ନୂଆଦିଲ୍ଲୀ,୧୩ା୬(ପି.ଟି.): ବିହାରର ସୀତାମାଢ଼ି ଜିଲା ସୀମାନ୍ତରେ ନେପାଳ ପୋଲିସର ଆଖିବୁଜା ଗୁଳିମାଡ଼ରେ ଜଣେ ଭାରତୀୟଙ୍କ ମୃତ୍ୟୁ ହେବା ସହ ୪ ଆହତ ହୋଇଛନ୍ତି। ସୋନେବର୍ଷା ଥାନା ପିପ୍ରା ପର୍ସାଇନ୍ ପଞ୍ଚାୟତର ଲାଲ୍ବନ୍ଦୀ-ଜାନକୀ ନଗର ସୀମାରେ ନେପାଳ ପୋଲିସ ସହ କେତେଜଣ ଭାରତୀୟଙ୍କର ବଚସା ହୋଇଥିଲା। ଉତ୍ତେଜିତ ହୋଇ ପୋଲିସ ଭାରତୀୟଙ୍କ ଉପରକୁ ଗୁଳି ଚଳାଇଥିଲେ। ଏଥିରେ ବିକେଶ କୁମାର ରାୟ(୨୫) ନାମକ କୃଷକଙ୍କର ମୃତ୍ୟୁ ଘଟିଥିବାବେଳେ ପାଖ କ୍ଷେତରେ କାମ କରୁଥିବା ଉମେଶ ରାମ ଓ ଉଦୟ ଠାକୁର ଆହତ ହୋଇଛନ୍ତି। ଲଗନ ରାୟ ନାମକ ଅନ୍ୟ ଜଣେ ବ୍ୟକ୍ତିଙ୍କୁ ନେପାଳ ପୋଲିସ ଅଟକ ରଖିଛି। ଗତମାସ ୧୭ରେ ନେପାଳ ପୋଲିସ ଫାଙ୍କା ଗୁଳି ଚଳାଇ ସୀମା ଅତିକ୍ରମ କରୁଥିବା ଭାରତୀୟଙ୍କୁ ତଡ଼ିଦେଇଥିଲା। ନେପାଳ ସହ ସୀମା ବିବାଦ ଚାଲିଥିବାବେଳେ ଗୁଳିକାଣ୍ଡ ପରେ ଉତ୍ତେଜନା ବୃଦ୍ଧି ପାଇଛି। ସେଠାକୁ ସଶସ୍ତ୍ର ସୀମା ବଳ ଯବାନଙ୍କୁ ପଠାଯାଇଛି।