କରାଚୀ,୧୭।୭(ପି.ଟି.)- ବିଶ୍ୱକପ୍ରେ ସେମିଫାଇନାଲକୁ ଉଠିବାରେ ବିଫଳ ହେବା ପରେ ପାକିସ୍ତାନ କ୍ରିକେଟରେ ବ୍ୟାପକ ଅଦଳବଦଳ ହେବା ଆଶା କରାଯାଉଛି। ପାକିସ୍ତାନ କ୍ରିକେଟ ବୋର୍ଡ (ପିସିବି) ମଧ୍ୟ କେତୋଟି ଦୃଢ ପଦକ୍ଷେପ ନେବ ବୋଲି ସୂଚନା ଦେଇଛି। ନେତୃତ୍ୱରେ ଭାଗବଣ୍ଟା ଅର୍ଥାତ୍ ଭିନ୍ନ ଭିନ୍ନ ଫର୍ମାଟ ପାଇଁ ଅଲଗା ଅଧିନାୟକ ନିଯୁକ୍ତି ଉପରେ ପିସିବି ଜୋର ଦେବ। କେବଳ ସେତିକି ନୁହେଁ, ନୂଆ କୋଚ ନିଯୁକ୍ତ ପାଇଁ ଦରଖାସ୍ତ ଆହ୍ବାନ କରାଯିବା ନେଇ ପିସିବି କ୍ରିକେଟ କମିଟି ନିଷ୍ପତ୍ତି ନେବ। କ୍ରିକେଟ କମିଟି ବୈଠକରେ ଏ ସଂକ୍ରାନ୍ତରେ ନିଷ୍ପତ୍ତି ନିଆଯିବ। ତେବେ କମିଟିର ବୈଠକ ଆସନ୍ତା ୨୯ ତାରିଖରେ ଆୟୋଜନ ହେବ ବୋଲି ଆଶା କରାଯାଉଥିଲେ ମଧ୍ୟ ପିସିବି ଏ ସଂକ୍ରାନ୍ତରେ କିଛି ସୂଚନା ଦେଇ ନାହିଁ। କମିଟିର ସଦସ୍ୟ ଥିବା ପୂର୍ବତନ ଅଧିନାୟକ ମିସବା ଉଲ୍ ହକ୍ ବ୍ୟକ୍ତିଗତ କାରଣରୁ ଆମେରିକା ଗସ୍ତ କରିବା କାର୍ଯ୍ୟକ୍ରମ ଥିବାରୁ ବୈଠକ ବିଳମ୍ବିତ ହୋଇଛି ବୋଲି କୁହାଯାଇଛି।
କମିଟିର ଅନ୍ୟତମ ସଦସ୍ୟ କିମ୍ବଦନ୍ତୀ ଦ୍ରୁତ ବୋଲର ଓ୍ବାସିମ ଆକ୍ରମ ଓ ପୂର୍ବତନ ଜାତୀୟ ମହିଳା ଅଧିନାୟିକା ଉରୁର ମମ୍ତାଜ ବୈଠକ ଡାକିବାକୁ ଆଗରୁ କହିସାରିଛନ୍ତି। ପିସିବି ମ୍ୟାନେଜିଂ ଡାଇରେକ୍ଟର ଓ୍ବାସିମ ଖାଁ ଏହି ବୈଠକରେ ଅଧ୍ୟକ୍ଷତା କରିବେ। ସଦ୍ୟସମାପ୍ତ ବିଶ୍ୱକପ୍ରେ ପାକିସ୍ତାନ ପଞ୍ଚମ ସ୍ଥାନରେ ରହି ଅଭିଯାନ ଶେଷ କରିଛି। ଦଳର ଦୁର୍ବଳ ପ୍ରଦର୍ଶନ ନେଇ ଏହି ବୈଠକରେ ଆଲୋଚନା କରାଯିବ। ଚୁକ୍ତି ଅବଧିକୁ ବୃଦ୍ଧି କରା ନ ଗଲେ ହେଡ୍ କୋଚ୍ ମିକି ଆର୍ଥର ଏହି ପଦ ପାଇଁ ପୁଣି ଥରେ ଆବେଦନ କରିବେ ବୋଲି ପିସିବି ମୁଖ୍ୟ ଏହସାନ ମନି ଓ ଓ୍ବାସିମ ଖାଁଙ୍କୁ କହିଛନ୍ତି। ଅନ୍ୟ ସପୋର୍ଟ ଷ୍ଟାଫ୍ ନିଯୁକ୍ତି ନେଇ ମଧ୍ୟ ଆଲୋଚନା କରାଯିବ ବୋଲି କୁହାଯାଇଛି। ତେବେ କୋଚ୍ ପଦରେ ଜଣେ ଦେଶୀ କିମ୍ବା ଜଣେ ବିଦେଶୀଙ୍କୁ ନିଯୁକ୍ତି ନେଇ ପିସିବି ପୂର୍ବପରି ଦ୍ୱନ୍ଦ୍ୱରେ ରହିଛି। ନେୃତୃତ୍ୱରେ ଭାଗବଣ୍ଟା କରି ଅଧିନାୟକ ସର୍ଫରାଜ ଅହମ୍ମଦଙ୍କ କାର୍ଯ୍ୟଭାର କମ୍ କରିବାକୁ ପିସିବି ଲକ୍ଷ୍ୟ ରଖିଛି ବୋଲି କୁହାଯାଇଛି।