ଭଦ୍ରକ ଅଫିସ,୩୦।୪: କରୋନା ଲକ୍ଡାଉନ ହେବାର କିଛି ମାସ ପୂର୍ବରୁ କେନ୍ଦୁଝର ଓ ଭଦ୍ରକ ଜିଲାର କିଛି ଶ୍ରମିକ କାର୍ଯ୍ୟ ପାଇଁ ନେପାଳ ଯାଇଥିବା ଜଣାପଡ଼ିଛି। ହେଲେ ସାରା ଦେଶରେ ଲକ୍ଡାଉନ ହେବାରୁ ସେଠାରେ ସେମାନଙ୍କୁ ଖାଇବା ଓ ରହିବାର ଅସୁବିଧା ହେଉଥିବାରୁ ଏବେ ନିଜ ଜନ୍ମସ୍ଥାନକୁ ଫେରିବା ପାଇଁ ଶ୍ରମିକମାନେ କେନ୍ଦ୍ର ଓ ରାଜ୍ୟ ସରକାରଙ୍କୁ ନିବେଦନ କରିଛନ୍ତି। ସୂଚନାଯୋଗ୍ୟ କେନ୍ଦୁଝର ଜିଲାର ସାଳଣିଆ ଓ ଭଦ୍ରକ ଜିଲା ଧାମନଗରରୁ ପାଖାପାଖି ୩୦ଜଣ ଶ୍ରମିକ ଛତା କମ୍ପାନୀକୁ କାମ କରିବା ପାଇଁ ନେପାଳ ଯାଇଥିଲେ। କିନ୍ତୁ ଲକ୍ଡାଉନ ଚାଲୁ ରହିଥିବାରୁ ବର୍ତ୍ତମାନ ସେମାନଙ୍କର ଖାଇବା, ପିଇବା, ରହିବାର କମ୍ପାନୀର ମାଲିକ କିଛି ବି ବୁଝୁ ନ ଥିବା ସେମାନେ ଅଭିଯୋଗ କରିଛନ୍ତି। ଏଥିସହ ସେମାନଙ୍କ ପାଖରେ ଏବେ ଟଙ୍କାପତ୍ର କିଛି ନ ଥିବାରୁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଫଳରେ ସେମାନେ ନିଜ ଭିଟାମାଟିକୁ ଫେରିବାକୁ ଚାହୁଁଛନ୍ତି। ଏଥିପାଇଁ ପରିବାର ପକ୍ଷରୁ ଓଡିଶା ଓ କେନ୍ଦ୍ର ସରକାରଙ୍କୁ ଟୁଇଟର ମାଧ୍ୟମରେ ଆକୁଳ ନିବେଦନ କରିଛନ୍ତି। ଯଥା ସମ୍ଭବ ଏହି ଗରିବ ଦାଦନ ଶ୍ରମିକଙ୍କୁ ଉଦ୍ଧାର କରିବା ପାଇଁ ସରକାର ତୁରନ୍ତ ପଦକ୍ଷେପ ଗ୍ରହଣ କରନ୍ତୁ। ଏନେଇ ଧାମନଗର ଅଞ୍ଚଳର ସାମାଜିକକର୍ମୀ ସନ୍ତୋଷ କୁମାର ମହାପାତ୍ର ଟୁଇଟରରେ କେନ୍ଦ୍ର, ରାଜ୍ୟ ସରକାର ସମେତ ବୈଦେଶିକ ମନ୍ତ୍ରୀ ଓ ଜିଲାପ୍ରଶାସନ ନିକଟରେ ନିବେଦନ କରିଛନ୍ତି।