ଭୁବନ, ୧୮ା୫(ଡି.ଏନ.ଏ.)-ସାଂସ୍କୃତିକ ଅନୁଷ୍ଠାନ ‘ନଟରାଜ କଳାବିକାଶ କେନ୍ଦ୍ର’ର ୭ମ ବାର୍ଷିକ ଉତ୍ସବ ସ୍ଥାନୀୟ ରାମମନ୍ଦିର ପରିସରରେ ଶୁକ୍ରବାର ଅନୁଷ୍ଠିତ ହୋଇଯାଇଛି। ପ୍ରିନ୍ସ ଡ୍ୟାନ୍ସ ଗ୍ରୁପ୍ର ବରିଷ୍ଠ କର୍ମକର୍ତ୍ତା ଶନି ଭଳ ମୁଖ୍ୟଅତିଥି ଭାବେ ଯୋଗଦେଇ କହିଲେ, ନୃତ୍ୟଗୀତ ମାନସିକ ଶାନ୍ତି ଦିଏ। ସ୍ବାସ୍ଥ୍ୟରକ୍ଷା ପାଇଁ ନୃତ୍ୟ ଏକ ବଳିଷ୍ଠ ମାଧ୍ୟମ। ଏହାଦ୍ୱାରା କଳା ଏବଂ କଳାକାରଙ୍କୁ ପ୍ରୋତ୍ସାହନ ମଧ୍ୟ ମିଳିଥାଏ। ଆଞ୍ଚଳିକସ୍ତରରେ ବିଭିନ୍ନ ଅନୁଷ୍ଠାନ କଳାକାରଙ୍କୁ ପ୍ରୋତ୍ସାହିତ କରୁଛନ୍ତି। ଏହା କଳାକୁ ବଞ୍ଚାଇ ରଖିବାରେ ସହାୟକ ହେଉଛି ବୋଲି ସେ ମତବ୍ୟକ୍ତ କରିଥିଲେ। ମୁଖ୍ୟବକ୍ତା ଭାବେ ଗୀତିକାର ଗୋବିନ୍ଦ ଚନ୍ଦ୍ର, ସମ୍ମାନିତ ଅତିଥି ନାଟ୍ୟକାର ସତ୍ୟବାଦୀ ସେନାପତି, ସାମାଜିକ କର୍ମୀ ଲଳିତ କୁମାର ବେହେରା, ନୃତ୍ୟଗୁରୁ ଦେବଦତ୍ତ ବିଶ୍ୱକର୍ମା ମଞ୍ଚାସୀନ ଥିଲେ।
ଏହି ଅବସରରେ ଆଖପାଖ ଅଞ୍ଚଳର କଳାକାରଙ୍କୁ ସମ୍ବର୍ଦ୍ଧିତ କରାଯାଇଥିଲା। ଏଥିସହ ଅନୁଷ୍ଠାନର ୨୯ ଜଣ କଳାକାରଙ୍କୁ ମାନପତ୍ର ପ୍ରଦାନ କରାଯାଇଥିଲା। ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ଦେଖିବାକୁ ବହୁ କଳାପ୍ରେମୀ ସମାଗମ ହୋଇଥିଲେ। ଅନୁଷ୍ଠାନର ଅଧ୍ୟକ୍ଷ କମଳ ମହାରଣା ସଭାପତିତ୍ୱରେ ଆୟୋଜିତ କାର୍ଯ୍ୟକ୍ରମକୁ ଇତିଶ୍ରୀ ପୃଷ୍ଟି ପରିଚାଳନା କରିଥିଲେ। ପ୍ରଦ୍ୟୁମ୍ନ ଓଝା ଧନ୍ୟବାଦ ଅର୍ପଣ କରିଥିଲେ।
