ଚୌଦ୍ୱାର,୨୫ା୪(ଡି.ଏନ୍.ଏ.) : କଟକ ଜିଲା ଚୌଦ୍ୱାର ସହାରାଞ୍ଚଳରେ ଗାନ୍ଧିଛକସ୍ଥିତ ଟାଉନ୍ହଲରେ ୬୦ ଶଯ୍ୟା ବିଶିଷ୍ଟ କ୍ୱାରାଣ୍ଟାଇନ ସେଣ୍ଟର ଚାଲୁ ରହିଛି। ଆସନ୍ତା ମେ’ ୩ ତାରିଖ ଲକ୍ଡାଉନ ହଟିବା ପରେ ରାଜ୍ୟ ବାହାରୁ ବହୁ ଶ୍ରମିକ ନିଜ ଅଞ୍ଚଳକୁ ଫେରିବା ଅନୁମାନ କରାଯାଉଛି। ଏହାକୁ ଲକ୍ଷ୍ୟ ରଖି ପୌରପାଳିକା ପକ୍ଷରୁ ପରିବାରବର୍ଗଙ୍କ ଜରିଆରେ ନାମ ପଞ୍ଜୀକରଣ କାର୍ଯ୍ୟ ଆରମ୍ଭ କରାଯାଇଛି। ଶନିବାର ସୁଦ୍ଧା ୨୦୦ରୁ ଊର୍ଦ୍ଧ୍ୱ ଲୋକ ଅବେଦନପତ୍ର ନେଇଥିବାବେଳେ ୩୮ଜଣ ପଞ୍ଜିକୃତ ହୋଇଥିବା ଜଣାପଡ଼ିଛି। ଏଥିପାଇଁ ଚୌଦ୍ୱାର ବାଳିକା ଛାତ୍ରୀନିବାସକୁ ୧୦୦ ଶଯ୍ୟା ବିଶିଷ୍ଟ ନୂତନ କ୍ୱାରାଣ୍ଟାଇନ୍ କେନ୍ଦ୍ର କରିବା ପାଇଁ ପ୍ରସ୍ତୁତି ଆରମ୍ଭ ହୋଇଛି ା ଏନେଇ ଶନିବାର ଅପରାହ୍ନରେ କଟକ ଉପଜିଲାପାଳ ଶୁଭ୍ରାଂଶୁ ମିଶ୍ର ବାଳିକା ଛାତ୍ରୀ ନିବାସକୁ ପରିଦର୍ଶନ କରି ପାରିପାର୍ଶ୍ୱିକ ସଫେଇ, ଆଲୋକୀକରଣ, ପାନୀୟ ଜଳଯୋଗାଣ କେନ୍ଦ୍ରର ସ୍ବଚ୍ଛତା ଉପରେ ବିଶେଷ ଗୁରୁତ୍ୱ ଦେବାପାଇଁ ପୌରନିର୍ବାହୀ ଅଧିକାରୀ ପ୍ରଦୀପ୍ତ କୁମାର ବେହେରାଙ୍କୁ ପରାମର୍ଶ ଦେଇଥିଲେ। କଲେଜର ଅଧ୍ୟାପକ ସୁମନ୍ତ ସାହୁ, ହଷ୍ଟେଲର ୱାଡେନ ତଥା ଅଧ୍ୟାପକ ବସନ୍ତ କୁମାର ବିଶ୍ୱାଳ, ପୌର ନିର୍ବାହୀ ଯନ୍ତ୍ରୀ ଚମ୍ପକ ରାୟ ପ୍ରମୁଖ ଉପସ୍ଥିତ ଥିଲେ।