ଭୁବନେଶ୍ୱର,୨୮।୪(ବ୍ୟୁରୋ): ରାଜ୍ୟ ସରକାରଙ୍କ ପକ୍ଷରୁ ୫ଜଣ ଆକ୍ରାନ୍ତଙ୍କ ଟ୍ରାଭେଲ୍ ହିଷ୍ଟ୍ରି ବିଷୟରେ ମଙ୍ଗଳବାର ସୂଚନା କରାଯାଇଛି। ୧୦୪,୧୦୫,୧୦୬,୧୦୭,୧୦୮ ଆକ୍ରାନ୍ତଙ୍କ ବିଷୟରେ ତଥ୍ୟ ଦିଆଯାଇଛି।
୧୦୪ ନଂ ଆକ୍ରାନ୍ତ ବାଲେଶ୍ୱର ନେଳିଆବାଗ୍ର ୨୨ ବର୍ଷୀୟ ମହିଳା। ସେ ୬୧ନଂ ଆକ୍ରାନ୍ତଙ୍କ ପଡ଼ୋଶୀ। ୨୨ମାର୍ଚ୍ଚରୁ ୧୮ ଏପ୍ରିଲ(ଲକ୍ଡାଉନ୍ ସମୟରେ) ସେ ଘରେ ଥିଲେ। ପରେ ଉକ୍ତ ଅଞ୍ଚଳରେ କରୋନା ପଜିଟିଭ୍ ଚିହ୍ନଟ ହେବା ପରେ କଣ୍ଟେନମେଣ୍ଟ ଜୋନ୍ ମଧ୍ୟରେ ସେ ୧୯ ଏପ୍ରିଲରୁ ୨୬ ଏପ୍ରିଲ ପର୍ଯ୍ୟନ୍ତ ରହିଥିଲେ। ପରେ ତାଙ୍କର ଲକ୍ଷଣ ପ୍ରକାଶ ପାଇଥିଲା। ଏଣୁ ତାଙ୍କର ନମୂନା ପରୀକ୍ଷା ପାଇଁ ପଠାଯାଇଥିଲା। ଏପ୍ରିଲ ୨୬ ତାରିଖରେ ତାହା ପଜିଟିଭ୍ ଆସିଛି। ଏହାପରେ ତାଙ୍କୁ ୨୭ ଏପ୍ରିଲରେ ଚିକିତ୍ସା ପାଇଁ କଟକସ୍ଥିତ ଅଶ୍ୱିନୀ କୋଭିଡ୍ ହସ୍ପିଟାଲରେ ଭର୍ତ୍ତି କରାଯାଇଛି।
୧୦୫ନଂ କରୋନା ଆକ୍ରାନ୍ତ ୬୧ନଂ ଆକ୍ରାନ୍ତଙ୍କ ପାଖ ପଡ଼ୋଶୀ। ସେ ୫୫ ବର୍ଷୀୟ ମହିଳା। ଲକ୍ଡାଉନ୍ ପରଠାରୁ ସେ ଘରେ ଥିଲେ। ଏପରିକି କଣ୍ଟେନ୍ମେଣ୍ଟ ଅଞ୍ଚଳ ଘୋଷଣା ହେବା ପରେ ମଧ୍ୟ ସେ ୧୯ ଏପ୍ରିଲରୁ ୨୬ ଏପ୍ରିଲ ପର୍ଯ୍ୟନ୍ତ ଘରେ ରହିଥିଲେ। ପରେ ତାଙ୍କ ନିକଟରେ ଲକ୍ଷଶ ପ୍ରକାଶ ପାଇଥିଲା। ଏଣୁ ୨୬ ତାରିଖରେ ନମୂନା ସଂଗ୍ରହ କରାଯାଇଥିଲା। ୨୭ ତାରିଖରେ ତାହା ପଜିଟିଭ୍ ଆସିଛି।
ସେହିଭଳି ୧୦୬ନଂ ଏବଂ ୧୦୭ନଂ ଆକ୍ରାନ୍ତ ଯଥାକ୍ରମେ ୨୩ ବର୍ଷୀୟ ମହିଳା ଏବଂ ୨୭ ବର୍ଷୀୟ ପୁରୁଷ। ସେମାନେ ମଧ୍ୟ ନେଳିଆବାଗ୍ର। ୬୧ନଂ ଆକ୍ରାନ୍ତଙ୍କ ପାଖ ପଡ଼ୋଶୀ। ଉପରୋକ୍ତ ୨ ଜଣଙ୍କ ଭଳି ସେମାନେ ମଧ୍ୟ ଲକ୍ଡାଉନ୍ ସମୟରୁ ଘରେ ରହିଥିଲେ। ଏପରିକି କରୋନା ଆକ୍ରାନ୍ତ ଚିହ୍ନଟ ହେବା ପରେ କଣ୍ଟେନ୍ମେଣ୍ଟ ଅଞ୍ଚଳ ଘୋଷଣା ହେବା ପରେ ମଧ୍ୟ ସେ ଘରେ ରହିଥିଲେ। ପରେ ସେମାନଙ୍କ ନିକଟରେ ଲକ୍ଷଣ ପ୍ରକାଶ ପାଇଥିଲା। ଏଣୁ ତାଙ୍କ ନମୂନା ସଂଗ୍ରହ କରାଯାଇଥିଲା। ୨୬ରେ ତାହା ପଜିଟିଭ୍ ଆସିବା ପରେ ସୋମବାର ସେମାନଙ୍କୁ ଅଶ୍ୱିନୀ ହସ୍ପିଟାଲରେ ଭର୍ତ୍ତି କରାଯାଇଛି।
ଅପରପକ୍ଷେ ୧୦୮ନଂ କରୋନା ପଜିଟିଭ୍ ୨୯ ବର୍ଷୀୟ ମହିଳା। ସେ ପୂର୍ବରୁ ଚିହ୍ନଟ ୭୯ନଂ ଆକ୍ରାନ୍ତଙ୍କ ପାଖ ପଡ଼ୋଶୀ। ସମସ୍ତଙ୍କ ଭଳି ସେ ମଧ୍ୟ ଲକ୍ଡାଉନ୍ ପରଠାରୁ ଘରେ ରହି ଆସୁଥିଲେ। ୨୬ ତାରିଖରେ ତାଙ୍କ ନିକଟରେ ଲକ୍ଷଣ ପ୍ରକାଶ ପାଇଥିଲା। ଏଣୁ ତାଙ୍କର ନମୁନା ସଂଗ୍ରହ କରାଯାଇଥିଲା। ଏହା ପଜିଟିଭ୍ ଆସିବା ପରେ ତାଙ୍କୁ ଅଶ୍ୱିନୀ ହସ୍ପିଟାଲରେ ଭର୍ତ୍ତି କରାଯାଇଛି।