ନ୍ୟାୟ ପାଇଁ ଜିଲାପାଳଙ୍କ ଦ୍ୱାରସ୍ଥ ହେଲେ ମାଟ୍ରିକ ପରୀକ୍ଷା ଫର୍ମ ପୂରଣରୁ ବଞ୍ଚିତ ଅଭିଭାବକ
6:28 pmDecember 2, 2019 / 09

ଯୋଡ଼ା,୨।୧୨(ଡି.ଏନ୍‌.ଏ.): କେନ୍ଦୁଝର ଜିଲା ଯୋଡ଼ାସ୍ଥିତ ବନେଇକଳା ଉଚ୍ଚ ବିଦ୍ୟାଳୟରେ ମାଟ୍ରିକ ପରୀକ୍ଷା ଫର୍ମ ପୂରଣରୁ ବଞ୍ଚିତ ଛାତ୍ରୀଛାତ୍ରଙ୍କ ଅଭିଭାବକମାନେ ସୋମବାର ନ୍ୟାୟ ପାଇଁ ଲିଖିତ ଆକାରରେ ଜିଲାପାଳଙ୍କ ଦୃଷ୍ଟି ଆକର୍ଷଣ କରିଛନ୍ତି। ଦଶମ ଶ୍ରେଣୀରେ ପଢୁଥିବା ୮୨ ଛାତ୍ରୀଛାତ୍ରଙ୍କ ମଧ୍ୟରୁ ୪୯ ଜଣ ଫର୍ମ ପୂରଣ କରିଥିଲେ। ଅବଶିଷ୍ଟ ୩୩ ଛାତ୍ରୀଛାତ୍ର ଦଶମ ଶ୍ରେଣୀର ପ୍ରି-ବୋର୍ଡ ପରୀକ୍ଷାରେ ମାର୍କ କମ୍‌ ରଖିଥିବାରୁ ସେମାନଙ୍କୁ ଅଯୋଗ୍ୟ ଦର୍ଶାଇ ବିଦ୍ୟାଳୟର ପ୍ରଧାନ ଶିକ୍ଷକ ସେମାନଙ୍କର ଫର୍ମ ପୂରଣ କରାଇ ନ ଥିଲେ । ଫଳରେ ଫର୍ମ ପୂରଣ ତାରିଖ ଶେଷ ହୋଇଯାଇଥିଲେ ମଧ୍ୟ ସେମାନେ ଫର୍ମ ପୂରଣ କରି ପାରି ନ ଥିଲେ । ଏହି ଘଟଣାକୁ କେନ୍ଦ୍ରକରି ଶନିବାର ଅଭିଭାବକ ପୋଲିସକୁ ଜଣାଇ ସ୍କୁଲରେ ତାଲା ପକାଇଥିଲେ। ଏ ନେଇ ବ୍ଲକ ଶିକ୍ଷାଧିକାରୀ ଓ ଜିଲା ଶିକ୍ଷାଧିକାରୀଙ୍କୁ ଲିଖିତ ଭାବେ ଜଣାଇଥିଲୋ ଯୋଡା ଥାନା ଆଇଆଇସି ଏହାର ସମାଧାନ କରାଯିବ ବୋଲି କହି ସ୍କୁଲରୁ ତାଲା ଖୋଲିବାକୁ ଅଭିଭାବକମାନଙ୍କୁ ନିର୍ଦ୍ଦେଶ ଦେଇଥିଲେ । ମାତ୍ର ଏହାର କୌଣସି ସମାଧାନ ନ ହେବାରୁ ସେମାନେ ସୋମବାର ଜିଲାପାଳଙ୍କୁ ଲିଖିତ ଅଭିଯୋଗ କରିଥିବା ଅଭିଭାବକ ଲକ୍ଷ୍ମଣ ପାତ୍ର, ରାମ ପାତ୍ର, ବିକ୍ରମ ଗାଗରାଇ ପ୍ରମୁଖ ସୂଚନା ଦେଇଛନ୍ତି ।