ନୂଆଦିଲ୍ଲୀ,୧୩।୫(ପି.ଟି.): ପ୍ରଭାବ ବିସ୍ତାର କରିବା ଓ ନିଜ ଚିନ୍ତାଧାରା ଅନ୍ୟଉପରେ ଲଦିବା ହେଉଛି ଭାରତୀୟ ଅଧିନାୟକ ବିରାଟ କୋହଲିଙ୍କ ସ୍ବଭାବ। ତେଣୁ ଭାରତରେ ନେତୃତ୍ୱ ବିଭାଜନ କାମ ଦେବନାହିଁ ବୋଲି ଇଂଲଣ୍ଡ ପୂର୍ବତନ ଅଧିନାୟକ ନାସିର ହୁସେନ୍ କହିଛନ୍ତି। ଅର୍ଥାତ ସବୁ ଫର୍ମାଟ ପାଇଁ ଭିନ୍ନ ଭିନ୍ନ ଅଧିନାୟକ ନିଯୁକ୍ତି ଦେବା କୌଶଳ କାମ ଦେବ ନାହିଁ ବୋଲି ସେ ସ୍ପଷ୍ଟ କରିଛନ୍ତି। ତେବେ ଭିନ୍ନ ଭିନ୍ନ କୋଚ୍ ନିଯୁକ୍ତ ଦେବା କୌଶଳ ଭାରତ ଗ୍ରହଣ କରିବାରେ କିଛି ଅସୁବିଧା ନାହିଁ।
ଇଂଲଣ୍ଡରେ ଭିନ୍ନ ଭିନ୍ନ ଫର୍ମାଟ ପାଇଁ ଅଲଗା ଅଲଗା ଅଧିନାୟକ ଦାୟିତ୍ୱରେ ରହିଛନ୍ତି। ଏହା ବର୍ତ୍ତମାନ ପରିସ୍ଥିତିରେ ଭାରତ ପାଇଁ ପ୍ରଜୁଜ୍ୱ ନୁହଁ। କୋହଲି ମଧ୍ୟ ଏହାକୁ ସହଜରେ ଗ୍ରହଣ କରିପାରିବେ ନାହିଁ। କୋହଲି ଅନ୍ୟ କାହାକୁ କ୍ଷମତା ବା ନେତୃତ୍ୱ ଦେବାକୁ ନିଶ୍ଚିତ ଭାବେ କୁଣ୍ଠିତ ହେବେ ବୋଲି ସେ କହିଛନ୍ତି। ତେବେ ପ୍ରଶିକ୍ଷଣରେ ବିଭାଜନ ହେବା ଭାରତ ପାଇଁ ଖରାପ୍ କଥା ନୁହଁ। କୋଚ୍ମାନଙ୍କୁ ବହୁତ କିଛି ଭିନ୍ନ ଭିନ୍ନ କାର୍ଯ୍ୟ କରିବାକୁ ହୋଇଥାଏ। ତେଣୁ ପ୍ରଶିକ୍ଷଣରେ ବିଭାଜନ ହେଲେ କୌଣସି ଅସୁବିଧା ନାହିଁ। ଟ୍ରେଭର ବେଲିସ୍ଙ୍କ ଉଦାହରଣ ଦେଇ ସେ କହିଛନ୍ତି ଯେ, ବେଲି ଇଂଲଣ୍ଡ ଦିନିକିଆ ଦଳର କୋଚ୍ ରହିଥିଲେ। ତେଣୁ ଭାରତରେ ଦିନିକିଆ ଓ ଟେଷ୍ଟ ପାଇଁ ଭିନ୍ନ ଭିନ୍ନ କୋଚ୍ ରହିଲେ ସମସ୍ୟା କିଛି ନାହିଁ। ତେବେ ଏତେ ସଂଖ୍ୟାକ ପ୍ରତିଭା ସମ୍ପନ୍ନ ବ୍ୟାଟ୍ସମ୍ୟାନ ଥିଲେ ମଧ୍ୟ ଭାରତୀୟ ଚୟନକର୍ତ୍ତାମାନେ ୪ ନମ୍ବର ପାଇଁ କାହାକୁ ଏପର୍ଯ୍ୟନ୍ତ ଚୟନ କରିବାରେ ସଫଳ ହୋଇପାରି ନାହାନ୍ତି। କିନ୍ତୁ ଏ ଦୃଷ୍ଟିକୋଣରୁ ଦେଖିବାକୁ ଗଲେ ନ୍ୟୁଜିଲାଣ୍ଡ ଆଗରେ ରହିବ। କାରଣ ସୀମିତ ପ୍ରତିଭା ସମ୍ପନ୍ନ ବ୍ୟାଟ୍ସମ୍ୟାନ ଥିଲେ ମଧ୍ୟ ନ୍ୟୁଜିଲାଣ୍ଡ ଏହି ସମସ୍ୟାର ସମାଧାନ କରିପାରିଛି। କିନ୍ତୁ ଭାରତରେ ୪ ନମ୍ବରରେ କେହି ଜଣେ ବିଫଳ ହେଲେ ଆଉ ଜଣେ ସେହି ସ୍ଥାନରେ ବ୍ୟାଟିଂ କରିବାକୁ ଆସିଥାନ୍ତି। ତେଣୁ ଭାରତ ୪ ନମ୍ବର ସମସ୍ୟାର ସମାଧନା ଯଥାଶୀଘ୍ର କରିବା ଉଚିତ ବୋଲି ହୁସେନ କହିଛନ୍ତି।