ଲଣ୍ଡନ/ଓ୍ବାଶିଂଟନ,୧୦ା୬: ଭାରତର ଏକ ଅଳ୍ପ ଜଣାଶୁଣା ଆଇଟି ଫାର୍ମ ନିଜ କ୍ଲାଏଣ୍ଟମାନଙ୍କୁ ୧୦,୦୦୦ରୁ ଊର୍ଦ୍ଧ୍ୱ ଇମେଲ୍ ଆକାଉଣ୍ଟ ଉପରେ ୭ ବର୍ଷରୁ ଅଧିକ ସମୟ ଧରି ସାହାଯ୍ୟ କରିବା ପାଇଁ ହ୍ୟାକିଂ ସେବା ପ୍ରଦାନ କରିଥିଲା। ନୂଆଦିଲ୍ଲୀର ବେଲ୍ଟ୍ରୋକ୍ସ ଇନ୍ଫୋଟେକ୍ ସର୍ଭିସ ନାମକ ଏହି ସଂସ୍ଥା ୟୁରୋପର ସରକାରୀ ଅଧିକାରୀ, ବାହାମାସ୍ର ଗାମ୍ବଲିଂ ଟାଇକୁନ୍ସ ଏବଂ ଆମେରିକାର ଜଣାଶୁଣା ନିବେଶକମାନଙ୍କୁ ଟାର୍ଗେଟ କରିଥିଲା। ଘରୋଇ ଇକ୍ୱିଟି ଜାଏଣ୍ଟ କେକେଆର୍ ଏବଂ ଶର୍ଟ ସେଲର୍ ମୁଡି ଓ୍ବାଟର୍ସ ମଧ୍ୟ ଏହାର ଗୁପ୍ତଚରଗିରିର ଶିକାର ହୋଇଥିବା ତିନିଜଣ ପୂର୍ବତନ କର୍ମଚାରୀ, କ୍ଷେତ୍ର ଗବେଷକଙ୍କ ତଥ୍ୟ ଓ ଏକ ଅନ୍ଲାଇନ୍ ପ୍ରମାଣର ଟ୍ରାଏଲ୍ରୁ ଜଣାପଡ଼ିଛି।
ବେଲ୍ଟ୍ରୋକ୍ସର ହ୍ୟାକରମାନେ କ’ଣ ସବୁକୁ ନେଇ ଟାର୍ଗେଟ କରିଛନ୍ତି, ସେ ସମ୍ପର୍କରେ ଆମେରିକାର ଆଇନ ପ୍ରବର୍ତ୍ତନକାରୀ ସଂସ୍ଥାଗୁଡ଼ିକ ତନାଘନା ଚଳାଇଛନ୍ତି। ଏହି ବିଷୟ ସମ୍ପର୍କରେ ଜ୍ଞାନ ଥିବା ୫ ଜଣ ବ୍ୟକ୍ତି ଏନେଇ ସୂଚନା ଦେଇଛନ୍ତି। ଆମେରିକାର ନ୍ୟାୟ ବିଭାଗ ଏହା ଉପରେ ମନ୍ତବ୍ୟ ଦେବାକୁ ମନାକରିଦେଇଛି। ବେଲ୍ଟ୍ରୋକ୍ସର କ୍ଲାଏଣ୍ଟମାନଙ୍କ ପରିଚୟ ଜଣାପଡ଼ିନାହିଁ। ବେଲ୍ଟ୍ରୋକ୍ସକୁ କିଏ ହାୟର କରିଥିଲା ସେ ନେଇ କିଛି ପ୍ରଘଟ କରିବା ପାଇଁ କମ୍ପାନୀ ମାଲିକ ସୁମିତ୍ ଗୁପ୍ତା ମନାକରିଦେଇଛନ୍ତି। ସେମାନେ କିଛି ଭୁଲ୍ କରି ନ ଥିବା ସେ କହିଛନ୍ତି। ମୁଡି ଓ୍ବାଟର୍ସ ପ୍ରତିଷ୍ଠାତା କାର୍ସୋନ ବ୍ଲକ୍ କହିଛନ୍ତି, ସେ ଏହାକୁ ନେଇ ନିରାଶ, କିନ୍ତୁ ବିସ୍ମିତ ହୋଇନାହାନ୍ତି। ସେହିପରି କେକେଆର୍ ଏନେଇ କିଛି ମନ୍ତବ୍ୟ ଦେବାକୁ ମନା କରିଦେଇଛି।
