ବସ୍ତା, ୪।୮(ସ୍ବ.ପ୍ର.)-ପିଲାମାନଙ୍କୁ ମା’ ବାପା ଆକଟ କଲା ବେଳେ ସେମାନେ ରକ୍ଷା ପାଇବା ପାଇଁ ଜେଜେମା’ ଜେଜେବାପାଙ୍କ ପାଖକୁ ଦୌଡି ଯାଇଥାନ୍ତି। ସେମାନେ ଜେଜେମା’ କୋଳରେ ନିଜକୁ ଅଧିକ ସୁରକ୍ଷିତ ମନେ କରନ୍ତି। ହେଲେ ବାଲେଶ୍ୱର ଜିଲା ବସ୍ତା ଥାନା ଭେଲୋରା ପଞ୍ଚାୟତର ଗଙ୍ଗାଧରପୁର ଗ୍ରାମରେ ଜଣେ ୭ ବର୍ଷର ବାଳକଙ୍କୁ ତାଙ୍କ ଜେଜେମା’ ଅତି ନୃଶଂସ ଭାବେ ପିଟୁଥିବା ଭିଡ଼ିଓ ଭାଇରାଲ ହେବା ପରେ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଏହି ଭିଡିଓରେ ଉକ୍ତ ମହିଳା ତାଙ୍କ ନାତିକୁ ଅମାନୁଷିକ ଭାବେ ଗୋଇଠା ମାରିବାର ଦୃଶ୍ୟ ଦେଖିବାକୁ ମିଳିଛି ା ଏହି ଘଟଣାକୁ ଶିଶୁମଙ୍ଗଳ ବିଭାଗ ଗୁରୁତର ସହ ନେଇ କାର୍ଯ୍ୟାନୁଷ୍ଠାନ ଆରମ୍ଭ କରିଛି।
ଶିଶୁ ମଙ୍ଗଳ ବିଭାଗର ଅଧିକାରୀଙ୍କଠାରୁ ମିଳିଥିବା ସୂଚନା ଅନୁଯାୟୀ, ଗଙ୍ଗାଧରପୁର ଗ୍ରାମର ରଞ୍ଜନ କୁମାର ଚଣ୍ଡ ଓ ତାଙ୍କ ସ୍ତ୍ରୀ ମଧୁସ୍ମିତା ବମ୍ବେରେ ରହି କାର୍ଯ୍ୟ କରନ୍ତି। ତାଙ୍କ ପୁଅ ବରୁଣ ତାଙ୍କ ଜେଜେମା ବୃନ୍ଦାବତୀଙ୍କ ନିକଟରେ ରୁହନ୍ତି। ଗତ ୧ତାରିଖ ରାତିରେ ବରୁଣ ଦୁଷ୍ଟାମି କରିବାରୁ ତାଙ୍କ ଜେଜେମା ବୃନ୍ଦାବତୀ ତାଙ୍କୁ ଗୋଇଠା ମାରିଥିଲେ। ଏପରିକି ତାର ହାତ, ଗୋଡ଼, ଛାତି ଓ ମୁଣ୍ଡରେ ଗୋଇଠା ମାରିବାର ଦୃଶ୍ୟକୁ କେହି ଜଣେ ସୋସିଆଲ ମିଡ଼ିଆରେ ଭାଇରାଲ କରିଥିଲେ। ପିଲାଟି ଯେତେ କାନ୍ଦୁଥଲେ ମଧ୍ୟ ଏହାକୁ ଖାତିର ନ କରି ଜେଜେମା ତାଙ୍କୁ ପିଟି ଚାଲିଥିଲେ। ଶନିବାର ଏହି ଭିଡ଼ିଓ ବହୁ ମାତ୍ରାରେ ଭାଇରାଲ ହେବା ପରେ ଏହା ପ୍ରଶାସନର ଦୃଷ୍ଟିଗୋଚର ହୋଇଥିଲା। ଭିଡ଼ିଓକୁ ଭିତ୍ତି କରି ପ୍ରଶାସନ ପକ୍ଷରୁ ତପତ୍ରତା ପ୍ରକାଶ ପାଇଛି। ଜିଲା ଶିଶୁ ସୁରକ୍ଷା ଅଧିକାରୀ ଯୁବକ କୁମାର ମାଝି, ଶିଶୁ ମଙ୍ଗଳ ଅଧ୍ୟକ୍ଷ ଭାଗିରଥୀ ବାରିକ, ପଦ୍ମଲୋଚନ ଦତ୍ତ, ଗୌରମଣି ଉପାଧ୍ୟାୟଙ୍କ ନିର୍ଦ୍ଦେଶକ୍ରମେ ଚାଇଲ୍ଡ ହେଲ୍ପଲାଇନର ବାଲେଶ୍ୱର ଜିଲା ମୁଖ୍ୟ ପ୍ରଶାନ୍ତ କୁମାର ରାଉତଙ୍କ ସହିତ ବାଲିଆପାଳ ଚାଇଲ୍ଡ ହେଲ୍ପଲାଇନର ସବସେଣ୍ଟର ମୁଖ୍ୟ କ୍ରିଷ୍ଣାରାଣୀ ଅଣ୍ଡିଆ, ଉତ୍ତମ କୁମାର ନାୟକଙ୍କ ସହିତ ବସ୍ତା ଥାନା ଅଧୀନ ଅମର୍ଦ୍ଦାରୋଡ଼ ଫାଣ୍ଡି ଅଧିକାରୀ ସଦଳବଳେ ଉକ୍ତ ଗ୍ରାମରେ ପହଞ୍ଚତ୍ ତଦନ୍ତ ଆରମ୍ଭ କରିଥିଲେ। ଶିଶୁ ମଙ୍ଗଳ ଅଧିକାରୀ ବରୁଣଙ୍କୁ ଉଦ୍ଧାର କରିବା ସହ ବୃନ୍ଦାବତୀଙ୍କୁ ଥାନାରେ ଅଟକ ରଖି ପଚରାଉଚୁରା କରୁଛି। ଖବର ଲେଖା ହେବା ପର୍ଯ୍ୟନ୍ତ ଏ ନେଇ ଥାନାରେ କୌଣସି ମାମଲା ରୁଜୁ ହୋଇ ନାହିଁ। ଏ ସମ୍ପର୍କରେ ଚାଇଲ୍ଡଲାଇନ ଜିଲା ମୁଖ୍ୟ ପ୍ରଶାନ୍ତ କୁମାର ରାଉତଙ୍କୁ ପଚାରିବାରୁ ସେ କହିଛନ୍ତି ଯେ, ଉଦ୍ଧାର ହୋଇଥିବା ପିଲାକୁ ସିଡବ୍ଲ୍ୟସି ଆଗରେ ଉପସ୍ଥିତ କରାଇବା ପରେ ପରବର୍ତ୍ତୀ ପଦକ୍ଷେପ ନିଆଯିବ।