ଭୁବନେଶ୍ୱର, ୧ା୧(କ୍ରୀଡ଼ା ପ୍ରତିନିଧି)-କରୋନା ମହାମାରୀ ପାଇଁ ବିଗତବର୍ଷ କ୍ରୀଡ଼ାବିତ୍ଙ୍କ ଲାଗି ଉଭୟ ମାନସିକ ଓ ଶାରୀରିକ ସ୍ତରରେ ଅତ୍ୟନ୍ତ ଯନ୍ତ୍ରଣାଦାୟକ ଥିଲା। ନୂଆ ବର୍ଷରେ ନୂଆ ଆଶା। ବିଶ୍ୱରୁ ଖୁବ୍ଶୀଘ୍ର ଏହି ସଙ୍କଟ ସମୟ ଦୂରେଇ ଯିବା ସହ ସବୁକିଛି ପୁଣି ସ୍ବାଭାବିକ ହେବାନେଇ ଆମ୍ଭେମାନେ ଆଶାବାଦୀ ଅଛୁ ବୋଲି ଭାରତୀୟ ମହିଳା ଫୁଟବଲ ଦଳର ପୂର୍ବତନ ଅଧିନାୟିକା ଶ୍ରଦ୍ଧାଞ୍ଜଳି ସାମନ୍ତରାୟ ପ୍ରକାଶ କରିଛନ୍ତି। ଖେଳ ଜୀବନପରେ ଜାତୀୟ ଜୁନିୟର ମହିଳା ଫୁଟବଲ ଦଳର କୋଚ୍ ଏବଂ ଉଭୟ ସିନିୟର ଓ ଜୁନିୟର ଦଳର ଚୟନକର୍ତ୍ତା ଦାୟିତ୍ୱ ତୁଲାଇ ସାରିଥିବା ଶ୍ରଦ୍ଧାଞ୍ଜଳି ଏବେ କଳିଙ୍ଗ ଷ୍ଟାଡିୟମରେ ବ୍ୟକ୍ତିଗତ ଅଭ୍ୟାସ ଜାରି ରଖିବା ସହ ଜୁନିୟର ଖେଳାଳିଙ୍କୁ ଆବଶ୍ୟକ ପରାମର୍ଶ ଦେଉଛନ୍ତି। କୋଭିଡ୍-୧୯ କଟକଣା ସମୟରେ ଘରୁ ବାହାରକୁ ବାହାରିବା ସମ୍ଭବ ନ ଥିବା ସମୟରେ ସର୍ବଭାରତୀୟ ଫୁଟବଲ ଫେଡେରେଶନ (ଏଆଇଏଫ୍ଏଫ୍) ଏବଂ ଫୁଟବଲ ଆସୋସିଏଶନ ଅଫ୍ ଓଡ଼ିଶା(ଫାଓ) ପକ୍ଷରୁ ଅନ୍ଲାଇନ୍ରେ ଆୟୋଜିତ ବିଭିନ୍ନ କୋଚିଂ ସମ୍ପକିର୍ତ କୋର୍ସରେ ସେ ଅଂଶଗ୍ରହଣ କରିଥିଲେ। ପୂର୍ବରୁ ଏପରି ଅଭିଜ୍ଞତା ନ ଥିଲା। ମାତ୍ର ଏହାର ବହୁ ଉପାଦେୟ ରହିଲା ଏବଂ ଏକାବେଳେ ଦେଶର ବିଭିନ୍ନ କୋଚ୍ଙ୍କ ସହିତ ଭାବର ଆଦାନ ପ୍ରଦାନରେ ଅନେକ ଅଭିଜ୍ଞତା ମଧ୍ୟ ହାସଲ ହେଲା ବୋଲି ସମ୍ପ୍ରତି ନାଲ୍କୋରେ କାର୍ଯ୍ୟରତ ଶ୍ରଦ୍ଧାଞ୍ଜଳି ପ୍ରକାଶ କରିଛନ୍ତି। ଫୁଟବଲ ପ୍ରତିଭାମାନେ ଦୀର୍ଘଦିନଧରି ପଡ଼ିଆରୁ ଦୂରେଇ ରହିଥିବାରୁ ଫିଟ୍ନେସ ସମସ୍ୟା ରହିବା ସ୍ବାଭାବିକ। ତେଣୁ ପ୍ରଥମେ ଏଥିପ୍ରତି ଧ୍ୟାନ ଦେବାପରେ ଯାଇ ସେମାନେ ଖେଳିବା ଉଚିତ। ନଚେତ ଆହତ ସମସ୍ୟା ରହିବ। ଏବେ ଆଇଏସ୍ଏଲ ଏବଂ ଆଇ-ଲିଗ୍ ଚାଲିଛି। ଆଗକୁ ଫାଓ ପକ୍ଷରୁ ଆନ୍ତଃ ଜିଲା ପ୍ରତିଯୋଗିତା ଏବଂ କଟକ ଲିଗ୍ ହେବାର ଅଛି। ଆନ୍ତଃ ଜିଲା ପ୍ରତିଯୋଗିତା ରାଜ୍ୟ ଖେଳାଳିଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ସେଠାରେ ଭଲ ପ୍ରଦର୍ଶନ କଲେ ସେମାନେ ଜାତୀୟ ଦଳପାଇଁ ସୁଯୋଗ ସୃଷ୍ଟି କରିପାରିବେ ବୋଲି ଶ୍ରଦ୍ଧାଞ୍ଜଳି କହିଛନ୍ତି।