ହ୍ୟାକର୍ସଙ୍କ ଦ୍ୱାରା ବ୍ୟବହୃତ ଭିତ୍ତିଭୂମିର ମ୍ୟାପିଂ କରିବାରେ ୨ ବର୍ଷରୁ ଅଧିକ ସମୟ ବିତାଇଥିବା ଇଣ୍ଟରନେଟ୍ ଓ୍ବାଚ୍ଡଗ୍ ଗ୍ରୁପ୍ ସିଟିଜେନ୍ ଲାବ୍ର ଗବେଷକମାନେ ମଙ୍ଗଳବାର ଏକ ରିପୋର୍ଟ ଜାରି କରିଛନ୍ତି। ଏହି ଗୁପ୍ତଚରଗିରି ଅଭିଯାନ ପଛରେ ବେଲ୍ଟ୍ରୋକ୍ସର କର୍ମଚାରୀମାନେ ଅଛନ୍ତି ବୋଲି ଦୃଢ଼ବିଶ୍ୱାସ ରହିଥିବା ସେମାନେ ଏଥିରେ ଉଲ୍ଲେଖ କରିଛନ୍ତି। ସିଟିଜେନ୍ ଲାବ୍ ଗବେଷକ ଜନ୍ ସ୍କଟ ରେଲଟନ କହିଛନ୍ତି, ଏହା ହେଉଛି ବର୍ତ୍ତମାନ ଯାଏ ପ୍ରଘଟ ହୋଇଥିବା ଗୁପ୍ତଚରଗିରିର ଅନ୍ୟତମ ବୃହତ୍ ହାୟର ଅପରେଶନ। ଯଦିଓ ସରକାର ପ୍ରାୟୋଜିତ ଗୁପ୍ତଚର ଗୋଷ୍ଠୀ ବା ଶିରୋନାମା ମଣ୍ଡନକାରୀ ଚୋରି ଉପରେ ଧ୍ୟାନ ଦେବା ପାଇଁ ସେମାନଙ୍କୁ କୁହାଯାଇଛି, ତେବେ ସାଇବର ମର୍ସେନେରି (ଭଡ଼ା) ସେବାଗୁଡ଼ିକ ବ୍ୟାପକ ଭାବେ ବ୍ୟବହାର କରାଯାଉଛି। କୌଣସି ସେକ୍ଟରକୁ ଛଡ଼ାଯାଇ ନ ଥିବା ତଦନ୍ତରୁ ଜଣାପଡ଼ିଛି। ରିଭ୍ୟୁ କରାଯାଇଥିବା କେତେକ ଡାଟାର କେଚ୍କୁ ଦେଖିଲେ ଅପରେଶନ୍ ସମ୍ପର୍କରେ ବୁଝିହେଉଛି।
ଟାର୍ଗେଟ ବ୍ୟକ୍ତିମାନଙ୍କୁ ଧୋକା ଦେବା ପାଇଁ ମନ୍ଦ ଉଦ୍ଦେଶ୍ୟ ଥିବା ଲକ୍ଷ ଲକ୍ଷ ମେସେଜ୍ ପ୍ରସ୍ତୁତ କରାଯାଇଥିଲା। ୨୦୧୩ରୁ ୨୦୨୦ ମଧ୍ୟରେ ବେଲ୍ଟ୍ରୋକ୍ସ ପକ୍ଷରୁ ପଠାଯାଇଥିବା ପାସ୍ଓ୍ବାଡ୍ଗୁଡ଼ିକୁ ଛାଡ଼ିଦେବା ପାଇଁ ସେମାନଙ୍କୁ କୁହାଯାଇଥିଲା। ସେମାନଙ୍କ ପ୍ଲାଟଫର୍ମରେ ଅସ୍ବାଭାବିକ କାର୍ଯ୍ୟକଳାପ ଚାଲିଥିବା ନେଇ ଫାର୍ମଗୁଡ଼ିକୁ ଆଲର୍ଟ କରାଯିବା ପରେ ହ୍ୟାକର୍ସଙ୍କ ଦ୍ୱାରା ବ୍ୟବହୃତ ଏହି ତଥ୍ୟ ଅନ୍ଲାଇନ୍ ସେବା ପ୍ରଦାନକାରୀ ନାମ ଗୋପନ ରଖିବା ସର୍ତ୍ତରେ ଦେଇଥିଲେ। କିଏ ଓ କେବେ ଟାର୍ଗେଟ ହୋଇଥିଲେ ଏହି ତଥ୍ୟ ହେଉଛି ତାକୁ ପ୍ରଭାବୀ ଢଙ୍ଗରେ ସୂଚାଉଥିବା ଏକ ଡିଜିଟାଲ ହିଟ୍ ଲିଷ୍ଟ। ଏହାର ଶିକାର ହୋଇଥିବା ବ୍ୟକ୍ତି ବା ସଂସ୍ଥାକୁ ଆସିଥବା ଇମେଲ୍ଗୁଡ଼ିକୁ ଏକ ଅନ୍ତର୍ଜାତୀୟ ଗଣମାଧ୍ୟମ ପକ୍ଷରୁ ଯାଞ୍ଚ କରାଯିବା ପରେ ଉକ୍ତ ତଥ୍ୟକୁ ବୈଧ ବୋଲି ଦର୍ଶାଯାଇଛି। ବେଲ୍ଟ୍ରୋକ୍ସର ଟାର୍ଗେଟ ହୋଇଥିବା ହଜାର ହଜାର ଲୋକଙ୍କ ତାଲିକାରେ ଦକ୍ଷିଣ ଆଫ୍ରିକାର ବିଚାରପତିମାନେ, ମେକ୍ସିକୋର ରାଜନେତା, ଫ୍ରାନ୍ସର ଆଇନଜୀବୀ ଏବଂ ଆମେରିକାର ପରିବେଶ ଉପରେ କାର୍ଯ୍ୟରତ କେତେକ ଗୋଷ୍ଠୀ ରହିଛନ୍ତି। ଏମାନେ ଏହି ପ୍ରସଙ୍ଗ ଉପରେ ମନ୍ତବ୍ୟ ଦେବାକୁ ମନା କରିଦେଇଛନ୍ତି କିମ୍ବା ମେସେଜ୍ର ଉତ୍ତର ଦେଇନାହାନ୍ତି।
୨୦୧୫ରେ ବେଲ୍ଟ୍ରୋକ୍ସ ମାଲିକ ସୁମିତ୍ ଗୁପ୍ତାଙ୍କ ବିରୋଧରେ ଅଭିଯୋଗ ଆସିଥିଲା। ମାର୍କେଟିଂ ଏକ୍ଜିକ୍ୟୁଟିଭ୍ମାନଙ୍କ ଆକାଉଣ୍ଟ ହ୍ୟାକ୍ କରିବା ପାଇଁ ଆମେରିକାର ଦୁଇଜଣ ଘରୋଇ ତଦନ୍ତକାରୀ ସୁମିତଙ୍କୁ ଅର୍ଥ ଦେଇଥିବା ସ୍ବୀକାର କରିବା ପରେ ୨୦୧୭ରେ ତାଙ୍କୁ ପଳାତକ ଘୋଷଣା କରାଯାଇଥିଲା। ତେବେ ଏହି ମାମଲାର ବର୍ତ୍ତମାନ ସ୍ଥିତି କିମ୍ବା ସୁମିତଙ୍କ ବିରୋଧରେ ପ୍ରତ୍ୟର୍ପଣ ପାଇଁ ଅନୁରୋଧ କରାଯାଇଛି କି ନାହିଁ ତା’ ଉପରେ ଆମେରିକାର ନ୍ୟାୟ ବିଭାଗ ମୁହଁ ଖୋଲିବାକୁ ମନା କରିଦେଇଛି। ଦିଲ୍ଲୀ ପୋଲିସ ଓ ଭାରତର ବହିର୍ବ୍ୟାପାର ମନ୍ତ୍ରଣାଳୟ ମଧ୍ୟ ଏନେଇ କିଛି ମନ୍ତବ୍ୟ ଦେଇନାହିଁ। ନୂଆଦିଲ୍ଲୀସ୍ଥିତ ନିଜ ବାସଭବନରୁ ଫୋନ୍ ଯୋଗେ ସୁମିତ କହିଛନ୍ତି, ହ୍ୟାକିଂ କରାଯାଇ ନାହିଁ। ତାଙ୍କୁ ଆଇନ ପ୍ରବର୍ତ୍ତନକାରୀ ସଂସ୍ଥାଗୁଡ଼ିକ ପକ୍ଷରୁ ଯୋଗାଯୋଗ କରାଯାଇ ନାହିଁ। ଘରୋଇ ତଦନ୍ତକାରୀମନେ ତାଙ୍କୁ ଲଗ୍ଇନ୍ ଡିଟେଲ୍ସ ଦେବା ପରେ ସେ କେବଳ ଇମେଲ୍ ଇନ୍ବକ୍ସରୁ ମେସେଜ୍ ଡାଉନ୍ଲୋଡ୍ କରିବାରେ ସାହାଯ୍ୟ କରିଛନ୍ତି।