କଣାସ,୨୫-୯(ସ୍ବ.ପ୍ର.):ସେବେ ରୋଗିଣା ମା’ଙ୍କ ପାଖରେ ବସି ରେଳ ଷ୍ଟେଶନରେ ଲୁହ ଗଡ଼ାଉଥିଲେ। ଏବେ ୟୁରୋପ ଦମ୍ପତିଙ୍କ ଏକମାତ୍ର ଅଲିଅଳି କନ୍ୟା। ଏଭଳି ନୂଆ ପରିଚୟ ପାଇଥିବା ଶ୍ରାବଣୀଙ୍କୁ କୋଳେଇ ନେବା ପରେ ସୋମବାର ଏହି ବିଦେଶୀ ଦମ୍ପତିଙ୍କ ମନରେ ଦେଖିବାକୁ ମିଳିଥିଲା କାହିଁ କେତେ ଖୁସି। ଏଥିପାଇଁ ପୁରୀ ଜିଲା କଣାସ ବ୍ଲକ୍ ଦୟାବିହାରସ୍ଥିତ ନୀଳାଚଳ ସେବା ପ୍ରତିଷ୍ଠାନ ଶିଶୁଗୃହରେ ଦିନତମାମ ଲାଗି ରହିଥିଲା ଉତ୍ସବର ପରିବେଶ।
୩ବର୍ଷ ତଳେ ପୁରୀ ରେଳ ଷ୍ଟେଶନରେ ଶ୍ରାବଣୀଙ୍କ ଅସହାୟ ଅବସ୍ଥାରେ ଦେଖିବାକୁ ମିଳିଥିଲା। ମା’ ରୋଗଗ୍ରସ୍ତ ଅବସ୍ଥାରେ ଚଟାଣରେ ପଡ଼ି ରହିଥିବାବେଳେ ତାଙ୍କ ପାଖରେ ବସି ଶ୍ରାବଣୀ କାନ୍ଦୁଥିଲେ। ପୁରୀ ଜିଲା ଶିଶୁ କଲ୍ୟାଣ କମିଟି ଖବର ପାଇବା ପରେ ଜିଲା ଶିଶୁ ସୁରକ୍ଷା ଅଧିକାରୀ ମନୋଜ କୁମାର ତ୍ରିପାଠୀ ଘଟଣାସ୍ଥଳରେ ପହଞ୍ଚତ୍ ତାଙ୍କୁ ଉଦ୍ଧାର କରିଥିଲେ। ଆବଶ୍ୟକ କାଗଜପତ୍ର ପ୍ରସ୍ତୁତ କରାଯାଇ ତାଙ୍କୁ ଲାଳନ ପାଳନ ପାଇଁ ୨୦୧୭ ଜୁନ୍ ୮ରେ ନୀଳାଚଳ ସେବା ପ୍ରତିଷ୍ଠାନକୁ ପଠାଇ ଦିଆଯାଇଥିଲା। ଶ୍ରାବଣୀ ମାନସିକ ଅନଗ୍ରସର ଥିବାରୁ ସେଠାରେ ତାଙ୍କର ଚିକିତ୍ସା କରାଯାଇଥିଲା। ୟୁରୋପ ମହାଦେଶର ମାଲଟା ନିବାସୀ ଇମାନୁଏଲ ଫଇଜୋନ୍ ଏବଂ ରୋଜାନା ଫାଇଜୋନ୍ଙ୍କର ଚାରି ପୁତ୍ର ଥିବାବେଳେ ଝିଅଟିଏ ପାଇଁ ସେମାନେ ଅନ୍ଲାଇନରେ ସେବା ପ୍ରତିଷ୍ଠାନ ସହ ଯୋଗାଯୋଗ କରିଥିଲେ। ଅନୁଷ୍ଠାନ ପକ୍ଷରୁ ଇମାନୁଏଲଙ୍କ ଆବେଦନର ସମସ୍ତ କାଗଜପତ୍ର ଯାଞ୍ଚ କରାଯିବା ପରେ ଶ୍ରାବଣୀକୁ ପୋଷ୍ୟକନ୍ୟା ଭାବେ ଗ୍ରହଣ କରିବା ପାଇଁ ସ୍ବୀକୃତି ପ୍ରଦାନ କରାଯାଇଥିଲା। ଗତ ସୋମବାର ପୁରୀ ଜିଲା ଶିଶୁ ସୁରକ୍ଷା ଅଧିକାରୀ ତ୍ରିପାଠୀ ନୀଳାଚଳ ପ୍ରତିଷ୍ଠାନ ଶିଶୁଗୃହ ଅଧ୍ୟକ୍ଷ ପ୍ରିୟଙ୍କା ପ୍ରିୟଦର୍ଶିନୀ ପଟ୍ଟନାୟକ ଉପସ୍ଥିତରେ ଶ୍ରାବଣୀକୁ ତାଙ୍କ ମାତାପିତାଙ୍କୁ ହସ୍ତାନ୍ତର କରିଥିଲେ। ଶ୍ରାବଣୀର ଚିକିତ୍ସା ଓ ସମସ୍ତ ସେବା କରୁଥିବା ନର୍ସ ସୁକାନ୍ତି ସେଠୀ, ଗୃହମାତା ଭାବେ ପାଳୁଥିବା ସନ୍ଧ୍ୟାରାଣୀ ପଟ୍ଟନାୟକ, ପ୍ରମୋଦିନୀ ସାହୁ, ସନ୍ଧ୍ୟାରାଣୀ ସ୍ବାଇଁ ପ୍ରମୁଖ ଶ୍ରାବଣୀଙ୍କ ସୁଖ ତଥା ସମୃଦ୍ଧ ଜୀବନ କାମନା କରିଛନ୍ତି।
