପାନୀ ଏହାର ସ୍ଥିତି ଦୃଢ କରିବାକୁ ଲକ୍ଷ୍ୟ ରଖିଛି। ସ୍ଥାନୀୟ ଏକ ହୋଟେଲରେ ଅନୁଷ୍ଠିତ ଡିଲରମିଟ ଅବସରରେ କମ୍ପାନୀର ପୂର୍ବାଞ୍ଚଳ ବାଣିଜ୍ୟ ମୁଖ୍ୟ ସବ୍ୟସାଚୀ ଗୁପ୍ତା କହିଛନ୍ତି ଯେ, ଡାଇରେକ୍ଟ କୁଲ ପ୍ରଡକ୍ଟର ଏକ ବଡ ବଜାର ଦେଶରେ ଥିବା ବେଳେ ଏହି କ୍ଷେତ୍ରରେ ଭଲ କାରବାର ନେଇ ଆଶା ରହିଛି। ଏହି ପ୍ରଡକ୍ଟ ଗ୍ରାହକଙ୍କୁ ଆକର୍ଷଣୀୟ ମୂଲ୍ୟରେ ଯୋଗାଇ ଦିଆଯିବ। ଉକ୍ତ ବର୍ଗରେ ଏକ ଉନ୍ନତ ବଜାର ଅଂଶ ହାସଲ ନେଇ ଲକ୍ଷ୍ୟ ରହିଛି।
ସେ କହିଛନ୍ତି ଯେ, ପାର୍ବଣ ଉପଲକ୍ଷେ ଗ୍ରାହକଙ୍କୁ ନୂଆ ଅଫର ପ୍ରଦାନ କରାଯିବ। କମ୍ପାନୀର ପ୍ରଡକ୍ଟ ଉପରେ ଗ୍ରାହକ ଆକର୍ଷଣୀୟ ଓ୍ବାରେଣ୍ଟି ପାଇପାରିବେ। ଏହାବାଦ ଇଏମ୍ଆଇ ଏବଂ କ୍ୟାଶବ୍ୟାକ ସୁବିଧା ପ୍ରଦାନ କରିବାକୁ ଯୋଜନା ରହିଛି। ଗତ ବର୍ଷ ତୁଳନାରେ ଚଳିତ ବର୍ଷ ପାର୍ବଣରେ ଭଲ ବିକ୍ରି ଆଶା ରହିଥିବା ସେ ପ୍ରକାଶ କରିଛନ୍ତି। ଅଫର ଦିପାବଳୀ ଯାଏ ଚାଲିବ। କମ୍ପାନୀ ରେଫ୍ରିଜରେଟର, ଓ୍ବାଶିଂମେଶିନ, ମାଇକ୍ରୋଓ୍ବେଭ ଓଭନ, ଡିସ୍ଓ୍ବାଶର ଭଳି ବିଭିନ୍ନ ପ୍ରଡକ୍ଟ ଉପଲବ୍ଧ କରାଉଛି। କାର୍ଯ୍ୟକ୍ରମରେ ଭୋଲଟାସ ଲିମିଟେଡର ଶାଖା ପ୍ରବନ୍ଧକ ମାନସ କୁମାର ମଲ୍ଲିକ, ବିତରକ ପପୁ ହଂସ ଏବଂ ରାକେଶ ନାରଙ୍ଗ ପ୍ରମୁଖ ଉପସ୍ଥିତ ଥିଲେ।