କୋରୁକୋଣ୍ଡା/ଚିତ୍ରକୋଣ୍ଡା, ୧୧।୧୨ (ଡି.ଏନ.ଏ): ମାଲକାନଗିରି ଜିଲା ଚିତ୍ରକୋଣ୍ଡା ବିଛିନାଞ୍ଚଳରେ ପୁଣିଥରେ ବିଛିନ୍ନାଞ୍ଚଳବାସୀ ଏକତ୍ରିତ ହୋଇ ପ୍ରଜାମେଳି କରିଥିବା ଦେଖିବାକୁ ମିଳିଛି। ଏହି ପ୍ରଜାମେଳି ଚିତ୍ରକୋଣ୍ଡା ବ୍ଲକ ଅନ୍ତର୍ଗତ ଅଣ୍ଡରାପାଲି ପଞ୍ଚାୟତର ଆରାପଦର ଗ୍ରାମରେ ହୋଇଥିଲା। ବିଛିନ୍ନାଞ୍ଚଳର ୭ଟି ପଞ୍ଚାୟତର ହଜାର ହଜାର ଲୋକେ ଏହି ପ୍ରଜାମେଳି କରି ନିଜର ନ୍ୟାୟ ଓ ସେମାନଙ୍କ ହକ ପାଇଁ ନିଜର ସ୍ବର ଉତ୍ତୋଳନ କରିଥିଲେ। ବିଛିନ୍ନାଞ୍ଚଳବାସୀଙ୍କ କହିବାନୁଯାୟୀ ପୂର୍ବରୁ ବାତ୍ୟାରେ ଯାହା ସେମାନଙ୍କର କ୍ଷତିଗ୍ରସ୍ତ ହୋଇଥିଲା, ସରକାର ସେମାନଙ୍କର କ୍ଷତିପୂରଣ ବାବଦକୁ କିଛି ସାହାଯ୍ୟ ସହାୟତା କଲେ ନାହିଁ। ବର୍ତ୍ତମାନ ଚଳିତ ବର୍ଷ ସେହିପରି ଡ୍ୟାମ ପାଣି ପଶି ଲୋକମାନଙ୍କ ଜମିରେ ଫସଲ ସବୁ ନଷ୍ଟ ହୋଇଯାଇଛି ତଥାପି ପ୍ରଶାସନ ସବୁ ଜାଣିଶୁଣି ନୀରବ ରହୁଛି। ବିଛିନ୍ନାଞ୍ଚଳବାସୀଙ୍କ କହିବା କଥା କି ଯଦି ଭୁବନେଶ୍ୱର, ପୁରୀ କିମ୍ବା କଟକରେ ବାତ୍ୟା ହେଲେ ପ୍ରଭାବିତ ଲୋକମାନଙ୍କୁ ସରକାର ସାହାଯ୍ୟ ସହାୟତା କରୁଛନ୍ତି। କିନ୍ତୁ ବିଛିନ୍ନାଞ୍ଚଳବାସୀ ଆଜି ପର୍ଯ୍ୟନ୍ତ ସବୁବେଳେ ହୀନ ଦୃଷ୍ଟିରେ ଦେଖିଆସୁଛନ୍ତି ବୋଲି ସେମାନେ ଅଭିଯୋଗ କରିଛନ୍ତି। ତେଣୁ ଗତକାଲି ବିଛିନ୍ନାଞ୍ଚଳ ଆଦିବାସୀ ବିକାଶ ମଞ୍ଚ ପକ୍ଷରୁ ହଜାର ହଜାର ନିରୀହ ଆଦିବାସୀ ଏକତ୍ରିତ ହୋଇ ସେମାନଙ୍କର ନ୍ୟାୟ ଦାବିରେ ଏହି ପ୍ରଜାମେଳି କରିଥିଲେ। ଏବଂ ଏହି ପ୍ରଜାମେଳିରେ ପଡୋଶୀ ରାଜ୍ୟ ଆନ୍ଧ୍ରପ୍ରଦେଶର ବିଶାଖାପାଟଣା ଜିଲାର ୬ଟି ପଞ୍ଚାୟତର ସରପଞ୍ଚ ଓ ସମିତି ସଭ୍ୟ ଏହି ପ୍ରଜାମେଳିରେ ଯୋଗ ଦେଇଥିଲେ ଏବଂ ବିଛିନ୍ନାଞ୍ଚଳବାସୀଙ୍କୁ ସହାୟତାର ହାତ ବଢାଇଥିଲେ, ସେମାନଙ୍କ ଫସଲ ମଧ୍ୟରେ ପାଣି ପଶି ଚଳିତ ବର୍ଷ ବହୁ ମାତ୍ରାରେ ଫସଲ ନଷ୍ଟ ହୋଇଯାଇଥିବାରୁ ସେମାନଙ୍କ ପାଇଁ ବିରି, ମାଣ୍ଡିଆ, କୋଳଥ, ମୁଗ, କାନ୍ଦୁଲ ଆଦି ସେହି ସରପଞ୍ଚ ଓ ସମିତିସଭ୍ୟମାନେ ସେମାନଙ୍କ ଗ୍ରାମରୁ ଆଣିଥିଲେ। ତେଣୁ ଆନ୍ଧ୍ରପ୍ରଦେଶ ସବୁ ପ୍ରକାର ସାହାଯ୍ୟ ସହାୟତା ସେମାନଙ୍କୁ ଯୋଗାଉଥିବାରୁ ସେମାନେ ଆନ୍ଧ୍ରରେ ମିଶିବାକୁ ଚାହୁଁଥିବା ଜଣାପଡିଛି। ଯଦି ଆଗାମୀ ଦିନରେ ଏହିପରି ସେମାନଙ୍କୁ ଅଣଦେଖା କରାଯାଏ ତାହେଲେ ସେମାନେ ଆନ୍ଧ୍ରରେ ମିଶିବେ ବୋଲି ଚେତାବନୀ ଦେଇଛନ୍ତି। ଏବଂ ଏହି ପ୍ରଜାମେଳି ପ୍ରତ୍ୟକ୍ଷ ଭାବେ ନକ୍ସଲମାନଙ୍କର ହାତ ଥିବା ଜଣାପଡିଛି।