ବଇଣ୍ଡା,୧୮।୨ – ଆଗ୍ରହ ଥିଲେ ସୁଯୋଗ ଆପଣାଛାଏ ଆସେ। ଆଉ ଉକ୍ତ ସୁଯୋଗର ସଦୁପୋଯୋଗ କିପରି ସଫଳତାର ମାର୍ଗ ପ୍ରଶସ୍ତ କରିଥାଏ ତାହାର ଉଦାହରଣ ହେଲେ ଓଡ଼ିଶା ବଲ୍ ବ୍ୟାଡ୍ମିଣ୍ଟନ ଦଳରେ ସ୍ଥାନ ପାଇଥିବା ନୂଆ ପ୍ରତିଭା ଶୁଭଶ୍ରୀ ବଡ଼ମାଳୀ। ଅନୁଗୋଳ ଜିଲା କିଶୋରନଗର ବ୍ଲକ ସଦରମହକୁମାର ଶୁଭଶ୍ରୀ ମାତ୍ର କେଇ ବର୍ଷ ମଧ୍ୟରେ ଏହି କ୍ରୀଡ଼ା କ୍ଷେତ୍ରରେ ଦକ୍ଷତାର ପରିଚୟ ଦେଇ ଓଡ଼ିଶା ଦରବାରରେ ନିଜକୁ ପହଞ୍ଚାଇ ପାରିଛନ୍ତି। ଜଣେ ମହିଳା କ୍ରୀଡ଼ାବିତ୍ ଭାବେ ବଲ୍ ବ୍ୟାଡମିଣ୍ଟନକୁ ସେ ନିଜ କ୍ୟାରିୟର କରି ରାଜ୍ୟ ତଥା ଦେଶ ପାଇଁ ସୁନାମ ଅର୍ଜନ କରିବାକୁ ବହୁ ସ୍ବପ୍ନ ଦେଖିଥିବା ପ୍ରକାଶ କରିଛନ୍ତି।
ଶୁଭଶ୍ରୀଙ୍କ କହିବା ଅନୁଯାୟୀ, ପିଲାବେଳୁ ତାଙ୍କର କ୍ରୀଡ଼ା ପ୍ରତି ବହୁ ଆଗ୍ରହ ଥିଲା। କିଶୋରନଗର କଲେଜରେ ଯୁକ୍ତ ୨ ପଢୁଥିବାବେଳେ ଥରେ କଲେଜରେ ବଲ୍ ବ୍ୟାଡମିଣ୍ଟନ ମ୍ୟାଚ ଦେଖି ତାହା ଖେଳିବାକୁ ଇଚ୍ଛା ଜାଗ୍ରତ ହୋଇଥିଲା। ତେବେ ଏକ ଟୁର୍ନାମେଣ୍ଟରେ ଭାଗ ନେବାକୁ ତାଙ୍କୁ ସୁଯୋଗ ମିଳିବା ପରଠାରୁ ସେ ଆଉ ପଛକୁ ଫେରି ନାହାନ୍ତି। ଧଉରାପାଲି ଗ୍ରାମର ଗୁରୁ ବନମାଳୀ ସାହୁଙ୍କଠାରୁ ପ୍ରଶିକ୍ଷଣ ପାଇ ସେ ପ୍ରଥମେ ଜିଲା ଓ ପରେ ବିଭିନ୍ନ ରାଜ୍ୟରେ ବଲ ବ୍ୟାଡ୍ମିଣ୍ଟନ ଖେଳି ସୁନାମ ଅର୍ଜନ କରିଛନ୍ତି। ଏହାପରେ ୨୦୧୯ରେ ତାଙ୍କୁ ଓଡ଼ିଶା ଟିମ୍ରେ ସାମିଲ କରାଯାଇଥିଲା। ଆଗାମୀ ଦିନରେ ବିଭିନ୍ନ ରାଜ୍ୟରେ ହେବାକୁ ଥିବା ବଲ ବ୍ୟାଡ୍ମିଣ୍ଟନ ଟୁର୍ନାମେଣ୍ଟରେ ଖେଳିବା ପାଇଁ ତାଙ୍କୁ ମନୋନୀତ ମଧ୍ୟ କରାଯାଇଛି। ବାପା ପ୍ରଦୀପ ବଡ଼ମାଳୀ, ମା’ ପୁଷ୍ପାଞ୍ଜଳୀ ବଡ଼ମାଳୀ ଏବଂ ଦୁଇ ଭାଇଙ୍କ ଉତ୍ସାହ ଯୋଗୁ ସେ ଆଜି ଜଣେ ମହିଳା କ୍ରୀଡ଼ାବିତ୍ ଭାବେ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି। ତେବେ ଖେଳରେ ହାର୍ଜିତ ଲାଗି ରହିଥାଏ। ହାରିଥିବା ବ୍ୟକ୍ତି ଦିନେ ନା ଦିନେ ସଫଳତା ହାସଲ କରିପାରିଥାଏ। ତେଣୁ ଯୁବକ୍ରୀଡ଼ା ବିତ୍ମାନେ କଠିନ ପରିଶ୍ରମ କରିବା ସହ ହାର୍ଜିତକୁ ଭୟ ନ କରି ପ୍ରତିଟି ସୁଯୋଗର ସଦୁପୋଯୋଗ କରିବା ଦିଗରେ ଉଦ୍ୟମ ଜାରି ରଖିବା ଉଚିତ ବୋଲି ଶୁଭଶ୍ରୀ ପ୍ରକାଶ କରିଛନ୍ତି। ଯୁକ୍ତ ୩ ପରେ ରାଜନୀତି ବିଜ୍ଞାନରେ ପିଜି କରୁଥିବା ଶୁଭଶ୍ରୀ ଆଗକୁ ବିଭିନ୍ନ ରାଜ୍ୟରେ ବଲ୍ ବ୍ୟାଡ୍ମିଣ୍ଟନ ଖେଳି ନିଜ ଅଞ୍ଚଳ ତଥା ରାଜ୍ୟର ନାମ ରଖିବେ ବୋଲି କହିଛନ୍ତି।